Read Dimasa Matthew 3 Bible Online

Matthew 3 - Dimasa bible

Matthew 3

¹Bo bubli ha Baptisma riyaba Johan phai hi Juda raji ni hajengling ha graojma sainthi ba.

²Bo thi ba, Khah phin lah, sorgo raji sampha kha,

³Gorasali Isai thidayaba subung Johan ning ja kha, “Hajengling ha subung saosi ni khurang khna nang Gabra ni lama khe slam lah Boni lama buthu khe beleng ri lah”.

⁴Johan mihhajeng ni bikhim khe rih phin hi, boni jengkhong ha migur ni jengsdu kha ba, ode boni jimu-lingmu de hagra ni guyung jang beredih se.

⁵Boha Jerusalem ni subung, Juda raji ni subung, ode Jordan haphai ni khrip subungbo baigo hi boni ha phai ba.

⁶Jar jar ni phap gajai khe phla hi, Jordan dihbu ha, boni ha phai hi khrip baptisma la ba.

⁷Thikhabo, jekhali Johan Pharisai jang Saddukairao baptisma lama ne gabang phaiba khe nu hi bo bonsi khe thi ba, Nisi jbu ni jadirao, thamsi phaiginyaba ni phrang golang mane sere nisi khe sainthi ba?

⁸Odebani, khah phin bani bumu khe lahi bathai thai lah.

⁹Jing de Abraham ni sarik-surik se, thi hi nisi da bao lah. Madai de ebo longthai buthu khebo Abraham ni sarik-surik ne khlai hi song ri phu du thi hi ang nisi khe thi du.

¹⁰Duha ni phrang khrip bongphang ni khitha ha rowa deng kha; odebani, khrip bongphang hamsi bathai thaiya khade bokhali wai ha dangsing ma se.

¹¹Ang nisi khe khah slaima ne dih jang baptisma ri du. Thikhabo, ani yaohon ha phaiginyaba de anthane dedao. Ang boni yaphadap ni wadu khe khru manebo gathaya. Bo nisi khe Bese Gathar jang ar wai jang baptisma ri nang.

¹²Boni sangkhon boni yao ha ning dong; ar bo jar ning maijibu khe ragao sisi khlai hi sipkhao nang. Odehe, jar ni mai khe maikhoh ha bojom khlai nang, maijibu mudi khe thaoglao ni waikhor ha saokhrip nang.

¹³Bo bubli ha Jisu boni ha baptisma lama ne khlai hi Galili raji ni phrang Jordan dihbu ha phai ba.

¹⁴Thikhabo, Johan thi ba, Ning se angkhe baptisma ri ma nang ma mu, ning se ani ha phai ba na? thi hi bo magna ma bao ba.

¹⁵Thikhabo, Jisu boni ha thi ba, Duha mani lah, elei dormo khusi khe phura khlai bade jinthane hamba se, thi hi bo thiphin ba. Odehe bo mani kha.

¹⁶Odehe, Jisu baptisma la ha hi, dih ni phrang baigo ba jang nai lah, bonthane khlai hi sorgo khru ba, ode, Madai ni bese daothu lai akhai bu hi boni phakhrong ha baphai ba khe nu ba.

¹⁷Odehe, sorgo ni phrang khurang si, Ebo de ani basa hamdaothao ar ang khaja daothaoyaba se, thi hi khna ba.