Read Dimasa Matthew 2 Bible Online

Matthew 2 - Dimasa bible

Matthew 2

¹Raja Herod, raja jahi dongba ha, Juda raji ni Bethlehem nogor ha, Jisu hajai ba. Boha sainja ni phrang gonokrao Jerusalem ha phai hi sing ba,

²Judarao ni raja hajai phayaba braha dong? Sainja ni phrang boni sathrai khe jing nu hi, bokhe khlim ma ne jing phai ba, thi hi bonsi thi ba.

³Raja Herod ebo grao khe khna ba jang khah waimu nang ba, ode Jerusalem ni khrip subungbo bo jang baosi gamang lai ba.

⁴Odehe, Jonthaimarao, Dara khe slingriyarao, subung buthu khe longthim hi bonsi khe bo sing ba, Krista la braha hajai ma?

⁵Bonsi boni ha, Juda raji ni Bethlehem ha, gorasali elei rebyaba dong:

⁶O ning Juda raji ni Bethlehem, Juda nogor buthu ni bising ha ning khasi daothao ja phuya; Bedethikhade, ani subung Israel sarao khe naiso-nuso ginyaba de, Nini phrang se baigo ma, thi hi bonsi thi ba.

⁷Yaohon ha Herod gonokrao khe longkhao hi sathrai nujaoba ni bubli khe ragao sisi sing hi thi ba,

⁸Thang, nana ni balam ha hamsisi sing tha; ode, angbo bokhe khlim mane khlai hi nisi nu kha ning a ne khna ri phin, thi hi bonsi khe Bethlehem ha haiha kha.

⁹Odehe, bonsi raja ni grao khe khna hi thang la kha. Sainja ni phrang sathrai nuyaba de nana dongyaba krosao bujui ha songthaoba nuya si bonsi ni sagang sagang thang pha lang ba.

¹⁰Bonsi sathrai khe nu hi gabang khaja kha.

¹¹Odehe, noh ha hapsing hi boni buma Mari niha, nana khe nu dada, yasgu thu hi bonsi khlim ba. Ode, bonsi jar jar ni don bubim buthu khe khuru hi khajama ni yaosandi-gajao, murra, athor bonthane bonsi ri ba.

¹²Odehe, bonsi Herod ni ha thangphinya mane khlai hi saomi ha thijaoyaba grao dongba ni, lama gibin gede jar ni nolei ha bonsi thangphin la kha.

¹³Odehe, bonsi thang la bani yaohon ha, Gabra ni degla saosi saomi ha nujao phai hi Josef khe thi ba, Baija hi nana jang boni buma khe lang hi, Egypt raji ha khailang lah; ode, ning khe ang thiphinya si, oraha ning dong lah. Bedethikhade, nana khe Herod sthai mane smai du.

¹⁴Odebani, baija hi, hor ha ning nana jang boni buma khe lang hi Egypt ha bo thang la kha.

¹⁵Gabra ning gorasali ni khuh ha thi ba, Ani basa khe Egypt ni phrang longhun ma, thiyaba sophai phu mane khlai hi oraha ning bonsi dong ba.

¹⁶Odehe, Herod khe gonokrao thokhi kha thi hi bo tharmai ba jang hamsi ning thamsi baigo hi, subung haiha hi, bubli ha gonokrao khe ragao sisi grao singphlaba lai, Bethlehem ni khrip haphai ha nana miyah nokha maithai gin ni phrang bakhla ni khrip khe bonsi dainthai thar ba.

¹⁷Odehe, bo bubli ha gorasali Jeremia grao thiyaba gibi japhai kha:

¹⁸“Rama nolei ha jirikkhao hi grayaba khurang khna ha du, Thihyaba khe wainso hi jiu khlai hi gra lai du, Rakhil jar ni basathu giri kha bani gra du Ar, bo malai jang waimu phoron ma nangjaoya”.

¹⁹Herod thih bani yaohon ha, Gabra ni degla Egypt ha Josef niha saomi jang nujao phai hi thi ba,

²⁰Baija hi nana jang boni buma khe lang hi Israel raji ha thang lah; nana sthaima baoyarao bonsi thih kha.

²¹Odehe, baija hi nana jang boni buma khe lang hi Israel raji ha phaiphin kha.

²²Thikhabo, Herod ni basa Arkelaus, boni bupha ni baslai ha raja jahi dong thi hi khna dada oraha thang raoya kha. Ode, saomi ha thijaoba ni Galili gede thang la kha.

²³Gorasali ni khuh jang thilang ba, Bo de Nazareth ni subung thijao ma thiyaba grao gibi japhaima ne khlai hi nogor masi Nazareth thiyaba ha bonsi dong hi ba.