Read Dimasa Matthew 22 Bible Online

Matthew 22 - Dimasa bible

Matthew 22

¹Jisu bonsi jang sainlai hi bonsi niha daogari grao thiphin ba.

²Sorgo raji de sereba Raja, boni basa ne khlai hi disingyaba ni mel salaiyaba jang baosi se.

³Disingyaba ni mel ha ji mane khlai hi jama jaoyarao khe long mane khlai hi boni lengrao khe bo haiha ba; thikhabo, bonsi phaima nangjaoya.

⁴Odese, bo jar ni jamayarao niha, Ani mel khe khrip salai blai kha. Ani musu jla buthu ode ani mih jar khrangyaba buthu khe ang sthai hi, khrip salaithar kha, disingyaba ni mel ha ji mane khlai hi phai lah thihi thi mane gibin leng khe bo haiphin haba.

⁵Thikhabo, bonsi musibo baoya hi bonsi degao langla kha. Saoside phadain ha thang la kha, saosi de bephar khlai mane thang la kha.

⁶Gibin subung buthu jakha de boni lengrao khe remhi, bonsi khe laji phnu rihi bonsi sthai kha.

⁷Odebani, Raja thamsi baigo hi, boni siphaiyarao khe haiha dada bo sthaiyarao khe sjam hi, bonsi ni nogor khebo bo saokhrip kha.

⁸Odehe, boni lengrao niha thiba, Disingyaba ni mel de jam kha; thikhabo, jama jaoyarao de ji mane gatha laya.

⁹Odebani, lamayung ha thang hi nisi goronyaba si subung buthu khe disingyaba ni mel ha ji mane labu lah, thihi bo sani ba.

¹⁰Odebani, boni lengrao de baigo lang hi, lamayung buthu ha bonsi thang dada, bonsi nuyaba si khe, subung hamba, subung hamyayarao khebo bojom khlai hi, disingyaba ni mel ha ji mane naorai gablai thar kha.

¹¹Thikhabo, Raja subung longyarao khe nai mane bising hap phaiba ha, disingyaba ni rih phinyayaba subung saosi oraha dongba khe bo nu ba.

¹²Bokhe sing ba, O lugu, snadi jabani ning disingyaba ni rih giri hi eraha hapsing phai ba? Thikhabo, bo subung phirik phirik dong ba.

¹³Odese, Raja jar ni lengrao niha thiba, “Boni yao igah khe khahi, hakhli andar ha danghun khlah, oraha se grahi hathai waihi bo dong ma thihi thiba.”

¹⁴Jisu thi ba, Longjaoyarao de gabang longjao ma, thikhabo saikho jaoyarao de gijisa se ning ja ma.

¹⁵Boha Pharisairao thang hi bo grao thiyaba khe lahi remphu mane khlai hi bonsi sainlai ba.

¹⁶Odehe, bonsi jar ni slingriyarao khe Herod ni dol ni subung buthu niha ebo grao khe thi mane bonsi haiha ba. Slingriyaba, ning gibi subung se; saosi khebo man ridao riyadao jaya thi hi jing tharmai du, ode saosi khebo ning gibin naidaoya.

¹⁷Odebani, ning la bede bao du? Jinthane thi ri. Kaisar niha khajna riba jadu na jaya? thihi bokhe sing ba.

¹⁸Thikhabo, Jisu bonsi ni hamyathai khe tharmai hi bonsi khe thiba, O giriklayarao, sumjabani nisi angkhe nai nai ba?

¹⁹Khajna ni rang khe a ne phnu ri lah. Ode, boni ha aduli labu ba.

²⁰Ebo la sereni saokhuli ode sereni bumu? thihi bonsi khe sing ba.

²¹Kaisar ni thihi bonsi thiphin ba. Jisu bonsi khe thi ba, Ode thikhala Kaisar ni jinis buthu khede Kaisar niha ri lah, Madai ni jinis buthu khede Madai niha ri lah.

²²Ebo grao buthu khe bonsi khnaba ha, bonsi gmanglai ba, ode bokhe dangkhlai lang hi, bonsi thang la kha.

²³Okhali ni basain ha, Saddukairao, baija phinyaba giri thiyarao, boni ha phai ba;

²⁴Bonsi boni ha thiba, Slingriyahsa, Moses thidu, asaba subung basa maiya hi bo thih khade, jar ni daphlung ni bihi khe noh ja hi, jar ni daphlung ne khlai hi bongso thaoma nang du.

²⁵Dei thikha la, jini bising ha khaphlung sni dong. Radaothaoyaba noh jahi bo thih kha, ode boni bongso bumu giri bani jar ni bihi khe buphlung ne noh ja mane bo yaopha lang ba;

²⁶Olei jasosi ning gini gatham ode khaphlung sni sosi olei mai lai ba.

²⁷Bonsi khrip thih tharba ni yaohonha bo masainjikbo thih lang la kha.

²⁸Odebani, baijaphinba ha bo masainjik la sereni bihi ja nang? Bonsi khripbo bokhe noh ja kha.

²⁹Jisu bonsi khe thiphin ba, Madai ni sastro gathar ni grao ode, Madai ni raothai khe nisi tharmaiya bani nisi bao gajai du.

³⁰Thanghi baijaphinba hade dising nang niya kha. Sorgo ha Madai ni deglarao lai ja lang ma thihi nisi mithiya.

³¹Subung githi thanghi baijaphin bani grao ha Madai ning nisi ni rogong ha thiyaba khe nisi phuriya?

³²Ang Abraham ni Madai, Isak ni Madai, ode, Jakob ni Madai se thiyaba khe. Madai de subung githi ni Madai niya, subung gathang ni Madai se.

³³Subung buthu ebo khe khnaba jang, bo grao slingriyaba khe bonsi gmang lai ba.

³⁴Saddukairao khe niyathaiba thihi bonsi khna hi, Pharisairao bojom ja ba,

³⁵Bonsi ni bising ha subung saosi, Dara mithiyaba, bokhe nainai mane khlai hi, singba,

³⁶O Slingriyahsa, Dara graoha la snadi grao riyaba dedaothao? thihi sing ba.

³⁷Jisu thiphin ba, Gabra, nini Madai khe nini khrip khah ni buddi jang, nini khrip bese jang, nini khrip khah ni girikthai jang ning hamjao lah,

³⁸Ebo ning dedaothao grao riyaba ode nangdaothaoyaba grao se.

³⁹Bo jang baosiyaba de ebo se, Ning jar khe hamjaoba lai ning nini noharirao khebo hamjao lah,

⁴⁰Ebo grao riyaba magin ha Dara ni grao ode gorasalirao ni grao khrip dopha thar du.

⁴¹Odehe, Pharisairao khe bonsi bojom jayaba ha, Jisu bonsi khe grao sing ba,

⁴²Krista khe nisi bede bao du, bo sereni basa? Bonsi boni ha thiphin ba, David ni basa.

⁴³Jisu bonsi khe sing ba, Snadi jabani David bese jang bokhe Gabra thihi long ba?

⁴⁴Gabra ning ani Gabra niha Ani yaoda gede kham lah; Nini sotrurao khe nini yapha bakhla ha ang dengya si de.

⁴⁵David ning bokhe Gabra thi kha la, bedehe bo boni basa japhu ma? ode bo thiba.

⁴⁶Saosi bo grao thaisi jahibo bonsi grao thiphin phuya hi, okhali ni phrang de saosi bo gibin grao musi khebo bonsi singraoya kha.