Read Dimasa Matthew 28 Bible Online

Matthew 28 - Dimasa bible

Matthew 28

¹Nokha sain sni ni basain sagangthao ha, munu sringdi sringdi japhai hi, Mari Magdalin ode gibin Mari jang mangkhlong khe naihi mane khlai hi bonsi thang ba.

²Boha, hamsi ning banglama raohi smao phai ba, odehe Gabra ni saosi degla sorgo ni phrang akhai buhi, bo longthai khe mokhon saihi, boni basao ha kham ba.

³Boni saogari ni dongthai jakha de nokhasao gurjliba lai se, boni gainsari bo borop lai phu du.

⁴Bokhe bonsi khin bani mangkhlong raokhiyarao de lup lup mao hi subung githi lai bonsi jahi dong ba.

⁵Sorgo ni degla masainjikrao jang sainlai hi, bonsi khe thiba, Niside da khin, Jisu khe kross ha bonsi dikphayaba khe nisi smai ba thi hi ang tharmai du!

⁶Eraha bo giri kha, bo jar thiba lai jasosi ning, bo thang hi baijaphin kha. Boni thuyam khe nai la ha.

⁷Duha srap thang hi, boni yaohon rikphayarao niha, Subung githi ni bising ni phrang bo thang hi baijaphin kha. Nai lah, Galili raji ha nisi tha sagang hi bo thang du. Oraha bokhe nisi nuhi nang, thi hi sainthi tha. Nai lah, ang nisi khe thi du.

⁸Odehe, khin hi hamsi ning khaja dada, mangkhlong ni phrang srap bonsi thang hi boni yaohon rikphayarao niha sainthi mani khlai hi khai phalang ba.

⁹Srap khlai hi Jisu bonsi khe goron hi, Juthai, nisi niha shanti dong thing thi hi thilai ba. Odehe, bonside boni igah khe remhi khlim ba.

¹⁰Jisu bonsi khe thiba, Da khin, thang hi Galili raji ha thang mane khlai hi ani daphlungrao khe sainthi tha; oraha bonsi angkhe nu nang.

¹¹Masainjikrao thangba ha, mangkhlong raokhiyaba siphaiya gejesi de nogor ha hap hi, khrip dongthai khe Jonthaimarao niha sainthi thar ba.

¹²Boha khraorao jang baosi masi jahi bonsi singlai dada ode siphaiyarao ne gabang bonsi rang ri ba.

¹³“‘Hor ha jing thuba ha boni rikphayarao phai hi bokhe bonsi khaolang kha’ thi lah,” thi hi sani ba.

¹⁴Bisardar ebo grao khe khna khade, bo khe jing bujai hi nisi khe khah waimu ha galai riya hi slam nang ode bonsi thi ba.

¹⁵Bonsi rang khe laha hi ning thima saniba lai ning bonsi thi kha; odebani duha sosibo bo grao khe Judarao ni bising ha bonsi thi phalang du.

¹⁶Thikhabo, yaohon rikphayarao jhiseh buthu Galili raji ni hading ha Jisu thangma saniyaba ha bonsi thang kha.

¹⁷Boha bokhe nu dada bonsi khlim ba, thikhabo sereba sereba lonsoya ja ba.

¹⁸Jisu bonsi ni gabasi ha phai hi, bonsi khe thiba, Sorgo jang phirthi ni khrip khemotha khe aniha rithar kha.

¹⁹Odebani, ning thang hi khrip jadi ni subung buthu khe yaohon rikya slam lah, ode bonsi khe Bupha, Basa, Bese Gathar ni bumu jang baptisma ri lah.

²⁰Nisi ne ang grao riyaba khrip khe mani mane khlai hi sling ri lah. Ode, nai lah, ang thaoglao hapsao jamba sosibo nisi niha ang dongpha ma se.