Read Dimasa Matthew 9 Bible Online

Matthew 9 - Dimasa bible

Matthew 9

¹Odehe, Jisu rung ha gahi wari khe bailang da da jar ni dongthan nolei ha bo sohi kha.

²Odehe, saosi adur jayaba khe thuyam ha thu rihi boni ha bonsi bainbu ba. Jisu bonsi ni lomna khe nuhi, adur jayaba khe thi ba, Ani basa, santi jang dong lah, nini phap buthu khe map ja kha.

³Odehe, Dara slingriyarao gejesi bonsi ni khah ha bao ba, Ebo subung de Madai khe siji du, bonsi ode thi ba.

⁴Jisu bonsi ni khah ha baoyaba khe tharmai hi thi ba, Nisi snadi jabani khah ha hamya bao ba?

⁵Nini phap map ja kha thiyaba jang baija hi igah jang hem hi thang lah beleyaba thiba lai dao?

⁶Asaba bo ja thing, habsao ha Marsi ni Basa niha ning phap map khlai phuyaba raothai dong thihi nisi tharmai mane khlai hi, (ode, adur jayaba khe thi ba), Baija hi nini thuyam khe sugu hi, ning jar ni noh ha thang lah.

⁷Odehe, baija hi bo jar ni noh ha thang la kha.

⁸Odehe, subung buthu bo khe nuhi bonsi khin ba. Subung buthu niha olei hukhum riyaba Madai khe bonsi bakhan khlai kha.

⁹Jisu oraha ni phrang thangba ha khajna dengthan hathan ha khamyaba subung saosi, sere boni bumu Matthew khe nuhi bo thi ba, Ani yaohon rikpha lah, odehe, bo baija hi boni yaohon rikpha lang ba.

¹⁰Odehe, noh ha makham khalai kham ba ha, khajna khrangyarao jang subung phaphirao gabang phai ba, odehe, Jisu jang boni rikphayarao khalai khampha lai ba.

¹¹Pharisairao bo khe nu dada, boni rikphayarao khe thi ba, Snadi jabani nisi ni slingriyah la khajna khrangyarao ar subung phaphirao jang jipha lai ba? bonsi thi ba.

¹²Jisu ebo grao khe khna hi bonsi khe thi ba, Subung bol raoyarao ni khlai hide daktor nangya, subung limyarao ni khlai hi se nang ba.

¹³Odebani, ‘bandai khe ang nangjaoya, khasaoma khe ang nangjao du’ thiyaba grao khe, thang hi boni balam ha sling lah. Dormo subung ni khlai hi ang phaiya, subung phaphirao khe long mane se ang phai ba, thihi nisi tharmai lah.

¹⁴Boha Johan-ni rikphayarao Jisu niha phai hi thi ba, Snadi jabani jing jang Pharisai rao elei makham jiya hi hoh khongja dong du, thikhabo nini yaohon rikphayarao la hoh khongja dongya ba? thihi bonsi sing ba.

¹⁵Jisu bonsi khe thiphin ba, Damanjik khe langginyarao niha daman dongdu si, damanjik khe langginyarao dukhu nang re. Thikhabo, boni basai khe bonsi ni phrang langla mani basain sophai nang, boha se bonsi hoh khongja dong ma.

¹⁶Odehe, saosi bo gajam rih giji ha gadain rih khe supha laiya, supha laikha de rih siksi hi jigaodao ma se.

¹⁷Saosi bo grep bidi gadain khe migur ni phonto gajam ha lusingya. Ode niyakha de migur phonto hamya ja ma se; grep bidi gadain khede migur gadain ni phonto buthu ha lusing ma nang du.

¹⁸Ebo buthu grao khe bonsi niha thisai baha, hoja saosi phai hi bokhe khlim ba, Ani bisik duha thih ba; thikhabo, ning phai hi boni basao ha yao deng kha ning bo thang phin nang, thihi bo thi ba.

¹⁹Odebani, Jisu baija hi bo thang ba; ode bo jang boni rikphayarao bo thang pha ba.

²⁰Odehe, masainjik saosi nokha maithai jhigin bithi thaoyayaba Jisu ni yaohon ha phai hi boni rih bergong khe rem phai ba.

²¹Boni rih bergong khe se ning remba maikha de ang ham lang la nang, thihi boni khah ha bao ba.

²²Jisu naiphin baha bo khe nuhi thi ba, Ani bisik, khah santi jang dong lah, nini lonma jang ning ham kha, odehe bo masainjik de boha ning ham lang la kha.

²³Jisu gedeba ni noh ha sohi dada damyarao suyarao gabang subung ho jaba khe bo nuhi ba.

²⁴Boha Jisu thi ba, baji ha baigo, ebo ansa de thihya, thuba se. Boha bonsi bo khe minithai ba.

²⁵Thikhabo subung buthu baigo bani yaohonha bo hapsing hi, boni yao khe rem ba, ode bo ansa thihyaba baija lang la kha.

²⁶Bo bubli ni phrang bo raji ni khrip ha boni graojma gublung thar ba.

²⁷Odehe, Jisu oraha ni phrang thang laba ha, muthai gana gini, David ni basa, jing khe khasao thihi jirikkhao hi yaohon rikpha ba.

²⁸Jisu noh bising ha hap khali ha, muthai ganarao boni ha phai ba. Bonsi khe bo singba, Nisi ham riphu nang thi hi nisi lon du? thiba. Bonsi boni ha thiphin ba, Gabra, jing lon du.

²⁹Jisu bonsi ni muthai buthu khe dopha hi thiba, Nisi lon ba lai ning nisi ni basao ha ja thing.

³⁰Odehe, bonsi ni muthai nu lang la kha. Ode, Jisu bonsi khe thiba, Saosi bo tharmaiya mane khlai hi girik lah, ode thihi bo magna ba.

³¹Thikhabo, bonsi ora ni phrang baigoba jang bo raji ni khrip ha bonsi thi phlung thar ba.

³²Odehe, bonsi baji ha baigo saiba ha sgainjik gajao hi grao jophuyayaba saosi boni ha labu ba.

³³Bo sgain madai khe rik hunba jang grao jophuyayaba grao jophu lang la kha. Odehe, subung buthu gabang gmang laiba, Israelrao ni bising hade elei nuba giri kho, thi hi bonsi thi ba.

³⁴Thikhabo, Pharisairao de ebode sgain madai gedeba ni juruma jang se sgain madai khe rik hun ba, thi hi bonsi thi ba.

³⁵Odehe, Jisu bonsi ni bikho buthu ha sling ri hi, Raji ni hamba graojma khe sainthi ba; ode khrip limyarao, sayarao khe bo ham ri hi, khrip noleima, noleisa habo thangpha lang ba.

³⁶Subung bangba khe nukhali ha melma buthu khe naisoyaba giri lai dukhu jang ejang ojang bonsi dong bani bo hamsi ning khasao sisi jajao ba.

³⁷Odebani, Jisu jar ni rikphayarao khe thi ba, Mai ra mane gabang ning bang bi; thikhabo khusi dangyarao bangya.

³⁸Odebani, hadi bubra niha mai ra mane khlai hi khusi dangyarao khe haiha mane khlai hi khainsu lah.