Read Dimasa Matthew 17 Bible Online

Matthew 17 - Dimasa bible

Matthew 17

¹Nokha sain doh ni yaohon ha Jisu, Peter, Jakob ar boni daphlung Johanthu khe bo lang hi hading gujuyaba ha gibin khlai hi thang ba.

²Bonsi naihi dongba ha ning, Jisu ni saogari gibin ja lang la kha; ode boni mukhangbo sain lai jna ba, boni gainsari bo borop lai phu lang la kha.

³Rikphayarao gatham, Moses jang Elija ni rogong ha song hi sainlaiba khe nu ba.

⁴Odehe, Peter Jisu jang sainlai ba, Gabra, jinthane khlai hi eraha dongba ham nang. Ning nangjao khade, khepsa grang tham dang nang, ninthane masi, Moses ne masi, Elija ne masi.

⁵Bo grao thisaiba ha ning, jimi guphu jnayaba jang bonsi khe phungkhlip phai kha; odehe, jimi ni phrang khurang elei baigo ba, Ebode ani basa, ang hamjao daothaoyaba se, boni grao khe khna lah.

⁶Yaohon rikphayarao ebo grao khe khna hi blip pha hi galai ba, bonsi hamsi ning khin kha,

⁷Jisu rogong ha phai hi bonsi khe dopha hi thiba, Bai ja, da khin.

⁸Odehe, bonsi naiding baihaba ha, boha Jisu khe garhi saosi khebo bonsi nuya kha.

⁹Odehe, hading ni phrang akhaiba ha, Jisu bonsi khe thi ba, Marsi ni Basa subung githi ni bising ni phrang baija phinya side, nisi nuyaba khe saosi nihabo da thi bai.

¹⁰Jar ni yaohon rikphayarao boni ha singba, Dara khe slingriyarao Elija se sagang phai da ma thihi snadi jabani bonsi thi ba?

¹¹Bo thiphin ba, Elija de phai ma ning, ode, khrip jadi khe bo hamba khlai ma se.

¹²Thikhabo ang nisi khe thidu, Elija de phai kha, bokhe bonsi tharmaiya, boni basao ha bede nangjaoba olei ning bonsi khlai kha. Olei jasosi ning Marsi ni Basa ni basao habo bonsi ni gede ni phrang bo dukhu mai ma se.

¹³Boha se yaohon rikphayarao baptisma riyaba Johan ni balam ha se thiba thihi tharmai ba.

¹⁴Subung buthu bangyaba bonsi ni gede sophai khali ha, subung saosi boni sagang ha yasgu thuhi thiba,

¹⁵Gabra, ani basa khe khasao lah. Bede thikhade ani basa murkhi jathai jang gabang dukhu jahi dong; alang alang wai ha galai sing re, ode, dih habo alang alang galai sing re.

¹⁶Nini yaohon rikphayarao niha langhi thang ba, thikhabo bonsi de ham ri phuya.

¹⁷Jisu thiphinba, O lonyayaba ode dang gajai dangyaba subung buthu, bislei sosi nisi jang ang dongma? Bislei sosi nisi jang baosi ang dongpha phuma kho? Bokhe ani ha labu lah.

¹⁸Odehe, sgain madai hamya khe johi boni bising ni phrang bo baigo kha. Boha ning ansa ham lang la kha.

¹⁹Odehe, yaohon rikphayarao sao jang Jisu niha phai hi, Snadi jabani jing la rik hon phuya ba? thihi bonsi sing ba.

²⁰Bo bonsi khe thiphin ba, “Nisi ni lonma bangya bani. Gibi jang ang nisi khe thidu, nisi niha yaolei bogrong grongsi lai lonma dong khade, ebo hading khe eraha ni phrang oraha disai lah nisi thi khade, bo disaijao la ma se, nisi ne khlai hi dangphuyayaba musibo giri.”

²¹(Sereba rebyaba ha elei dong) Thikhabo, eleiyaba de hoh khongja donghi biya khade baigo phuya.

²²Odehe, Galili raji ha bonsi dongba ha Jisu bonsi niha thiba, Marsi ni Basa de subung buthu ni yaoha rem rijao ma se.

²³Bonsi bokhe sthai ma, odehe, nokha saintham ha bo thang hi baijaphin ma. Odebani bonsi hamsi ning khah waimu nanglai ba.

²⁴Kapernaum ha bonsi sohiba ha, bikhoh ni khrang phain khrangyarao Peter niha phai hi sing ba, “Nisi ni hoja la bikhoh ni khrang phain khe riya na somo”?

²⁵Ri du dou thi hi Peter thiphin ba. Noh bising ha Peter hapsingba ha, Jisu bokhe thi ba, Simon, ning la snadi bao du? Phirthi ni rajarao khrang phain ja thing, sere niha bonsi la re? Jar ni basathu niha na subung gibin niha?

²⁶Malai ni phrang thihi Peter thiba jang, Jisu boni ha thiba, Ode thikhala, basathu de suk jang dong nang niya.

²⁷Thikhabo, ning dih wari ha thang hi, phisa bim lah; ode, nah sagangthao baigoyaba khe rem hi, boni bukhuh khe sasi kha ning rang bagrai magin mai nang; bokhe lahi ning jang ani khlai hi bonsi ne ri lah, ode niyakha de bonsi khah ha hamjaoya jajao nang.