Read Dimasa Marka 5 Bible Online

Marka 5 - Dimasa bible

Marka 5

¹Galili dihkharnai ni dih nar, Gerasin raji ni haphai ha Jisu ar boni yaohon rikphayarao sophai ba.

²Jisu rung ni phrang akhai buba de sgain gajaoyaba, subung saosi bokhe goron ba.

³Bo subung de mangkhlong buthu ha dong re, ode bokhe ser ni sikol jang khah khabo saosibo bokhe mathao phuya.

⁴Bokhe alang alang ser ni sikol jang yao igah ha ser ni thongkhro phnang khabo saso hi thang la re. Bol rao bani bokhe saosibo mathao phuya.

⁵Sain hor mangkhlong ha hading ha daobai hi jirikkhao bai re. Ode jar ni sao khe longthai jang ra la re.

⁶Gajain ni phrang Jisu khe nuba jang khaibu hi Jisu ni sagang ha yasgu thu ba.

⁷Odehe, bol jang jirikkhao hi, Madai Judaothao ni basa Jisu, ning jang ang snadi galai lai ba?

⁸Ang Madai ni bumu jang nini ha khainsu la du, ang khe dukhu da ri, thi ba. (Bede thikhade ‘bo subung ni phrang baigo lang lah’ thi hi Jisu thiblai kha).

⁹Jisu bokhe sing ba, Nini bumu snadi? Bo thi ba, Ani bumu de rja rjing se, jing de gabang bang bi

¹⁰Ode, bo raji ni phrang rikkhlaiya mane Jisu niha hamsi ning khainsu ba.

¹¹Bo hading ha hading yarai masi dong ba. Oraha hono khe dol jang raokhi re.

¹²Hono buthu ni bising ha hapsing mane Jisu niha khainsu ba.

¹³Jisu bonsi ne hukhum ri ba. Ode bese gusu buthu, baigo lang hi, hono buthu ni bising ha hapsing hi kha. Ode hono buthu hah rang bakhla gede khai khlai lang hi, dihwari ha birkhlai hi gilik hi thih thar kha.

¹⁴Odehe, hono raokhiyarao khaiphalang hi, nolei ar phadain ha thang hi sainthi ba.

¹⁵Bonsi snadi ja ba thihi nai mane phaiyarao Jisu niha sophaiba de, rja rjing bese gusu gajaoyaba khe rih phin dada khah gadain jahi khamba khe bonsi nuba jang hamsi ning khin ba.

¹⁶Odehe, bese gusu gajaoyaba jang hono buthu ni jathai khe nuyarao sainthi ba.

¹⁷Odebani, bonsi khe bonsi ni raji ni phrang thangla mane boniha bi ba.

¹⁸Bo rung ha gakhuba ha, bese gusu gajaoyaba boniha thi ba, Ang khebo ning jang thangpha ri.

¹⁹Thikhabo, Jisu maniya, ar bokhe thi ba, Ning jar ni noh ha thangphin lah; ode jar ni nokhor ni subungrao niha Gabra nini basao ha khasao hi khusi gedeba dang riba khe sainthi lah.

²⁰Odehe, oraha ni phrang baigo langhi Dekapoli nolei buthu ha Jisu boni basao ha khusi gedeba dang riba khe khrip subung buthu niha sainthi ba, ode khrip subung buthu gmang thar ba.

²¹Jisu rung jang dih nar gede thangphin ba. Subung buthu boniha bojom japhai ba, thikhabo bode dih rogong ha dong ba.

²²Odehe, bikhoh ni hojarao ni bising ha subung saosi, bumu Jaira thiyaba, Jisu khe nuba jang igah ha blip pha hi khlim ba;

²³Ani bisik limba, thihbri thihbri jahi dong. Bo hamphin mani, nini yao khe boni basao ha dopha khade ham nang mu, thihi khainsu ba.

²⁴Jisu bo jang thangpha ba; odehe subung gabang bo jang thangpha hi rikpha lang ba.

²⁵Maithai jhigin bithi thangyaba haingajik saosi oraha dong ba.

²⁶Daktor jang gabang naijao hi, boni ha bislei dong ba rithar hibo hamdaoba thane rao se raodao ba.

²⁷Bo haingajik Jisu ni grao khe khna hi subung buthu ni bising ha yaohon gede phai dada hapsing ba.

²⁸Bo haingajik, ‘Boni rih khe dopha kha thikhade ang ham nang,’ thihi bao ba.

²⁹Bo Jisu ni rih khe yao jang dophaba ha, sao ni bithi thangba thao kha thihi jar tharmai la kha, ode bo ham kha.

³⁰Boha ning Jisu, boni sao ni phrang raothai baigoba khe tharmai kha; odebani subung githimyarao khe bo naiding hi sing ba, Sere ani rih khe dopha ba?

³¹Boni yaohon rikphayarao boniha thi ba, Subung buthu nephalai ba khe ning nuhibo sere ani rih khe dopha ba thihi singba kho?

³²Thikhabo, olei yao dophayaba khe sere thihi mithi mane Jisu naiding ba.

³³Bo masainjik boni saoha jayaba khe mithi hi boni ha phai dada, khin hi sao mao ba; ode phai hi boni igah ni gabasi ha yasgu thu ba, ode khrip jar ni grao khe sainthi ba.

³⁴Jisu bokhe thi ba, Ani bisik, nini lonma jang ning ham kha. Santhi jang thang lah, nini limthai ham kha.

³⁵Jisu ebo khe thihi dongba ha, Jaira ni noh ni phrang subung saosi phai hi bokhe thi ba, Nini bisik thih kha. Slingriyasa khe yesisi da khlai.

³⁶Jisu bonsi sainlaiba khe khnaya jahi bikhoh ni hoja khe thi ba, Da khin, lon se ning lon lah.

³⁷Odehe, Peter, Jakob ar boni buphlung Johan buthu khe garhi de gibin saosi khe bo rikpha riya.

³⁸Jaira ni noh ha sohiba de subung buthu jiu gra laihi dongba khe Jisu nuhi ba.

³⁹Bo noh ha hapsing hi bonsi khe thi ba, Snadi jabani jiu gralai hi dong ba? Ansa de thihya, bode thuba se.

⁴⁰Bo ode thiba khe subung buthu minithai ba. Bo bonsi khe rikkhlai tharhi, ansa ni buma bupha ar boni yaohon rikphayarao gatham khe langpha hi ansa dongyaba ha bo hapsing ba.

⁴¹Odehe, ansa ni yao rem dada, bo thi ba, Talitha kumi, boni ortho de Nandi, ning baija thiyaba se.

⁴²Boha ning bo baija hi hem lang la kha. Bo maithai jhigin ni ansa se. Ebo khe nuhi bonsi hamsi ning gmang lai ba.

⁴³Thikhabo, Jisu ebo grao khe saosi niha bo sainthiya mane magna ba, ode bo thi ba, Bo ne asaba jimane ri lah.