Read Dimasa Matthew 4 Bible Online

Matthew 4 - Dimasa bible

Matthew 4

¹Boni yaohon ha Jisu khe Soithan ni naigrik ha hajengling ha bese langjao hi dong ba.

²Odehe, basain jang bisagin bohor jang bisagin jiya-lingya bani yaohon ha bo hukhri jao kha.

³Boha Soithan boni ha phai hi thi ba, Ning Madai ni basa ning thikhade, ebo longthai buthu khe hon jamane hukhum ri lah.

⁴Thikhabo, Jisu thiphin ba, Subung de hon jang mang mang de thangya, Madai ni khuh ha khrip grao baigoyaba jang se thang ba, thi hi reb du.

⁵Boni yaohon ha bokhe nolei gathar ha lang hi Madaikhoh ni nohkhu ha song rihi, boni ha thi ba,

⁶Ning Madai ni basa ning thikhade, ora ni phrang galai lah. Nini balam ha deglarao khe bo hukhum ri nang Ode bonsi ni yao jang ning khe bamkhu nang, Ode niyakha de, nini igah bumai nang ma se, thi hi Madai ni laisi ha reb du.

⁷Jisu bokhe thiphin ba, Gabra, nini Madai khe da nainai, thi hi bo reb du.

⁸Odehe, Soithan hading judao thaoyaba ha bokhe langphin hi, habsao ni khrip muima khe phnu hahi thi ba,

⁹Ning yasgu thu hi ang khe khlim khade ebo khrip khe ninthane ang rithar nang.

¹⁰Boha Jisu thiphin ba, Soithan, thang lah, Gabra, nini Madai khe khlim hi bokhe se ning mani lah.

¹¹Odehe, Soithan haiger lang kha, ar deglarao phai hi bokhe naiso-nuso kha.

¹²Odehe, Johan remjao kha thi hi Jisu khna ba jang Galili raji ha bo thangla ba.

¹³Odehe, Nazareth khe dangkhlai hi Kapernaum dihkharnai dergong ha Zebulun jang Napthali haphai ha bo donghi ba.

¹⁴Gorasali Isai grao thiyaba phura gibi jathar mani khlai hi olei japhai ba,

¹⁵Zebulun ar Napthali ni raji, Dihkharnai ni lama ha, Jordan dikhong nar, Jentailrao ni Galili!

¹⁶Andar ha kham hi dongyarao Gabang jnama khe nu nang.

¹⁷Bo bubli ni phrang se Jisu grao baipha langhi thi ba, Khah phin lah, sorgo raji sampha kha, thi hi bo grao thijen ba.

¹⁸Galili dihkharnai dergong ha bo daopha lang baha, boha Simon (Peter thiyaba) ode boni buphlung Andri, bonsi khaphlung gini khe jeh saiba nu ba; bonsi nah remyaba ning.

¹⁹Jisu bonsi niha thi ba, Ani yaohon ha phai lah, ang nisi khe subung remyaba slam nang.

²⁰Boha ning bonsi jeh dangkhlai langhi boni yaohon rikpha langla kha.

²¹Oraha ni phrang thangba ha gibin daphlung gini Zebedai-ni basa Jakob jang boni buphlung Johan khe bonsi ni bupha Zebedai ni rung ha bonsi ni jeh buthu khe slamba nuhi bonsi khe Jisu long ba.

²²Boha ning, bupha jang rung khe dangkhlai langhi bonsi boni yaohon rikpha langla kha.

²³Odehe, Jisu bikhoh ni noh buthu ha sling rihi, Raji ni graojma hamba khe sainthi ba, ode subung buthu ni bising ha jadi jadi jathai ar jadi jadi raoyayaba khrip khe ham ri hi, Galili raji ni khrip ha bo thangpha lang ba.

²⁴Odehe, Suria raji khrip ha boni graojma gublung thar ba. Odebani, khrip subung limyaba ar jadi jadi sathai sayarao, sgainjik gajaoyarao, murkhi jayarao, adur jayarao khe boni ha labu ba, ode, bonsi khe bo ham rithar ba.

²⁵Galili raji ni phrang, Dekapoli nogor ni phrang, Jerusalem ni phrang, Judai raji ni phrang, ode Jordan nar ni phrang subung buthu gabang yaohon rikpha ba.