Read Dimasa Marka 11 Bible Online

Marka 11 - Dimasa bible

Marka 11

¹Jerusalem rogongha bo naiso phai dada, Oliv hading ha Bethphage jang Bethani nolei rogong ha bonsi sohi dada, boni yaohon rikphayarao ni bising ha subung gini khe bo haiha ba.

²Bonsi gini khe thi ba, Nisi ni sagang gede dongyaba noleiha thang lah. Nisi oraha sohi ba jang mihleng ni basa, boni basaoha saosi bo gaba giriyaba khahi dongba khe nisi nu nang, bokhe khruhi labu lah.

³Ode, malai nisi khe snadi jabani khru ba thihi sing khade, Gabra nangjao du thihi thi lah, ar sangga ning digar phaiphin nang, thi ha lah.

⁴Odehe, bonsi gini thangba de daoglap baji nolei bising ni lama ha mihleng basa khe khahi deng ba nuhi kha, ode bonsi khru kha.

⁵Oraha songhi dongyarao ni bisingha saosi sing ba, Snadi jabani mihleng basa khe khruba?

⁶Jisu bonsi gini khe saniba lai thiphin ba, odebani bonsi haiha kha.

⁷Odehe, mihleng basa khe siklang hi Jisu niha lang ba. Ode, mihleng basa ni basao ha rih yen rihi Jisu kham ba.

⁸Gabang subung buthu, jarni rih khe lama ha yenpha lang ba. Ode, gibin subung buthu phadain ni sam bedeb dainhi yenpha lang ba.

⁹Odehe, sagang gede thangyarao ar yaohon gede rikphayarao, Hosanna, Gabrani bumu jang phaiyaba de bakhan ja thing!

¹⁰Jini bupha David ni raji phaiginyaba man jahi dong thing! Judaothao ha Hosanna! thihi jirikkhao du.

¹¹Odehe, Jisu Jerusalem ha sohi dada, bikhoh ha thang ba. Ode bo khrip gede naiding ba. Thikhabo, sainbli ja kha bani boni yaohon rikphayarao jhigin khe langpha hi Bethani ha thang ba.

¹²Boni dakhna ni basain ha Bethani ni phrang baigo langba ha, Jisu makham hukhri jao ba.

¹³Bo gajain ni phrang thaikhrao phang, balai gnang khe nubani, bathai mai nang thihi bo smai mane thang ba. Thikhabo, balai khe garhi de gibin musi khebo nuya. Bede thikhade bathai thaiblibo jaya kho.

¹⁴Odebani Jisu thaikhrao phang khe thi ba, Musi khalibo, duha ni phrang saosibo nini bathai da maiji thing. Ar boni yaohon rikphayarao bokhe khna kha.

¹⁵Bonsi Jerusalem ha sophai baha, Jisu bikhoh ni bisingha hap ba. Ode, oraha ni jinis phainyarao baraiyarao khe rikkhlai thar ba ar rang slaiyarao ni basang jang daophri phainyarao ni khamthan khe khublip thar ri ba.

¹⁶Okhali ni phrang saosi khebo jinis phain ma labu riya kha.

¹⁷Odehe, bo bonsi khe sling riba, Ani nohde khrip jadini khlai hi bih mani noh thijao ma thihi sastro ha reb du; thikhabo, nisi la makhaorao ni longkhip slam ba kha.

¹⁸Jonthaima jang Dara khe slingriyarao ebo grao khe khnahi, Jisukhe sthai mane balam smai ba. Thikhabo bonsi bokhe khin ba, bede thikhade, subung buthu boni slingrithai khe gmang ba.

¹⁹Sainbli japhaiba ha, Jisu jang boni yaohon rikphayarao nogor ni phrang thang la kha.

²⁰Boni dakhna ni phorong nokha nai hi, lamaha bonsi hem langbaha, thaikhrao phang ni yader sosi rainlangba khe bonsi nu ba.

²¹Peter wainso hi boniha thi ba, Nai sang, Rabbi, ning sariyaba thaikhrao phang de rain kha.

²²Jisu thiphin ba, Madai khe lon lah.

²³Ang gibi jang nisikhe thi du, asababo jarni khah ha lonsoya jayahi ebo hading khe degao langhi sagor ha galai sing mane thi re thikhade, olei ning jama se.

²⁴Odebani, ang nisi khe thi du, asaba khe nisi Madai bihi sain re thikhade, mai kha thihi bao lah, odese mai ma.

²⁵Ar nisi bi mane songbaha malai asababo nisini basao ha gajai riyaba khe map khlai lah, ode ning nisini bupha sorgoha dongyababo nisini gajai khe map khlai nang.

²⁶“Nisibo malai ni gajai khe map khlaiya khade, sorgoni nisini buphabo nisini gajai khebo map khlai nang niya,” thihi bo thi ba.

²⁷Jerusalem ha bonsi phaiphin ba. Jisu bikhoh ni bisingha daoding baha, Jonthaimarao jang Dara khe slingriyarao ar Khraorao boni ha phaihi bokhe sing ba,

²⁸Ebo khusi buthu khe dang mane hukhum sere ninthane ri ba?

²⁹Jisu bonsi khe thiphin ba, Angbo nisi khe grao masi sing nang, nisi thiphin phu re thikhade, sereni hukhum jang ang khusi dang ba, bokhe ang thi nang.

³⁰Baptisma riyaba Johan la sorgo ni phrang na subung ni phrang angkhe thiphin sang?

³¹Bonsi jarni bisingha sainlai ba. Sorgo ni phrang jing thi khade, bo snadi jabani boni grao khe lonyaba? thi bu nang,

³²Subung ni phrang jing thi khade jing subung buthu khe khin du; bede thikhade Johan khe khrip subungbo gibi gorasali thihi mani ba.

³³Odebani Jisu khe thiphin ba, Jing mithiya. Jisu bonsi khe thiphin ba, Ode thikhade angbo sereni hukhum jang ebo khusi buthu khe dang ba, ang sainthiya.