Read Dimasa Matthew 20 Bible Online

Matthew 20 - Dimasa bible

Matthew 20

¹Sorgo raji de noh ni bubra, jar ni grep ni bari ha khusi dangyarao khe khusi dang ri mane phorongma sangga baija hi baigo langba lai se.

²Bo khusi dangyarao jang sainsi ha aduli ruji ri mani khlai hi sainlai dada bonsi khebo bari ha haiha kha.

³Sainjer beren ha bo baigo ba, boha gibin subung hathai ha haglai biglai songyarao bo nuba

⁴Bonsi khe thiba, Nisibo grep bari ha khusi dangtha sang, nisi jajao gothai ang ri nang. Odebani bonsi thang kha.

⁵Odehe, sainbli beren ha ode sari ni makham songba beren ha bo baigo phinhi olei jasosi ning bo khlai phin ba.

⁶Sainbli ha bo baigo baha subung gibin songyarao khe nuhi, bonsi khe thi ba, Snadi jabani eraha sainsong haglai biglai song ba?

⁷Bonsi boniha, Saosibo jing khe yaowai laya, thihi thiphin ba. Bo bonsi khe, Nisi bo grep bari ha thang sang, thihi sani ba.

⁸Habah garbli jahi, grep bari ni bubra boni rang naisoyaba khe thi ba, Khusi dangyarao khe longha lah, bo yaohonthao ni khe lahi sagangthao ni sosi bonsi ni ruji khe ri lah, thihi sani ba.

⁹Sainbli ha khusi dang riyarao khrip bo aduli masi mailai kha.

¹⁰Sagangthaoyarao de bangdao hi mai nang thihi bonsi bao ba, thikhabo bonsi bo aduli se ning mailai ba.

¹¹Odebani, bonsi langba ha noh bubra ni basao ha bonsi ber ba.

¹²Ebo yaohonthaoyarao gontha si se ning khusi dang ba, ode ning jing jang baosi bonsine ri ba, jing se sainsong bubain sugu ba, ode sain ajao ba!

¹³Bonsi ni bising ha saosi niha, Lugu, nini basao ha ang musibo gajai khlaiya. Ning ning aduli yaowai ri mane jing sainlaiya na somo?

¹⁴Nini phantha khe langhi thang lah. Ninthane ang riba lai ning ebo yaohonthao ni nebo ang rima nangjao du.

¹⁵Ani jar ni jinis khe ang nangjaoba lai lai ang yaowaiba jaya na? Niyakhala, ang hamba ni khlai hi nisi hingsa ja ba? thihi thiphin ba.

¹⁶Olei jasosi ning yaohonthao ni sagangthao ja ma. Sagangthao nibo yaohonthao ja ma.

¹⁷Odehe, Jisu Jerusalem ha thangba ha, yaohon rikphayarao jhigin khe gibin khlai hi bo lang hi, lama ha bonsi khe thi ba,

¹⁸Nai lah, Jerusalem ha jing thang du. Marsi ni Basa de Jonthaimarao ode Dara khe slingriyarao ni yao ha rem rijao ma, ode bonsi de thih mane khlai hi boni basao ha bonsi grao saso nang.

¹⁹Odehe, bokhe mlaothai ma, doma-suma, ode kross ha dikpha mane khlai hi Jentailrao ni yao ha bokhe nepha ma; ode, nokha saintham ha thang hi baijaphin ma.

²⁰Boha, Jebedai ni basathu ni buma, jar ni basathu khe labu hi Jisu niha phai dada, bo khlim hi boniha smaba jinis sain ba.

²¹Jisu boniha singba, Ning snadi nangjao ba? Boha boniha thiphin ba, Ebo ani basathu gini khe nini rajiha nini yaoda gede saosi, nini yaosi gede saosi bonsi khamphu mani khlaihi grao ri lah.

²²Jisu thiphin ba, Nisi sainyaba khe nisi tharmaiya. Ang bela ha lingginyaba ha nisi lingphu nang? Bonsi boni ha, Blai nang thi hi thiphin ba.

²³Bo bonsi niha thiba, Ani bela ha nisi lingma ning nangma se; thikhabo, ani yaoda yaosi ha kham mani grao khe ang de rima niya. Bede thikhade, ani Bupha, sere ne salai ri kha, bonthane khlai hi se.

²⁴Yaohon rikphayarao jhi ebo grao khe khna hi bonsi ni khaphlung gini ni basao ha thamsi baigo ba.

²⁵Thikhabo, Jisu de bonsi khe longhi thi ba, Jentailrao ni basao ha bisar khlaiyarao de bonsi ni basao ha gabang ning raja ja re; bonsi ni subung gedebaraobo bonsi ni basao ha hukhum gabang yaowai re thihi nisi tharmai du.

²⁶Thikhabo, nisi ni bising hade olei ja nang niya. Sere nisi ni bising ha subung gedeba jama nangjao du, bo nisi ni dangyasa jahi dongma nang ma se.

²⁷Sere nisi ni bising ha sagangthao jama nangjao du, bo nisi ni leng jahi dongma bo nang ma se.

²⁸Marsi ni Basa de jar khusi dang rijao mane bo phaiya, khusi dang ri mane ode gabang subung khe kho mane se ar jar ni hayu ri mane se bo phai ba.

²⁹Jisu ar boni yaohon rikphayarao Jeriko ni phrang baigoba ha subung buthu gabang ning boni yaohon rikpha ba.

³⁰Muthai gana gini lama bijing ha khamyarao Jisu thangba thihi bonsi khnaba jang, Gabra, David ni basa, jing khe khasao lah, thihi jirikkhao ba.

³¹Boha subung buthu bonsi khe phirik phirik dong mane magna ba; thikhabo, bonsi de Gabra, David ni basa, jing khe khasao lah thihi bol jang bonsi jirikkhao dao ba.

³²Jisu songthao hi bonsi khe long hi thiba, Nisi ni basao ha ang jang snadi dang ma nangjao ba?

³³Bonsi boni ha thiba, Gabra, jing muthai numa nangjao du.

³⁴Odebani Jisu hamsi ning khasaosisi jajao hi bonsi ni muthai khe gidinghaba jang bonsi ni muthai nu lang la kha, odehe bonsi boni yaohon rikpha kha.