Read Dimasa Marka 8 Bible Online

Marka 8 - Dimasa bible

Marka 8

¹Khaisa yaohonha, subung buthu boni ha githim phai ba, ar ji mane giri bani, Jisu boni yaohon rikphayarao khe longha hi bonsi khe thi ba,

²“Subung buthu ani ha nokha saintham dongma ja kha ode duha bonsi niha ji mane musi bo giri. Ang bonsi khe hamsi ning khasao du.

³Bonsi khe ji riya hi noh ha haiha khade, lama ha hukhri jaohi mangsin nangma se. Bede thikhade, bonsi gejesi ha gajain ni phrang phai ba se.”

⁴Boni yaohon rikphayarao bo niha sing ba, Ebo hathan la hajengling se, elei subung gabang khe ji rima ne jagothai braha ni phrang labu ma?

⁵Jisu bonsi khe sing ba, Nisi niha hon pher bisi dong? Hon pher sni dong, thihi bonsi thiphin ba.

⁶Bo subung buthu khe hah ha kham mane sani ba. Hon pher sni khe lahahi hamthai ri dada, hon khe sbai hi, bonsi ne ron mane yaohon rikphayarao ni yao ha ri ba.

⁷Nahsa gijisa dong ba, bo khebo hamthai rihi bonsi ne ron rima sani ba.

⁸Subung buthu jiha si mai ji kha. Buduri haglaiyaba longkhai sni khonthim ba.

⁹Subung buthu rjing bri lai ja du, odehe bonsi khe haithar ha kha.

¹⁰Bo jarni yaohon rikphayarao jang baosi rungha gakhu hi Dalmanutha thiyaba rajiha bo sohi kha.

¹¹Pharisairao Jisu niha phaihi, Jisu jang niyalaiba, bokhe nainai mane bonsi boni ha sorgo ni sin khe smai ba.

¹²Thikhabo, Jisu hamsisi khah ha hoihi, bonsi khe thi ba, Ebo jugni subung rao snabani gmang thaosisiyaba sin khe smai ba? Gibi jang ang nisi khe thi du, duha ni jug ni subungrao de gmang thaosisiyaba sin khe rijao nang niya.

¹³Bonsi khe gar dada, bo rungha gakhu hi dihnar ha thang kha.

¹⁴Boni yaohon rikphayarao hon jagothai langma blao ba. Hon do si mang mang se ning rungha bonsi niha dong ba.

¹⁵Jisu bonsi khe thi ba, Pharisairao ar Herod dolni humao ni phrang girik hi nisi dong lah.

¹⁶Boha bonsi Jini ha hon ning giri, thi hi baolei ba.

¹⁷Jisu bonsi snadi khe sainlai ba khe mithi hi, bo bonsi khe sing ba, Nisi niha hon giri bani grao khe snadi jabani sainlai ba? Duhabo nisi mithiya kho? Nisi ni khah bislei rao du?

¹⁸Nisi niha muthai la dong, thikhabo nisi nuba ringya; nisi niha khmao dong, thikhabo nisi khna ba ringya.

¹⁹Subung buthu rjing bowa khe hon pher bowa jang sabaihi ji riba ha khamphlu bisi haglai ba? Khamphlu jhigin bonsi thiphin ba.

²⁰Subung rjing bri ne hon pher sni khe sabaihi ji riba ha, haglaiyaba khamphlu bislei khon khu ba? Bonsi thiphin ba, Khamphlu sni.

²¹Ode jangbo nisi mithiya kho lao? bonsi khe thi ba.

²²Bonsi Bethsaida ha sophai ba. Oraha subung gana saosi khe boni ha labu ba, ode boni yaokhe dopha mane boniha bi ba.

²³Jisu bo muthai gana subung khe yao rem dada nolei ni baji ha lang ba, ode boni muthai ha khudi thuphra hi boni basaoha yao dopha ba, ode bokhe sing ba, Ning muthai nu phu kha?

²⁴Bo subung naikhuhi thi ba, Ah, subung khe nu du, thikhabo ang bonsi khe buphang hemba lai nu du.

²⁵Jisu boni muthai ha yao dophaphin ba, boha ning hamso kha, ode khrip khe ragao sisi naiphu kha.

²⁶Jisu bokhe, Nolei bising habo da hap phin, thihi magna hi bokhe haiha kha.

²⁷Jisu jang boni yaohon rikphayarao baigo langhi Kaisari Philipi haphai ni rogong ni nolei buthu ha thang ba. Lama ha boni yaohon rikphayarao khe sing ba, Subung buthu angkhe sere thihi thi du?

²⁸Khrip subung buthu thi ba, Ning de baptisma riyaba Johan se, gejesi thiba Elija se, gibin buthu de gorasalirao ni bisingha saosi se, olei thilai du, thihi bonsi thiphin ba.

²⁹Jisu bonsi khe sing ba, Nisi la angkhe sere thihi thi lai du? Peter thiphin ba, Ning de Messia se.

³⁰Bo boni grao khe saosi niha bo sainthiya mane magna ba.

³¹Jisu jarni yaohon rikphayarao khe sling ri ba, Marsi ni Basa de dukhu rijao ma, ode hojarao, Jonthairao ode Dara khe slingriyarao bokhe negar ma, bonsi bokhe sthaima, thikhabo saintham ha bo baijaphin ma.

³²Bo grao khe bonsi niha ragaosisi bo thi ri ba. Odebani Peter Jisu khe gibin ha lang hi jo ba.

³³Thikhabo, Jisu yaohon giding phinhi, boni yaohon rikphayarao ni gede nai dada, Peter khe jo ba, Ani phrang thang lah, Soithan, nini baothai Madai ni phrang niya.

³⁴Odehe, Jisu boni yaohon rikphayarao ode subung buthu githimyarao khe longthim hi thi ba, Sere angkhe rikpha ma nangjao re, jarkhe blaohi jarni kross khe bainhi ani yaohon rikpha thing.

³⁵Bede thikhade, sere jarni hayu khe sogo ma nangjao re, bo jarni hayu khe khma ma, sere ani khlai hi ode hamba graojma ni khlai hi jarni hayu khe ri khade, bo sogo jao ma se.

³⁶Subung khrip mulug khe maithar khabo, jarni hayu khe khma kha la, bo ne snadi lab jama kho? Musi lab ja nang niya kha.

³⁷Subung jarni hayu ni baslai musi khebo ri phuya.

³⁸Ebo phaphi jug, gaora gaori ni jug ha, sere ani grao khe laji re, Marsini Basa jarni Bupha ni muima jang ar sorgoni degla gatharrao jang phaiba hade, bo bokhe laji ma se.