Read Dimasa Matthew 8 Bible Online

Matthew 8 - Dimasa bible

Matthew 8

¹Jisu hading ni phrang akhaiba jang gabang subung boni yaohon rikpha ba.

²Odehe, subung saosi khunthi jayaba boniha phai hi thi ba, Gabra, ning nangjao khade, ang khe ragao ri phu du, thi hi bo khlim ba.

³Jisu yao phlao hi bo khe remhi thi ba, Ang nangjao du dou. Boha ning bo khunthi jayaba ragao lang la kha.

⁴Odehe, Jisu boni ha thiba, ‘Saosi niha bo thiya mane khlai hi girik lah. Thikhabo, Jonthaima niha thang hi phnu lah. Moses ne rimane khlai hi saikhoyaba buthu khe yaopha lah. Bede thikhade, subung buthu hamsisi mithi phuma ne.’

⁵Odehe, bo Kapernaum ha hapsing ba. Boha siphaiya rjasi ni hoja saosi boniha phaihi thiba,

⁶Gabra, ani ansa adur jahi noh ha yam ha thuhi gabang sajao hi dong, thihi boniha khainsu ba.

⁷Jisu thiphin ba, Ang phaihi bokhe ham ri nang.

⁸Siphaiya rjasi ni hoja thiphin ba, O Gabra, ani noh bising ha ning phai mane ang gathaya dou; grao se ning thi lah, ani ansa ham lang la nang.

⁹Ang bo malai ni hukhum ha se dong ba, ani bakhla ha siphaiyarao dong. Saosi subung khe, Ning thang lah, ang thikha de, bo thang la re; malai khebo, phai thihi ang thikha de, bo phai re. Ani leng niha bo, ebo khe dang, thihi ang thikha de, bo dang re, thi hi bo grao thiphin ba.

¹⁰Jisu ebo grao buthu khe khnaba jang hamsi ning gmang hi bo jang rikphayarao niha bo thi ba, Gibi jang ang nisi khe thidu, Israelrao ni bising habo elei lonma raoyaba khe ang nuya kho.

¹¹Ang nisi khe thi du, sainja sain jroba ni phrang gabang subung phai hi, Abraham, Isak ar Jakob niha phai hi, sorgo raji ha kham nang;

¹²Thikhabo, raji ni basathu de raji andar ha rik hon jao hi dong nang. Oraha de hathai waihi grahi dongma se, ode bo thi ba.

¹³Odehe, Jisu siphaiya rjasi ni hoja niha thi ba, Thang la ga, ning lonba lai ning nini basao ha sophai thing. Odehe, ansa de bo bubli ha ning ham lang la kha.

¹⁴Jisu Peter ni noh ha phaiba ha, boni busuma limhi thuyam ha thuhi dongba khe bo nu kha.

¹⁵Odebani, boni yao khe remba jang boni limthai de ham lang la kha, ode, bo baija hi bo khe naiso-nuso la kha.

¹⁶Odehe, sainbli japhaiba ha, gabang subung sgain madai gajaoyarao khe Jisu niha bonsi labu hi phai ba. Odehe, grao jang bo sgain madai buthu khe rik hunhi limyarao khrip khebo bo ham riba:

¹⁷Gorasali Isai jar thi langyaba grao gibi ja mane khlai hi elei japhu ba, Jini raoyayaba khe jar sao ha lahi, jini gilim gasa buthu khe hor la kha, thiyaba gibi ja phai kha.

¹⁸Jisu boni sersi giding subung bangba khe nuhi kharnai ojang nar ha thang mane khlai hi bo sani ba.

¹⁹Odehe, dara slingriyaba saosi boni ha phai hi boni ha, Slingriyaba, ning braha thang du, ning jang baosi ang bo thang pha ma, ode bo thiba.

²⁰Jisu boni ha thiphin ba, Mosrong nibo longkhor dong, daonibo bithip dong; thikhabo Marsi ni Basa ni bokhro deng mani hathan giri.

²¹Boha slingriyarao ni bising ha subung gibin phai hi thi ba, Gabra, sagang ha ani bupha khe phipda mane khlai hi ang khe haiha lah.

²²Thikhabo, bo boni ha thiphin ba, Ang jang rikpha lah, subung githi khe bonsi ni subung githi ning phip la thing.

²³Odehe, Jisu rung ha ga ba, jar ni yaohon rikphayaraobo bo jang rikpha ba.

²⁴Srap khlai hi wari ha baryungma hamsi ning raohi sip ba. Odebani, dithon jang rung gilikdi gilikdi ja ba; bo de thuhi dong ba.

²⁵Odehe, bo jang rikphayarao boni ha thang hi bo khe masa hi thiba, Gabra, jing khe sogo lah, jing jam thar ma ja kha, thihi bonsi thi ba.

²⁶Jisu bonsi khe thi ba, O lonma bangyayarao, snadi jabani nisi khin ba? Odehe, bo baija hi, bar jang wari khe bo jo ba, ode phirik phirik thao lang ba.

²⁷Subung buthu hamsi ning gmang ba, Ebo subung la snadi ni subung? Bar jang wari sosibo boni grao khe mani du lao? thi hi bonsi thi ba.

²⁸Odehe, wari ni ojang nar ha Gadarin raji ha bo sohiba ha sgainjik gajaoyaba subung gini mangkhlong ni phrang baigo buhi goron ba, bonsi elei hamya du, bo lama ha saosi bo thang phuya.

²⁹Odehe, bonsi jirikkhao hi thi ba, O Madai ni basa, ning jing khe snadi khusi nangjao ba? Jing khe dukhu ri mane khlai hi bubli ni sagang ha ning phai ba?

³⁰Boha, ora ni phrang khaisa thangdao hi hono buthu gabang dong ba.

³¹Odehe, sgain madai buthu thi ba, Ning jing khe rik khlai ma thikha de, hono buthu ni bising ha jing khe haiha lah, thihi bonsi boniha khainsu ba.

³²Boha, bonsi khe thi ba, Thang la ga. Odebani bonsi baigo hi, hono buthu ni bising ha bonsi hap ba. Ode, hono buthu khrip brub brub khai khlai lang hi, wari ha galaising hi bonsi dih ha thih thar kha.

³³Odehe, hono khrangyarao khailang hi nogor ha bonsi thang hi, sgain madai jang gajaoyarao ni basao ha sophaiyaba buthu khebo, khrip bonsi sainthi kha.

³⁴Odehe, noleisi jang Jisu khe goron mani khlai hi bonsi baigo bu ba. Odehe, bo khe bonsi buba jang bonsi ni raji ni phrang baigo mane khlai hi bonsi bo khe khainsu ba.