Read Dimasa Matthew 24 Bible Online

Matthew 24 - Dimasa bible

Matthew 24

¹Jisu Madaikhoh ni phrang baigo hi thangba ha, boni yaohon rikphayarao bikhoh khe phnu ri mane khlai hi boni ha phai ba.

²Boha bonsi khe thiba, Ebo buthu khrip khe nu kha na? Gibi jang ang nisi khe thi du, ebo hathan ni phrang longthai thaisi jahibo gibin longthai ni basao ha dong nang niya; khrip sbaijao thar ma se.

³Odehe, Oliv hading ha bo khamba ha boni yaohon rikphayarao boni ha bonsi ning phai hi sing ba, Ebo buthu la bakhali japhai ma? Ning phaiphin mane ode habsao jamthao khali snadi sin ja ma? Jinthane thi ri lah.

⁴Jisu bonsi khe thiphin ba, Saosi jang bo thokhi jaoya mane khlai hi girik lah.

⁵Gabang subung, Krista de ang ning thihi ani bumu lahi bonsi phai ma, ode, gabang ning subung bonsi thokhi ma se.

⁶Jbah ni grao ode jbah ni grao gublungyaba khe nisi khna hi, nisi gmang giji jaya mane khlai hi girik lah. Bede thikhade bo buthu bubli de sophai ma ning; thikhabo, ebo bubli de jam mani khlai hi de niya kho.

⁷Bede thikhade, gibin jadi jang jadi jbah ja ma, raji jang raji jbah ja ma, hathan gibin gibin ha asari galai ma, ode banglama phai ma se.

⁸Ebo khrip de sao gojenba ha saba lai ja ma se.

⁹Boha de dukhu ri mane khlai hi nisi khe bonsi rem ri ma, ode nisi khe bonsi sthai ma; ani bumu ni khlai hi khrip jadi nisi khe jajaoya ja ma se.

¹⁰Boha de gabang subung khajao ma, saosi khe saosi rem ri lai ma, ode saosi jang saosi nisi jajaoya ja lai ma se.

¹¹Ode, mosol gorasali baigo phai ma, ode gabang subung khe bonsi thokhi ma se.

¹²Phap bangdao bani khlai hi gabang subung ni hamjaoma khasaoma magain lang la ma se.

¹³Thikhabo, sere jamthaoba sosi dukhu khahlao phu du, bo se ning sogo jao ma.

¹⁴Ode, ebo raji ni hamba graojma khe khrip jadi ni sakhi ja mane khlai hi khrip habsao ha sainthi ma, boni yaohon ha se jamthaoyaba bubli sophai ma.

¹⁵Odebani, rege rege dukhu riyaba ni balam ha gorasali Daniel thilangba hathan gathar ha song hi nisi nukha ning (bokhe phuri hi boni ortho khe buji la thing).

¹⁶Boha Juda raji ha dongyarao de hading ha khailang la thing;

¹⁷Nohkhim basao ha dongyaba de jar ni noh ni jinis khe selai mane da nakhai thing.

¹⁸Phadain ha dongyababo jar ni rih khe se mane khlai hi da phaiphin thing.

¹⁹Okhali ni basain hade sao khonggin jayarao ode nana gili bamyarao ni bubain risi ma se.

²⁰Nisi khailang mani bubli de maising ar lenggo basain ha sophaiya mane khlai hi bi lah.

²¹Bede thikhade, bo bubli ha hamsi ning dukhu hadi ja ma. Oleiyaba dukhu de phirthi sangsai jenba ni phrang jaba giri, jaba bo asaba khali habo japhin nang niya kha.

²²Bo basain buthu khe songthedao riya thikhade subung musi dara jangbo hamhi go nang niya; thikhabo saikho jaoyarao ni khlai hide bo buthu bubli khe songthe ri ma se.

²³Bo bubli ha sereba nisi khe thi ma, Nai lah, Krista de eraha ning dong na oraha ning dong thihi bonsi thi khabo da lon lah.

²⁴Bede thikhade, mosol Krista ode mosol gorasalirao bonsi baigo phu ma; blai khade saikho jaoyarao khebo bonsi thokhi phu mane khlai hi sin ode gmang thaosisi khusi gedeba buthu khebo bonsi dang phnu ma se.

²⁵Khna lah, ang nisi khe thida du.

²⁶Odebani, nisi niha, Nai lah, hajengling ha dong, thihi nisi khe bonsi thi khade da baigo, khutha bising ha dong, thihi bonsi nisi khe thi khabo nisi da lon.

²⁷Bede thikhala, nokhasao gurjliba ha sainja ni phrang baigo hi sain jroba sosi bo jnaba lai Marsi ni Basa phaiphinba hade olei ning ja ma se.

²⁸Asaba habo mih githi dongyaba ha naowai buthubo bojom ja ma se.

²⁹Olei dukhu hadi ni basain jamkha ning sain andar ja ma, ode, dain bo jnaya ma, nokhasao ni phrang sathrai galai ma, ode nokhasao ni raothai buthu jang smao ma se.

³⁰Boha se, Marsi ni Basa ni sin khe nokhasao ha nu nang; ode, phirthi ni khrip jadi khahbao do nang, ode Marsi ni Basa de jar ni raothai ode gmang thaosisi muima jang baosi nokhasao jimi ni basao ha phaiba khe nu nang.

³¹Bibul khurang jang baosi hokhlai hi jar ni deglarao bo haiha nang. Ode, bonsi nokhasao ni sainja gede ni phrang sain jroba sosi mulug grongbri ni phrang saikho jaoyarao khe bo bojom khlai ma se.

³²Odebani, thaikhrao phang ni daogari grao khe sling lah. Boni bedeb baigo hi, boni balai ridim phai kha ning, jalang jama jakha thihi nisi tharmai du.

³³Olei jasosi ning nisibo khrip bo buthu khe nisi nukha ning, bo phaiphin mane sampha kha, derga rogong ha dong thihi tharmai lah.

³⁴Gibi jang ang nisi khe thi du, khrip ebo buthu phura sotharya side duha ni jug ni subung buthu jam nang niya.

³⁵Phirthi jang nokhasao jam nang, thikhabo ani grao de jam nang niya.

³⁶Bo basain jang bubli de Bupha khe garhi de saosibo, sorgo ni deglaraobo, Basabo bonsi tharmaiya.

³⁷Odehe, Noah thang hi dongba ha bede jaba olei jasosi ning Marsi ni Basa phaiphinba habo ja ma se.

³⁸Noah ni basain ha dih lim mani sagang hade Noah rung ha hapsingba basain sosi, bonsi jiba lingba, masainjik miyah noh jaba;

³⁹Dih lim hi bonsi langjao tharya side, bonsi musibo tharmaiya. Marsi ni Basa phaiphinba habo olei ning ja ma se.

⁴⁰Boha de, phadain ha subung gini dong ma, saosi khe langla ma, saosi khede galang ma se.

⁴¹Masainjik gini mairong honyaba ha mairong honhi dong ma, saosi khe langla ma, saosi khede galang ma se.

⁴²Odebani, smao hi dong lah, bakhali nisi ni Gabra phai nang, bokhe nisi tharmaiya.

⁴³Thikhabo, ebo khe tharmai lah; makhao khao mane phaiba ha noh bubra tharmai kha la, boni noh khe hamsisi raokhi ma se. Ode, jar ni noh khe gablaphu ri nang niya.

⁴⁴Odebani, nisi bo salai hi dong lah, nisi salaiya hi dongba bubli hase Marsi ni Basa de phai ma.

⁴⁵Leng, lonjaoma gnang girikyaba, jar ni bubra bubli ha bonsi ni phantha khe ron ri mane khlai hi boni nokhor buthu ni basao ha hoja slam jaoyaba la sere ja nang?

⁴⁶Bubra phaiba ha leng olei khusi dangba khe bo nuphai khade boni khophal hambi!

⁴⁷Gibi jang ang nisi khe thidu, boni ha khrip dongyaba somphoti ni basao ha bokhe hoja slam ma se.

⁴⁸Thikhabo, hamyayaba leng de boni khah ha, Ani bubra de srap phai nang niya thi re,

⁴⁹Jar ni lengrao khe dohi suhi subung ju baolarao niha jidu ling du thikhade,

⁵⁰Bo leng ni bubra bo salaiya hi dongba basain bubli khe mithiya hi bo phai nang,

⁵¹Odehe, bokhe gojo gin so nang, giriklaiyarao ni phantha jang baosi phantha ri nang, oraha se gra hi hathai wai hi dong ma.