Read Dimasa Marka 7 Bible Online

Marka 7 - Dimasa bible

Marka 7

¹Jerusalem ni phrang Pharisairao ode Dara khe slingriyarao phai hi, Jisu ni sersi giding bojom ja ba.

²Boni yaohon rikphayarao gejesi yao suyahi makham jiba khe nu ba.

³Bede thikhade, Pharisairao ar Judasarao phagara magararao ni mani phabuba ni yao suyahi jiya lingya.

⁴Hathai ni phrang phai khabo, dugruyahi jiya lingya ar gibin gibin damsru bela khopra susa mani dara dongba khe bonsi mani ba.

⁵Odebani, Pharisairao ode Dara khe slingriyarao Jisu khe sing ba, Nini yaohon rikphayarao la jug jug manihi phaipha buyaba dara khe maniya hi yao suyahi makham jiba ling ba?

⁶Jisu bonsi khe thiphin ba, Isaia gorasali nisini basao ha jamaisiyarao thihi thi langba lai grao gibi ning. Bo reb ba lai- Ebo jug ni subung buthude, khuh ha se ning angkhe man khlai ba, Thikhabo, khah hade ani phrang gajain dong ba se.

⁷Bonsi ni khlimthaibo haglai thiyaba gibi se Bonsi de subungni dara khe Ani dara lai sling ri re,

⁸Nisi buthu Madai ni graothai khe dangkhlai hi subung ni dara khe se mani ba.

⁹Odehe, bonsi khe thiba kho, Madai ni graothai khe dangkhlai hi jarni slingrithai khe bede sling ma bao ba?

¹⁰Odebani, Moses graothai ri ba, Nini buma bupha khe man khlai lah, ode jarni buma bupha khe sijima ri re, bode sthaima nang ma.

¹¹Thikhabo, nisi la elei se thi lai re, Sere subung jarni buma bupha niha thi re, Nisi angkhe yaowai mane asaba ha dong khabo, ebo korban se, thi re. (Eboni ortho Madai niha yaophaba).

¹²Nisi ni buma bupha khe juruya thikhabo musi bera giri.

¹³Nisi slingriyaba grao jang nisi elei jang Madai ni dara khe dang re. Ode eleiyaba gibin gibin khusi nisi dangyaba bangbi kho.

¹⁴Odehe, subung buthu khe Jisu longphin hi bonsi khe thi ba, Ani grao khe khna lah ar buji lah.

¹⁵Baji ni phrang subung ni bising ha hapyaba de bokhe gusu khlai phuya. Thikhabo, subung ni bising ni phrang baigoyaba se bokhe gusu khlai re.

¹⁷Subung buthu githim laiyarao ni phrang thanghi bo noh bising ha hap hi, bo jang boni yaohon rikphayarao ebo graoni balam khe sing ba.

¹⁸Jisu bonsi khe thiphin ba, Nisi bo olei jasosi ning mithiba giri na somo? Ebo khe nisi tharmaiya kho? Asalai thikhabo baji ni phrang subung ni bising ha hapyaba de bokhe gusu khlaiya.

¹⁹Bede thikhade khah bising ha hap hi hoh bisingha hap dada, sao ni phrang baigo lang la re. (Odelai ning khrip jimu de ragao bi thihi Jisu sainthi ba).

²⁰Ode, Jisu thi lai ba, Subung ni khah bising ni phrang baigo buyaba se subung khe gusu khlai re.

²¹Bo buthu subung ni bising ni phrang regethai baigo hi,

²²Ul jamani, khao jimani, sthai mani, malai ni bihih jang hamjao lai mani, harbao mani, rege mani, thokhi mani, gaora-gaori ja mani, hingsa ja mani, siji mani, ode sanggama gibir,

²³Ebo buthu khrip hamya khusi subung ni khah bising ni phrang baigo buhi, subung khe gusu khlai re.

²⁴Odehe, oraha ni phrang baigo langhi Jisu Tura ar Sidon haphai ha thanghi noh masiha hap hi donghi kha. Saosi jang bo mithi jaoya, thikhabo bo mithi jaoyahi dong phuya.

²⁵Masainjik saosi boni bisik khe bese gusu gajaoyaba, Jisu ni grao khe khnaba jang boniha phai ba, ode boni igah ha blip pha ba.

²⁶Bo masainjik de Jentailjik, Suria raji ni Phoiniki ha hajai ba. Bo jarni bisik ni sao ni phrang bese gusu khe rikkhlai mane Jisu khe khainsu ba.

²⁷Thikhabo, Jisu bo masinjik khe thiphin ba, Jarni basathu ni honkhe se laha hi sisa ne riba de majangya dou.

²⁸Bo masainjik thiphin ba, Gabra, grao de gibi se, thikhabo, basang bakhla ha honduri galaiyaba khe sisabo jidu thi.

²⁹Masainjik khe Jisu thiphin ba, Ebo grao khe thiphin bani khlai hi, ning thangphin lah, nini bisik ni sao bising ni phrang bese gusu baigo lang kha.

³⁰Bo noh ha thanghi boni bisik thuthan ha thuba khe nuhi ba. Boni bising ni phrang bese gusu gibi jang ning baigo lang kha.

³¹Jisu Tura raji ni phrang thang hi, Sidon rajiha hapsing dada Galili dihkharnai ha sohi ba.

³²Boniha subung saosi nathong ar abbra jayaba khe labu ba, ode boni basaoha yao denghi bimane Jisu niha khainsu ba.

³³Odehe, Jisu bokhe subung buthu ni phrang sao jang langhi, boni yao jang yaosi jaosing hi, khudi thuphra hi boni slai khe giding ba.

³⁴Jisu nokhasao gede naikhu hi hangma sik dada, boni ha thi ba, Effatha, (boni ortho de ‘khru lang’.)

³⁵Boha ning, bo subung khmao khna phu kha. Ar boni abbrabo ham kha, ode graobo hamsisi jo phu kha.

³⁶Jisu subung buthu niha thi ba, Ebo grao khe saosi nihabo da sainthi, thihi magna ba, thikhabo baradao hi se sainthi ba.

³⁷Khnayarao si khripbo gmang ba. Bo olei khusi bislei hamsisi khlai hi dang ri ba, nathong khebo khna ri ba, ar abbra khebo grao jo riphu ba, thi hi bonsi gmang lai ba.