Read Dimasa Marka 12 Bible Online

Marka 12 - Dimasa bible

Marka 12

¹Odehe, Jisu bonsi niha daogari jang grao sainthi ba, Subung saosi grep ni bari dang ba. Ar sersi giding bari khe khading hi grep sep mane hakhorbo khu ba.

²Grep min dada, khao mane basain sophaiba ha, jarni phantha khe mai mane bo jarni leng saosi khe khusi dangyarao niha haiha ba.

³Khusi dangyarao bo leng khe rem dada, dohi suhi yao khongja jang haiphin ha ba.

⁴Bubra gibin leng khe phin haiphin ha ba. Khusi dangyarao boni bokhro ha do dada bokhe laji phnu ba.

⁵Bubra gibin leng khe haiha ba. Bonsi bokhe sthai ba, ode gabang lengraoni basao habo olei ning dang ba, ode gejesi khe doba suba ar sthai ba.

⁶Yaohonthao ha, boni mayani basa saosi, mang mang se ning dong si ba. Ani basa khede bonsi man khlai nang thihi bao dada bokhe haiha ba.

⁷Thikhabo, khusi dangyarao sainlai ba. Bubrani basa ebo ning don maiginyaba se, bokhe jing sthaihi bari khe jini ja thar la nang.

⁸Odehe, bokhe sthai dada, grep bari ni bajiha dangkhlai ba.

⁹“Bonsi olei khlai kha la, barini bubra phai hi snadi khlai nang?” ode thi dada Jisu bonsi khe thi ba, Bubra phai dada subung buthu khe sthaihi bo bari khe gibin khusi dangyarao niha nepha ma se.

¹⁰Ebo Madai ni laisi ni graokhe nisi phuriya? Noh dangyarao nangjaoya hi dangkhlaiya ba longthai de nang daothaoyaba longthai ja kha.

¹¹Ebo ning Gabra dangyaba khusi Jini khlaihi de gmang thaosisiyaba se.

¹²Bo daogari grao khe Judarao ni hojarao khna hi bonsini balam ha thiyaba thihi tharmai ba, ode Jisukhe rem ma bao ba. Thikhabo, bonsi subung githim laiyarao khe khin ba. Odebani bokhe garhi thang la kha.

¹³Grao jobaha remphu mani khlaihi gejesi Pharisairao ar Herod ni dol ni subung gejesi Jisu niha haiha ba.

¹⁴Bonsi boniha phaihi thi ba, Slingriyah, ningde gibi subung se. Saosi khebo bera khlaiya thihi jing tharmai du, ode saosi khebo dangkhlai daoya. Madaini grao khe hamsisi sling ri du. Jingkhe thi lah, Kaisar niha khajna riba la Dara ha dong na giri? Jing rima na riya?

¹⁵Bonsini khah nainaiba khe Jisu tharmai hi bonsi khe thiphin ba, Snadi jabani angkhe khah nainai ba? Aduli bakhrai khe labuhi angkhe phnu sang.

¹⁶Ode, bonsi aduli labu ba. Jisu bonsi khe sing ba, Ebo la sereni saogari ar sereni bumu? Kaisar ni bonsi thiphin ba.

¹⁷Odebani Jisu bonsi khe thiphin ba, Olei jakha de, Kaisarni khede Kaisar ne ri lah, ar Madaini khe Madai ne ri lah. Ar bonsi Jisukhe hamsi ning gmang kha.

¹⁸Boha, gejesi Saddukairao, subung thihba ni yaohonha baijaphinba giri thiyarao, Jisu niha phaihi bokhe thi ba,

¹⁹“Slingriyah, subung asababo basa bisik maiyahi thih re thikha la, boni buphlung boni bihih khe noh jama nang ma, odehe, bo boni bada ne khlai hi ansarao mai ri nang thihi Moses jinthane dara masi reb hi ri ba.

²⁰Khaphlung sni dong ba. Bonsini bisingha raodao thaoyaba noh ja dada, basa bisik maiyahi thih kha.

²¹Gididaoyaba bo boni bihih khe noh ja ba. Bobo basa bisik maiyahi thih kha. Bo tha gididaoyaba bo olei ning ja ba.

²²Ode, bonsi khrip khaphlung snibo bo masainjik jang noh jahi, sasik maiyahi thih thar kha, ar yaohonthao ha bo masainjik bo thih kha.

²³Ode thikhala baija phinbani basain ha sereni bihih ja nang? Khaphlung sni khripbo bokhe noh ja kha.”

²⁴Jisu bonsi khe thiphin ba, Nisini baothai de bao gajai se. Madaini laisini grao khe ar Madaini raothai khe nisi mithiya bani se.

²⁵Subung githirao baijaphinba hade sorgoni deglarao lai bonsi ja nang, noh ja nang niya kha.

²⁶Ode, githirao baijaphin bani grao hade, Moses ni laisi ha suphrip bejeng ha jingyaba waislai ni grao khe nisi phuriya? Ang ning Abraham ni Madai, Isak ni Madai ar Jakob ni Madai thihi sainlaiyaba rebba dong.

²⁷Bo ning thanghi dongyarao ni Madai se, githirao ni Madai niya. Nisi de bao gajai ba se!

²⁸Dara khe slingriyaba saosi bonsi grao sainlaiba khe khna hi bo oraha dongba. Ar Saddukairao khe ragaosisi khlai hi thiphinba khe nu ba, ode bo Jisu niha phai dada bokhe sing ba, Dara disa ni bisingha nangdao thaoyaba dara snadi?

²⁹Jisu bokhe thiphin ba, Khrip tha muima jadao thaoyaba de ebo se: O Israelrao, khna lah, Gabra jini Madai de Gabra masi se ning.

³⁰Ning nini khah muh jang, nini bese jang, nini khahsu jang, nini raothai jang, nini Gabra Madai khe hamjao ma nang du.

³¹Boni yaohonha de, ning jarkhe hamjao ba lai ning, nini noharirao khebo hamjao lah. Ebo thane grao riyaba dedaohi gibin giri kha.

³²Dara khe slingriyah Jisukhe thi ba, Slingriyah, ning gibi ning thi kha! Ning thiba lai ning Gabra khe ning Madai se, bokhe garhide ar gibin Madai giri.

³³Odebani subung de Madai khe khah jang muh jang, khahsu jang, raothai jang, hamjao ma nang re. Ode jar khe hamjao ba lai ning jarni noharirao khebo hamjao ma nang du. Daomi jang gibin gibin dara jang Madai huba thane ebo dara magin khe mani ba nangdaothao.

³⁴Odebani bo girik hi thiphinba khe Jisu tharmai hi boniha thi ba, Madaini raji ni phrang ning de gabang jainya. Eboni yaohon hade, Jisukhe gibin grao saosibo sing raoya kha.

³⁵Jisu Madaikhoh ha sling ribaha bonsi khe sing ba, Messiah David ni basa se thihi Dara slingriyarao bede thiphu ba?

³⁶Bese Gathar jang David grao johi thi ba, Gabra, ani Gabra niha thi ba, nini sotrurao khe nini igah ni bakhla ha ang dengya side, ning ani yaoda gede kham lah,

³⁷David jar ning bokhe Gabra thihi long ba, ode thikhala bedehe Messia David ni basa japhu ma kho? Gabang subung Jisu ni grao khe khaja hi khna ba.

³⁸Bo bonsi khe sling ribaha bonsi khe thi ba, Dara slingriyarao ni phrang girik lah. Bonsi sola galao galao thuhi daobai ma nangjao re, ar hathai ha man khlai jaoma nangjao re.

³⁹Ode, bonsi sunagog buthu ni melha bo khamthan hamdao ha kham ma nangjao re;

⁴⁰Bonsi, banjikrao ni rang khe ji re, ode subung buthu khe thokhi mane budu galao Madai bi re. Bonsi hamyadao hi saja mai ma se!

⁴¹Odehe, Jisu Madai khoh ha rang dengyaba khaojeb gabasi ha khamba ha subung buthu oraha khrangphain riba khe bo nuba. Gnangrao gabang khrangphain ri ba.

⁴²Boha, banjik dukhisa saosi phaihi paisa magin dangsing ba.

⁴³Jisu boni yaohon rikphayarao khe longthim hi thi ba, Ang nisikhe thi du, khrip thane ebo banjik dukhisa bangdao hi dangsing kha.

⁴⁴Bede thikhade gibin subung buthu de, bonsi niha gabang dongyaba ni phrang se ri ba. Thikhabo bode dukhisa jakhabo, thanghi dongmane boniha dongyaba si khe rithar ba.