Read Dimasa Matthew 26 Bible Online

Matthew 26 - Dimasa bible

Matthew 26

¹Jisu khrip ebo grao khe thiblai hi, boni yaohon rikphayarao niha bo thi ba,

²Nokha sain gini ni yaohon ha baiglai busu sophai ma ja kha thihi nisi tharmai du. Odehe Marsi ni Basa khe dikthai mane khlai hi bonsi rem rima se.

³Odese, Jonthai dedaothao Kaiapha thijaoyaba ni barising ha jonthaimarao ode noleikhor ni khraorao bojom ja ba;

⁴Jisu khe srap remhi sthai mane khlai hi bonsi bisar khlai ba.

⁵Bonsi thiba, Mel jayaba ni bising hade da ja thing, niyakhade noleikhor ha nam khormu ja ma se.

⁶Bethani nolei ni Simon, khunthi jayaba ni noh ha Jisu dong ba,

⁷Bo khalai khamba ha masainjik saosi alabastar bithol ha thao midimyaba ode dam dudao thaoyaba khe labu hi boni ha phai ba, boha bo boni bokhro ha lukhru ba.

⁸Boni yaohon rikphayarao bokhe nuhi thamsi baigo ba.

⁹Snadi jabani haglai biglai khma ba? Ebo thao midim khe dam gabang jang phain hi suliyayarao ne riba se ham nang mu, thihi bonsi thiba.

¹⁰Thikhabo, Jisu bo grao khe khna hi bonsi khe thi ba, Bo masainjik khe snadi jabani nisi gdang sdang khlai ba? Ani basao ha hamba khusi bo dang ba se.

¹¹Suliyayarao de nalaibo nisi jang baosi dongma se thi; thikhabo, angde nisi niha da nang sosi ang dongsong ma niya.

¹²Ebo thao bahai midimyaba khe ani saomang ha lukhruyaba de angkhe phip mane salai mani khlai hi bo dangba se.

¹³Gibi jang ang nisi khe thi du, habsao khrip ha asaba habo ebo hamba graojma khe sainthiyaba ha ebo masainjik khusi dangyaba khebo wainsosong mane khlai hi bonsi thipha lang ma se.

¹⁴Boni yaohon hade jhigin ni bising ha subung saosi, Juda Iskariot thijaoyaba, jonthaimarao niha bo thang hi,

¹⁵Bokhe nisine ang rem rikha la anthane nisi snadi ri ma? thihi sing ba. Boha bonsi bonthane rang bagrai tho thimjhi suhi ri kha.

¹⁶Odehe, bo bubli ni phrang bokhe rem ri mane bo hajora smai kha.

¹⁷Humao giriyaba hon ni mel basain sagangthao ha jar ni yaohon rikphayarao Jisu niha phai hi, Baiglai busu mel phai mane khlai hi ning ji mane braha salai ma? thihi bokhe sing ba.

¹⁸Bo thiphin ba, Nogor ha asaba niha thang hi, boni ha Slingriyaba thidu, ani bubli sampha kha, ani yaohon rikphayarao jang nini noh ha baiglai busu ni mel jing phai ma thihi bo khe thi lah.

¹⁹Odehe, Jisu bonsi khe saniba lai ning yaohon rikphayarao bonsi dang kha; ode, baiglai busu ji mane bonsi salai kha.

²⁰Sainbli japhai hi Jisu jar ni rikphayarao jhigin jang baosi makham khalai kham ba.

²¹Bonsi jisaiba ha bo thi ba, Gibi jang ang nisi khe thi du, nisi ni bising ha subung saosi ang khe rem rima se.

²²Boha bonsi hamsi ning waimu nang hi boni ha, Gabra, ang na? thihi bonsi singlai ba.

²³Jisu thiphin ba, Ang jang khopra ha hon jem ji phalaiyaba ning ang khe rem ri ma se.

²⁴Marsi ni Basa de boni balam ha bede reb du, olei ning bo thangma se; thikhabo, Marsi ni Basa khe rem riyaba subung ni khlai hi bubain risi bi! Bo subung de hajaiyaba se bonthane khlai hi de hamdao kha mu!

²⁵Odehe, bokhe rem riyaba Juda thiba, O Rabbi, bo la ang ning?. Jisu thiphin ba, Ning ning thila kha.

²⁶Bonsi jisaiba ha Jisu hon phersi lahi, bo hamthai ri rihi, bo hon khe saso ba; ode, rikphayarao ne bo rihi thiba, Ebo khe laha hi ji lah, ebode ani bahain se.

²⁷Odehe, bela laha hi, khajama ni grao thi hi, bonsi ne bo rihi thi ba, Nisi khrip bo ling lah.

²⁸Ebo ani thijao se, phaphirao goma mai mane khlai hi, ode gabang subung ne khlai hi baigo mane hanggaiyaba grao se.

²⁹Thikhabo, ang nisi khe thi du, ani bupha ni raji ha nisi jang ang gadain grep ni bidi khe ling phinya si ang ling phin nang niya kha.

³⁰Odehe, bonsi rajab hi Oliv hading ha bonsi thang la kha.

³¹Odehe, Jisu bonsi khe thiba, Dini hor ha nisi khripbo ani balam ni grao ha nisi khah ha jajaoya hi dongthar ma. Melma raokhiyaba ang su nang, ode melma buthude khaidra ma se thihi rebyaba lai.

³²Thikhabo, ang baijaphinba ni yaohon ha Galili raji ha nisi tha sagang hi ang thang ma.

³³Thikhabo, Peter de boni ha thi ba, Bonsi khripbo nini balam ni grao ha khah ha jajaoya jahi dong la khabo, ang de khah ha jajaoya hi dongya.

³⁴Jisu bokhe thiphin ba, Gibi jang ang ning khe thi du, Dini hor ha ning daono gisia sani sagang haning ning angkhe phintham niya ma se.

³⁵Peter boni ha thi ba, Ning thiyaba ha thima nangla khabo, ningkhe ang niya nang niya. Olei jasosi ning yaohon rikphayarao khripbo thi ba.

³⁶Boni yaohon ha, Jisu jar ni yaohon rikphayarao jang baosi jahi hathan masi, Gethsemane thiyaba ha bonsi sohi kha; ode, bo jar ni rikphayarao niha thiba, Ho gora ha thang hi ang Madai biba ni bising ha nisi eraha ning kham hi dong lah.

³⁷Peter jang Zebedai ni basathu gini khe bo langpha hi, bo hamsi ning waimu jang dukhu nang ba.

³⁸Odehe, bonsi khe thiba, Ani khahsu ha hamsi ning khah dukhu nang du; thima sosi ja du. Eraha ning dong hi angkhe raokhi lah.

³⁹Odehe, bo khaisa sagang gede thangsing daohi yasgu thuhi, O Abai, blai khade ebo bela khe ani phrang disai ri khade ham nang mu; thikhabo, ani baothai lai niya hi, nini baothai lai ja thing, thihi bo biba.

⁴⁰Odehe, yaohon rikphayarao niha phaiba ha, bonsi thu hi dongba khe bo nuphai hi Peter khe thiba, Hain, nisi la gonthasi bo thuya hi angkhe raokhi phuya na?

⁴¹Naigrik ha nisi galaiya mane khlai hi smao hi ning bi dada dong lah. Bese ni khlai hi bokhe blai du, thikhabo saomang de raoya ja du.

⁴²Bo phigin thang hi biphin ba, O Abai, ang lingginyaba bela khe ani phrang disai phuya khade, nini baothai lai ja thing.

⁴³Odehe, bo phaiphinba ha, bonsi thu hi dongba khe nuphin phai ba; bede thikhade bonsi hamsi ning mudri phai kha.

⁴⁴Odehe, bonsi khe garlang hi thangphin ba, ode bo phintham habo sagang ha thiba lai ning bo biphin ba.

⁴⁵Boni yaohon ha, jar ni yaohon rikphayarao niha bo phaiphin hi bonsi khe thi ba, Duha de thu hi lenggo lah. Nai lah, bubli de sophai kha. Marsi ni Basa de subung hamyayarao ni yao ha rem rijao ma kha.

⁴⁶Baija lah, jing thangla nang. Nai lah, angkhe rem riginyaba gabasi sophai kha.

⁴⁷Odehe, bo sainthi saiba ha ning Juda, jhigin ni bising ha dongyaba subung saosi sophai kha. Ode bo jang baosi jonthaimarao, khraorao ni phrang subung buthu hamsi ning bang hi, seng jang daobu dihi bonsi sophai kha.

⁴⁸Bonsi ne rem riginyaba sin ne khlai hi bo thida ba, Ang sere khe khudim du bo ning ja kha, rem lah.

⁴⁹Juda Jisu niha srap thang hi, Juthai, Rabbi thihi bo khe hamsi ning khudim kha.

⁵⁰Boha, Jisu bokhe thi ba, Lugu, snadi khusi dang mane khlai hi ning phai ba, bo khe duha dang lah. Boha ning bonsi boni gabasi phai hi yao khe remhi rem kha.

⁵¹Jisu ni dol buthu ni bising ha saoside yao phlao hi, jar ni seng khe sikhon hi, Jonthaima ni leng khe dainha hi, boni khmao khe dainkhao khla ba.

⁵²Boha Jisu bokhe thi ba, Nini seng khe jar ni dengthan ha dengphin lah. Bede thikhade seng yaowaiyarao khripbo seng jang ning bonsi thih ma se.

⁵³Duhabo deglarao rjingdo phantha jhigin tha bangdao hi anthane hai riha mane khlai hi ani bupha niha khainsu phu nang niya thi hi nisi angkhe bao ba?

⁵⁴Thikhabo, olei khainsu kha la, Madai ni sastro, elei japhai ginyaba grao la bede gibi japhu ma?

⁵⁵Odebani, Jisu subung buthu khe thiba, Seng buthu khe, daobu buthu khe labu hi makhao khe rem mane phaiba lai angkhe rem mane khlai hi nisi phaiba na? Madai ni bikhoh ha nalaibo slingri hi ang kham re, boha nisi ang khe remya lao.

⁵⁶Thikhabo, gorasalirao ni grao buthu phura gibi ja mane khlai hi olei japhai ba se. Odebani, yaohon rikphayarao de bokhe dangkhlai hi bonsi khai thar langla kha.

⁵⁷Jisu khe remyarao de, Jonthai dedaothaoyaba Kaiapha ni noh ha, Dara khe slingriyarao ode khraorao bojom jayaba ha bokhe bonsi lang kha.

⁵⁸Thikhabo, Peter de gajain ni phrang bo jang yaohon rikpha hi Jonthai dedaothaoyaba ni barising ni hakhli sosi bo hapsing hi, bokhe naithao mane khlai hi dangyasarao jang baosi bo khampha hi ba.

⁵⁹Odehe, bokhe bonsi sthai phu mane khlai hi Jonthaimarao ode Bisardarrao khripbo Jisu ni gajai khe mosol sakhi ne bonsi smai ba.

⁶⁰Mosol sakhi gabang phai lakhabo bonsi maiya. Yaohonthao ha subung gini phai hi,

⁶¹ede thiba, “Ebo subung de Madai ni bikhoh khe ruhi, nokha saintham ni bising ha ang dangphu du thidu”, thihi bonsi thiba.

⁶²Odebani, Jonthai dedaothaoyaba songkhu hi boni ha thiba, Musi khebo ning thiphinya na? Ebo buthu ning khe gajai ni sakhi riba la snadi ja ba? Thikhabo Jisu de phirik phirik dong ba.

⁶³Odehe, Jonthai dedaothaoyaba de boniha thi ba, Madai gathang ni bumu jang ning khe jo du, Krista, Madai ni Basa la ning ning? A ne thi ri lah.

⁶⁴Jisu boni ha thiba, Ang de ning thiyaba ning. Bo niya khabo ang nisi khe thi du, eboni yaohon ha Marsi ni Basa de jar ni raothai jang Madai ni yaoda ha kham hi nokhasao ni jimi sao ha phaiba khe nisi nu nang.

⁶⁵Odehe, Jonthai dedaothaoyaba jar ni gainsari buthu khe jekhao hi thi ba, Ebo subung de Madai khe siji du. Duha jinthane snadi sakhi gibin nangma kho? Nai lah, Madai khe bo sijiyaba khe nisi khna kha. Bede nisi bao du?

⁶⁶Bonsi thiphin ba, Bo thih ja re.

⁶⁷Odehe, boni mukhang ha khudi thuphra ba, ode yao jang bonsi yaosim ri ba;

⁶⁸Gejesi jakha de, Ning Krista, sere ning khe su ba? Ani ha thi lah thihi bonsi su ba.

⁶⁹Boha, Peter de noh barising ni hakhli ha bo kham ba, ode, mala saosi lengjik boni ha phai hi thiba, Ningbo, Jisu, Galili raji ni subung niha dongyaba se.

⁷⁰Thikhabo, bo khrip subungrao ni sagang ha niya ba, Ning grao thiyaba khe ang tharmaiya, thi hi thiba.

⁷¹Hakhli ni khorong daoglap ha bo baigoba ha lengjik gibin mala bokhe nuhi, oraha dongyarao niha thi ba, Ebo subungbo Jisu Nazareth ni subung jang baosi dongphayaba se.

⁷²Boha, Bo subung khe ang tharmaiya thi hi bo niya phin ba.

⁷³Khaisa bubli ni yaohon ha boni gabasi songyarao Peter niha phai hi thiba, Ning bo bonsi ni bising ha dongphayaba ning ning, nini grao ha tharmai du, ode bonsi thi ba.

⁷⁴Boha, Bo subung khe ang tharmaiya thihi sari dada bo smai dang ba, ode boha ning daono gisi kha.

⁷⁵Odehe, Peter khe Jisu daono gisi mani sagang ha ning phintham angkhe niya ma thihi bo thiyaba grao khe wainso phin kha. Ode, baigo hi gabang khah bai hi bo gra kha.