Read Dimasa Matthew 7 Bible Online

Matthew 7 - Dimasa bible

Matthew 7

¹Ning malai khe gajai ha da ri, ning khebo gajai rima se.

²Bede thikhade ning bede malai khe gajai riba, olei ning ningbo gajai ri jaoma se, ar ning snadi jang suba, bo suyaba jang ning ningbo sujao ma se.

³Snadi jabani jar ni muthai ha muphin gedeba dongyaba khe nuya hi malai ni muthai ha muphin basasa dongyaba khe ning nu ba?

⁴Ning jar ni muthai ha ning muphin gedeba dongyaba khe nuya hi nini daphlung ni muthai ha muphin dongyaba khe ‘a ne khaikho ri lah’ thi hi ning bede thiphu ba?

⁵O griklaiyaba, sagang ha nini muthai ni muphin khe khaikho da lah, odese nini daphlung ni muthai ni phrang muphin khaikho phu ma.

⁶Gathar jinis khe sisa ne da ri, hono ni sagang habo guibi longthai khe da ri; boni igah bakhla ha gasep hi meser moso waikhli hi hamya khlai ma se.

⁷Sain lah, odese ninthane ri ma, smai lah, odese nisi mai ma;

⁸Derga dho lah, nisi ne khuru ri nang. Sere sain du, bo mai nang; sere smai du, bo nu nang; sere derga khe dho du, bo khuru rijao ma se.

⁹Niya khala, nisi ni bising ha jar ni basa hon sainjiba ha longthai khe riyaba sere dong?

¹⁰Niya khala, nah sainjiba ha sere jbu khe ri ba?

¹¹Odehe, nisi subung phaphi ning jar ni basathu ne hamba jinis riba ring kha la, nisi ni bupha sorgo ha dongyaba la boni ha sainyarao ne bo hamba jinis ri nang niya?

¹²Odebani, khrip jadi malai nisi ni basao ha bonsi dang ma nangjaoba lai, malai ni basao habo nisi dang lah. Bede thikhade ebo ning dara ode gorasalirao ni grao ja kha.

¹³Derga khasiba ha hap lah. Jamyaba ha thangyaba dergade de bi, boni lamabo war bi. Ojang gede thangyababo gabang bang bi.

¹⁴Hayu ni lama ha thangyaba dergade khasi bi, boni lama bo gepheyaba se. Bokhe nuyarao bo gijisa se ning.

¹⁵Gorasali mosol ni phrang girik hi dong lah, bo buthu de melma bugur khe phin hi nisi niha phai re. Thikhabo bonsi ni bising hade rasa haslarao lai se.

¹⁶Bonsi khe bonsi ni dongthai ha ning nisi tharmai nang. Busuh gnang biding ni bedep ha grep bathai thai re? Busuh gnang biding ha thaikhrao thai re?

¹⁷Olei jasosi ning bongphang hamba de boni bathai ham re; thikhabo, bongphang hamyayaba de boni bathai bo hamya re.

¹⁸Bongphang hamba de boni bathai hamya jaya. Bongphang hamyayaba de boni bathaibo hamya re.

¹⁹Khrip bongphang hamsi bathai thaiya khade dainphai hi, wai ha dangsing jao re.

²⁰Odebani, bonsi khe bonsi ni dongthai ha ning nisi tharmai nang.

²¹Gabra, Gabra thi hi se ning ang khe jirikyaba de sorgo raji ha hap nang niya, thikhabo ani bupha sorgo ha dongyaba ni nangjaothai lai dangyarao de hap ma se.

²²Okhali ni basain hade gabang subung Gabra, Gabra, nini bumu jang jing grao sainthi ba, nini bumu jang jing sgain madai rik hun ba, nini bumu jang gmangthao sisiyaba khusi khe jing dang ba, bonsi ode thi ma se.

²³Boha de, ‘Nisi phap gajai dangyarao, ani phrang gajain thang lah, nisi khe ang tharmaiya’ thi hi thijao ma se.

²⁴Sere ani ebo grao buthu khe khna hi mani du, subung girikyaba, longthai basao ha noh dangyaba jang suhi grao thi du.

²⁵Hadi hahi, dih de nang, ode bar sip hi bo noh khe smao nang; thikhabo, longthai basao ha se dang bani bo noh bailangya.

²⁶Odehe, sere ani ebo grao khe khna hi maniya, bode subung gibir, hajeng basao ha noh dangyaba jang baosi se thi hi suhi thi du.

²⁷Hadi bo ha nang, dih bo de nang, ode, bar bo sip pha hi smao kha ning, bo noh de baihi hamsi ning hamya lang la ma se.

²⁸Jisu ebo grao buthu khe thiblai ba jang subung buthu bo grao slingriyaba khe bonsi gabang gmang lai ba.

²⁹Bede thikhade, Dara Slingriyarao lai baosi niya hi, bo hukhum gnang bubra lai se sling ri ba.