Read Dimasa Marka 14 Bible Online

Marka 14 - Dimasa bible

Marka 14

¹Baiglaini mel ar humao giriyaba honni melni sain gin sagang ni basain ha, Jonthaimarao ar Dara khe slingriyarao Jisu khe phirik phirik remhi sthai mane lama smai ba.

²Bonsi thi ba, Mel basain hade da ja thing, niyakhala, subung buthu nam khlai la phu re.

³Bethani nolei ha Jisu khunthi jayaba subung saosi, Simon ni noh ha makham jihi kham ba. Masainjik saosi thao midim dam duyaba alabastar bithol gablai si labu hi phai ba. Bo bithol khe dokhrip dada thao midim khe Jisu ni bokhro ha lukhru ba.

⁴Thikhabo, oraha dongyarao gejesi thamsi baigohi thi lai ba, Snadi jabani bo thao midim khe khma ba?

⁵Aduli rjatham thane bangdao hi phain dada dukhirao ne riphu nang mu, thihi boni basaoha bonsi berlai ba.

⁶Thikhabo, Jisu bonsi khe thi ba, Bokhe musibo da thi. Snadi jabani nisi bokhe yesisi dukhu ri ba? Bo ani basao ha gibi ar majang sisi khusi khe ning dang ba se.

⁷Dukhi sarao de nalaibo nisi niha dong nang, nisi nangba ha bonsi khe juru phu du. Thikhabo, ang la nalai bo nisi niha dong nang niya.

⁸Bode jar dangphuba lai dang la kha. Ani saomang phip mane thao huda ba se.

⁹Odebani, ang gibi khe nisi niha thi du, khrip habsao ha hamba graojma khe braha sainthi re, bo masainjik dangyaba khusi khe bo wainso mane sainthi nang.

¹⁰Juda Iskariot, Jisu ni yaohon rikphayarao jhigin ni bisingha saosi, Jisu khe rem rimane Jonthairao niha thang ba.

¹¹Boni grao khe khna hi bonsi khaja ba. Odebani bonsi bone rang rimane grao hanggai ba. Odehe, Juda Jisu khe bonsi niha yaopha mane hajora smai kha.

¹²Humao giriyayaba Baiglai Mel ni basain sagangthao ha, Jisu ni yaohon rikphayarao bokhe sing ba, Jing braha thanghi jinthane Baiglai ni Mel salai ma ning nangjao du.

¹³Odehe, Jisu bonsini bisingha subung gini khe haihahi bonsi khe thi ba, Nisi nogorha thangba ha, subung saosi dihdig ha dih labuba khe goron nang. Boni yaohon rikpha lah,

¹⁴ode bo hapyaba noh ha hap hi noh ni bubra niha edehe thi lah, Slingriyah thi ba, ‘ang jang ani rikphayarao Baiglai ni Mel jhiginyaba noh ni khutha braha dong ba?’

¹⁵Odehe, bo ning nisi ne basaothao ni khutha gedeba khe salaihi dengyaba khe nisi ne phnu nang. Oraha nisi jinthane khrip khebo jimane salai lah.

¹⁶Ode rikphaya gini baigo langhi thang dada nogor ha hap hi kha. Jisu bonsi niha sainthiba lai lai khripbo bonsi nuhiba ar oraha bonsi Baiglai ni Mel salai kha.

¹⁷Sainbli jaba ha, Jisu jarni yaohon rikphayarao jang sophai kha.

¹⁸Odehe bonsi khalai khamlaiba ha, Jisu bonsi khe thi ba, Gibi jang ang nisi khe thi du, nisi ni bising ha saosi ang jang jiphayaba angkhe rem rima.

¹⁹Odebani, yaohon rikphayarao waimu nang hi saosi saosi khlai hi, Ang la niya na? thihi bokhe sing ba.

²⁰Jisu bonsi khe thiphin ba, Nisi ni bising ha saosi ang jang khopra masi ha khalai jiphayaba ja nang.

²¹Marsini Basa de Madai ni laisi ha rebba lai ning thangma se. Thikhabo, Marsini Basa khe rem riyaba de bislei boni khlaihi de bubain risi nang. Boni khlai hide hajaiyayaba se hamdao mu.

²²Odehe, bonsi jilai saiba ha Jisu hon khe laha hi hamthai ri dada sbai hi sbai hi boni yaohon rikphayarao ne ri ba, ode bo bonsi khe thi ba, Ebo ning ani saomang, laha hi ji lah.

²³Odehe, bo bela khe laha hi, hamthai ri dada bonsi ne yaopha ba, ode bonsi khripbo bokhe ling ba.

²⁴Jisu bonsi khe thi ba, Ebo de gadain hanggaiyaba ani bithi se, gabang subung buthu ne khlai hi baigoyaba,

²⁵Ang gibi jang nisi khe thi du, Madai ni raji ha gadain ling mani basain soya side ang lingphinya kha.

²⁶Odehe, bonsi rajab dada baigo langhi Oliv hading ha thang la kha.

²⁷Jisu bonsi khe thi ba, Nisi khrip bo jajaoya jama se. Madai ni laisi ha thiba lai ning, Melma raokhiyaba khe ang sthai nang, ode melma buthu khaiphlung thar ma

²⁸Thikhabo, ang thih hi baijaphin bani yaohon ha ang nisini sagang ha Galili raji ha thang da nang.

²⁹Peter bokhe thiphin ba, Ning khe bonsi khrip khah ha jajaoya ja khabo, angde musi khalibo ning khe garya.

³⁰Odebani, Jisu Peter khe thiphin ba, Ang ning khe thi du, dini hor ha, daola gisi gagin ni sagang ha ning ang khe phin tham niya ma.

³¹Peter bol jang thiphin ba, “Ning thihba ha thih phama nang la khabo, ang niya nang niya”. Gibin yaohon rikphayarao khrip bo olei ning thi ba.

³²Bonsi Gethsemani thiyaba hathan ha sophai ba. Jisu jarni yaohon rikphayarao khe thi ba, Ang Madai bidu si, nisi eraha ning kham lah.

³³Bo Peter, Jakob ar Johan khe langpha ba, ar glimdi galaisi dukhu waimu nang ba.

³⁴Bonsi khe bo thi ba, Ani khah ha hamsi ning dukhu nang bani thih thao thao ang ja du. Nisi eraha ang jang salai hi dongpha.

³⁵Bo thangdao hi thang dada hah ha blip pha ba, ar blai khade bo dukhu ni bubli khe lailang mane bi ba.

³⁶“Abai, nini khlaihi de khrip khebo blai du. Ebo dukhu ni bela khe ani phrang degaolang ri lah. Thikhabo ang nangjaoba lai da ja thing, ning nangjaoba lai ja thing.”

³⁷Bo phaiphin baha boni yaohon rikphaya gatham thuhi dongba khe nu ba, odebani bo Peter khe thi ba, Simon, nisi thuba se na? Gonta masi mang mangbo nisi smao hi dong phuya?

³⁸Ode, bonsi khe thi ba, Naigrik ha galaiya mani khlai hi smao hi ning bi lah. Bese de blai du, thikhabo saomang de raoya ja du.

³⁹Bo thangphin hi sagang ha thiba lai ning biphin ba.

⁴⁰Bo yaohon rikphayarao niha phaiphinba ha, bonsi thuba khe nu ba. Bonsi muthai naisi phuya si dongba ode bonsi snadi khe boni ha thi ma bonsi mithiya.

⁴¹Ode, bo phai hi, phintham ha bonsi khe thi ba, “Duha de thu hi lenggo la ga, bublibo ja kha! Bubli sophai kha! Nai lah, Marsi ni Basa de phaphirao ni yao ha rem rijao ma kha.

⁴²Baija hi, jing thang la nang. Nai lah, angkhe remginyaba eraha sophai kha”.

⁴³Bo olei grao josaiba ha, yaohon rikphaya jhigin ni bising ha saosi Juda sophai kha. Bo jang baosi jahi Jonthairao, Dara khe slingriyarao ar hojarao jang haiha jaoyaba subung buthu seng ar daobu labu hi sophai kha.

⁴⁴Remginyaba subung buthu khe sin rihi thi ba, Sere khe ang khudim nang, bo khe ning remhi hamsisi khlai hi lang lah.

⁴⁵Juda sophaiba jang, Jisu khe Rabbi thihi bokhe khudim kha.

⁴⁶Odehe, bonsi Jisu khe remhi kha ba.

⁴⁷Thikhabo, oraha songyarao ni bising ha saosi jarni seng khe khaikho dada Jonthaima ni leng khe dainba ha, boni khmao saikhao se dainso ba.

⁴⁸Jisu bonsi khe thi ba, Ang khe makhao mithim khe rem mane phaiba lai seng jang daobu labu hi nisi phaiba na?

⁴⁹Madai khoh ha sain midi sling rihi, nisi niha ang dong ba. Nisi angkhe remya lao. Thikhabo, Madaini laisi ha grao dongyaba khe sophai mani khlai hi se elei ja ba.

⁵⁰Boha ning boni yaohon rikphayarao khrip bokhe gar dada khailang thar kha.

⁵¹Naga saosi, rih guphu phinyaba, Jisu khe rikpha ba; bokhe bonsi remma bao ba.

⁵²Thikhabo, bo naga jarni rih khe dangkhlai hi, saoha rih giri hi bo khailang kha.

⁵³Jisu khe Jonthaima ni noh ha lang ba. Ode bo jang baosi khrip Jonthairao, Hojarao ar Dara khe slingriyarao oraha bojom jalai ba.

⁵⁴Peter gajain ni phrang rikpha hi Jonthaima ni noh ni daoglap ha hap ba, ar siphaiyarao jang baosi bo waisi kham ba.

⁵⁵Jonthairao ar khrip bisardarrao Jisu khe sthai mane balam smai ba, thikhabo bonsi saosibo musi balam mai phuya.

⁵⁶Jisu ni basao ha thokhi hi subung gabang mosol sakhi ri khabo, bonsini grao miliya.

⁵⁷Subung gejesi song dada mosol sakhi ri ba.

⁵⁸Ebo subung de subung ni yao jang dangyaba Madai khoh khe sbai dada saintham ni bisingha yao jang dangya hi gibin dangphin nang thiba khe jing khna kha, thihi thi ba.

⁵⁹Olei sosi bonsi sakhi ri khabo, bonsini grao miliya.

⁶⁰Jonthaima subung buthu ni sagang ha songkhu dada Jisukhe sing ba, Bonsi nini basaoha sakhi riyaba khe ning grao thiphin phuya kha?

⁶¹Thikhabo, Jisu grao thiphinya hi phirik phirik dong ba. Odebani, Jonthaima bokhe singphin ba, Ning la Messiah, Judaothao ha dongyaba ni Basa na?

⁶²Jisu bokhe thiphin ba, Ang ning, ar Marsini Basa khe raoma jang Madaini yaoda gede kham dada, jimi jang phaiba khe nisi nu nang.

⁶³Jonthaima jarni rih khe jikhao hi thiba, Jing musi sakhi nangdaoya kho,

⁶⁴Bo ning Madai sijiba khe nisi khna kha da. Nisi bedehe bao du? Bonsi khripbo bokhe sthai mane baolei ba.

⁶⁵Gejesi subung bokhe khudi thuphra ba, ar boni muthai khe khaphong hi bokhe do ba, Sere ningkhe do ba? Dei, thi sang, bonsi thi ba, ar siphaiyaraobo bokhe langhi bakhao lai ri ba.

⁶⁶Odehe, Peter noh bakhla ni hakhli ha khamba ha Jonthaima ni lengjikrao ni bising ha saosi mala phai ba.

⁶⁷Peter waisi khamba khe nuhi, bokhe naipha dada thi ba, Ning bo Nazareth Jisu jang dongphayaba saosi se.

⁶⁸Thikhabo Peter mithiya maisi hi thiphin ba, Snadi grao khe ning thi ba ang tharmaiya. Ode bo baji ha baigo lang kha. Boha ning daola gisi kha.

⁶⁹Bo lengjik mala bokhe nuhi oraha songyarao niha thi ba, Bo bonsini subung se.

⁷⁰Thikhabo, Peter niyaphin ba. Khaisa yaohon ha oraha songyarao Peter khe thi ba, Ning bo Galili rajini se, bonsini bising ni subung se.

⁷¹Thikhabo, Peter thi ba, Ang gibi khe thiba se, niyakhade Madai angkhe dukhu ri thing. Nisi thiyaba subung khe ang mithiya, thihi smai dang ba.

⁷²Boha ning daono phin gini gisi kha. Daono phin gin gisiyasa ni sagang ha ning angkhe phintham niya ma, thihi Jisu bokhe thiyaba grao khe Peter wainso hi, dukhu nang dada bol jang gra ba.