Read Dimasa Marka 2 Bible Online

Marka 2 - Dimasa bible

Marka 2

¹Khaisa basain ni yaohon ha Jisu Kapernaum ha thangphin ba, ode bo oraha dong ba thihi grao gublung thar kha.

²Odebani, subung gabang bojom jahi noh bising ha derga kholei sosibo jaoya kha.

³Adur jayaba, subung saosi khe bri jang bain hi labu ba.

⁴Thikhabo, subung bang bang bani bonsi noh bising ha hap phuya; nohkhim khe khusi hi Jisu dongthan bujui ha adur khe rih ha thu rihi dikkhlai ba.

⁵Bonsi ni lonma raoba khe nuhi Jisu thi ba, “Basa, nini phap buthu khe map ja kha.”

⁶Dara khe slingriyarao gejesi oraha kham hi dong ba. Bonsi khah bising ha edehe bao ba;

⁷Snadi jabani ebo subung la olei grao jo ba? Madai khe sijiba se. Madai khe garhi sere phap khe map khlaiphu ma?

⁸Bonsi khah ha baoyaba khe Jisu srap jang tharmai hi bonsi khe thi ba, Sumjabani nisi olei bao ba?

⁹Adur khe nini phap buthu map ja kha thiba laidao na baija hi thuyam thonkhu hi thang lah thiba, sumbo lai dao?

¹⁰Asababo ja thing, habsao ha phap khe map khlai mane Marsi ni Basa niha khemotha dong thihi ang phnu nang. Odehe bo sao adur khe thi ba,

¹¹Ang ning khe thi du, baija hi nini yam khe thonkhu hi nini noh ha thang lah.

¹²Bonsi khrip bo nai hi dongba ha, bo baija hi, jar ni thuyam khe lang hi, thang la kha. Khrip bo gmang lai hi, Eleiyaba khusi khe nuba giri kho thi lai hi, Madai khe bakhan khlai kha.

¹³Jisu Galili dihkharnai dergong ha thangphin ba. Khrip subung buthu boni ha thang ba. Bo bonsi khe sling ri ba.

¹⁴Bo daophalang ba ha, Alphai ni basa Levi, khajna khrangyaba, jar ni khamthan ha khamba khe bo nu ba. Jisu bo khe thi ba, Ani yaohon rikpha lah. Levi baija hi bo jang yaohon rikpha kha.

¹⁵Yaohon ha Jisu Levi ni noh ha makham khalai kham ba. Khajna khrangyarao ar gabang phaphirao boni yaohon rikpha hi dongyaraobo Jisu ar boni yaohon rikphayarao jang makham khalai kham ba.

¹⁶Gejesi Dara khe slingriyarao, bonsi de Pharisairao se, Jisu phaphirao ar khajna khrangyarao jang baosi khalai khampha lai ba khe nuhi, boni yaohon rikphayarao khe sing ba, Snadi bo la olei subungrao jang baosi makham jipha lai ba?

¹⁷Jisu bonsi ni grao khe khna hi thi ba, Sao hamyarao ne daktor khe nangya; thikhabo, subung sao limyarao ne khlai hi se nang ba. Angde subung hamba khe long mane phaiya, phaphirao khe long mane se phai ba.

¹⁸Baptisma riyaba Johan ni rikphayarao ode Pharisairao hoh khongja dong re. Odebani subung buthu Jisu niha phaihi singphai ba, Johan ni rikphayarao jang Pharisairao hoh khongja dong re. Snadi jabani nini yaohon rikphayarao la hoh khongja dongya ba?

¹⁹Jisu bonsi khe thiphin ba, Disingba ni mel ha longjaoyarao jiya hi dongya. Daman bonsi ni bising ha dongpha du side, jiya hi hoh khongja dongma nangya.

²⁰Thikhabo, jekhali bonsi ni phrang daman khe lang mani basain sophai nang, okhali hade bonsi hoh khongja yaowai nang.

²¹Saosi bo rih gadain khe rih gajam ha suphaya. Olei dang khade, rih gadain de sikgrop hi rih gajam khe jegao ri ma se.

²²Odehe, saosi bo grep bidi gadain khe migur bokhoh gajam ha lusingya. Lusing khade berekkhao hi grep bidi jang migur bokhoh khe hamya khlai ma se. Odebani, anggur bidi gadain khe migur bokhoh gadain ha lusing ma nang du.

²³Jisu Lenggo basain ha mailing khe baiso lang ba. Bonsi thangpha langba ha boni yaohon rikphayarao maiding khe sbai ba.

²⁴Odebani, Pharisairao Jisu khe thi ba, Nai lah, nini yaohon rikphayarao Lenggo basain ha dang thaoyayaba khe dang du.

²⁵Jisu bonsi khe thiphin ba, David jang boni lugurao, ji mane giri hi dongba ha, bonsi hukhri jaoba, boha snadi khusi khe dang ba, bokhe nisi phuriya?

²⁶Abiathar Jonthaima jahi dongba ha, David madaikhoh bising ha hap hi, Jonthairao khe garhi saosibo jithaoyayaba hon khe bo ji ba, ode boni lugurao ne bo ji ri ba.

²⁷Jisu bonsi khe thiphin ba, Lenggo basain de marsi ni khlai hi se slam ba, marsi de Lenggo basain ni khlai hi slamya.

²⁸Odebani, Marsi ni Basa de Lenggo basain ni khlai hi Gabra se.