Read Dimasa Matthew 6 Bible Online

Matthew 6 - Dimasa bible

Matthew 6

¹Nisi hamba khusi dangyaba buthu khe, subung ni sagang ha bonsi nu mane dangya mane khlai hi girik lah; ode niya khade, nisi ni bupha sorgo ha dongyaba niha yaosandi mai nang niya.

²Odebani, ning malai ne yaosandi riba ha, subung giriklaiyarao jang bakhan rijao mane bojom jayaba hathan buthu ha ode, daoglap buthu ha bonsi riba lai, nini sagang ha bibul da dam ri.

³Ang gibi jang nisi khe thidu, bonsi ni yaosandi khe bonsi mai blai kha. Thikhabo, ning de malai ne yaosandi riyaba khe malai tharmaiya mane khlai hi nini yaoda ni yao jang yaosandi riyaba khe yaosi ni yao jang thar da maijao thing.

⁴Odese, nini bupha phirik phirik ning khe naiyaba hamthai ri ma.

⁵Odehe, nisi biba ha subung giriklaiyarao lai nisi da bih, bonsi de malai nu mane khlai hi bojom jayaba hathan buthu ha derga kholei ni gejer ha song hi bima nangjao re. Ang nisi khe thi du, bonsi ni yaosandi khe bonsi mai blai kha.

⁶Thikhabo, ning de biba ha nini noh bising ha hap dada, nini derga khe phung hi, nini bupha niha phirik phirik bi lah. Odese, nini bupha phirik phirik naiyaba ning khe hamthai ri ma.

⁷Nisi biba ha Jentailrao lai haglai-biglai da bi, bede thikhade bonsi budu glao bi khase bonsi ni bithai khe khna ma thihi lon du.

⁸Odebani, bonsi lai da ja; bode nisi sain mani sagang ha ning nisi ni bupha de snadi khe nang du, bo tharmai du.

⁹Odebani, nisi ede bi lah: Sorgo ni jini Bupha Nini bumu gathar man ja thing

¹⁰Nini raji sophai thing Nini nangjaoma sorgo ha dangba lai ning Phirthi ni subungbo dang thing.

¹¹Dini jine nalai ni jimu ri

¹²Malai ni gajai khe jing map khlaiba lai ning Jini gajai khebo ning map khlai.

¹³Phap ni naigrik ha jing khe da langpha Hamya ni phrang jing khe sogo lah. (Sereba rebyaba ha elei dong: Bede thikhala, raji, raothai ar muima, thaoglao sosi nini ning. Amen).

¹⁴Subung ni gajai buthu khe nisi map khlai kha se, nisi ni bupha sorgo ha dongyaba nisi khe map khlai ma.

¹⁵Thikhabo, subung ni gajai buthu khe nisi map khlaiya thikhade, nisi ni buphabo nisi ni gajai buthu khe map khlai nang niya.

¹⁶Nisi jiya hi hoh khongja dong khabo, subung giriklaiyarao lai mukhang mao hi da phnu. Bonsi de subung ni muh ha hoh khongja nujao mane bonsi ni mukhang khe bonsi sim ri re. Gibi jang ang nisi khe thi du, bonsi ni yaosandi khe bonsi mai thar kha.

¹⁷Nisi hoh khongja dong khade, mukhang suhi, nisi ni khro ha thao do lah;

¹⁸Odese, nini bupha phirik phirik naiyaba ni muh khe gar hide subung ni muh ha hoh khongja dongba thihi nujao nang niya. Odese, nini bupha phirik phirik naiyaba ninthane hamthai ri ma.

¹⁹Phirthi ha yung ji phuyaba ar haro remyaba, makhaorao gabla phu hi khao phuyaba hathan ha don buthu khe nisi jar ne khlai hi bojom da khlai.

²⁰Thikhabo, sorgo ha, yung jiphuyayaba ar haro rem phuyayaba ar makhaorao gabla phuhi khao phuyayaba ha nisi jar ne khlai hi don buthu khe bojom khlai lah;

²¹Bede thikhade nini don dongyaba ha ning nisi ni khah bo dong ma se.

²²Saomang ni jnama de muthai se. Nini muthai jna khade nini saomang khrip jna ma se.

²³Thikhabo, nini muthai hamya khade khrip nini saomang andar ja ma se; odebani, nini saomang bising ha jnama andar jakha la, hamsi ning andar ja nang.

²⁴Saosi bo hoja gini ni khusi dangpha lai phuya; bede thikhala saosi hamjao khade saosi hamjaoya ja ma se; niya khala, saosi hamjao khade, saosi naisle ma se; Madai jang rang masi khusi dangpha laiba jaya.

²⁵Odebani, ang nisi khe thi du, snadi khe ang jima-lingma thihi nisi ni hayu ni grao ha, ar, snadi khe ang gainma-phinma thi hi saomang ni grao ha nisi khah waimu da nang. Jiba thane hayu se muilo jadaoya? Gainsari thane saomang bo muilo jadaoya?

²⁶Nokhasao ni dao buthu khe naiha lah, mai gaijiya, rababo rajiya; bonsi maikho habo bojom khlaiya, thikhabo, nisi ni bupha sorgo ha dongyaba bonsi khe khrang du. Nisi la bonsi thane gabang muilo jadaoya?

²⁷Ode, nisi ni bising ha khah waimu nang hi jar jar juba ni gede musi lai judao ri laphu du?

²⁸Odehe, gainsari ni basao ha snadi jabani nisi khah waimu nang ba? Phorong midi khim baryaba ni dethai khe hamsisi naihi bao lah. Bonsi khusi dangya ar khun bo phreya,

²⁹thikhabo, ang nisi khe thi du, Raja Solomonbo boni majangma khrip ha sajai khali, ebo phorong midi khim bar barsi laibo soya.

³⁰Odebani, hah ni sam, dini thang du, dakhna thih lang laginyaba khe ning Madai olei sosi bo sajai kha la, O nisi lonma bangyayarao, nisine bo gainsari ri nang niya?

³¹Odebani, snadi khe jing jima? Snadi khe jing lingma? Snadi khe jing phin hi dong ma? thihi waimu da nang. Jentailrao khrip oleiyaba khe smai re.

³²Ebo buthu khrip khe nisi nang du thi hi nisi ni bupha sorgo ha dongyaba tharmai du.

³³Odebani, sagangthao ha Madai ni raji jang boni dormo khe smaida lah, odese bo buthu khrip jinis khe nisi ne ri ma.

³⁴Odebani, dakhna ni khlai hi waimu da nang, bede thikhade dakhna ni basain ha jar ni waimu jar ning khlai la nang. Sainsi ni khlai hi sainsi dukhu khlai kha ning ja kha.