Read Dimasa Marka 9 Bible Online

Marka 9 - Dimasa bible

Marka 9

¹Jisu thi ba, Ang gibi jang ning khe thi du, Madai ni raji ni raothai jang phaiba khe nuyasi thiyahi dongyaba eraha dongyarao ni bisingha dong.

²Nokha sain do ni yaohon ha, Peter, Jakob ar Johan khe gibin langpha hi, hading khro ha thang ba. Oraha bonsi khe se ning langpha ba. Boha bonsi ni sagang ha ning, boni saogari slai langla kha.

³Boni rih phinyaba phirthi ha rih suyaba thabo phu daohi ja ba.

⁴Yaohon rikphayah gatham de Elija ar Moses Jisu jang sainlaiba khe nu ba.

⁵Peter Jisu niha thi ba, Rabbi, eraha dongba jinthane hambi. Eraha jing khepsa grang tham slam nang; ning thane masi, Moses ne masi ar Elija ne masi.

⁶Bonsi hamsi ning khin hi, musi thiphrang phuya ja ba.

⁷Odehe, jimi baigo phai hi, bonsi khe khlip phung kha. Ode, jimi ni phrang khurang masi ede thi ba, Ebo ning ani hamdao thaoyaba basa se, boni grao khe khna lah.

⁸Boha ning bonsi naiding ba; thikhabo, bonsi jang dongphayaba Jisu khe garhi de saosi khebo nuya.

⁹Hading ni phrang akhai buba ha, bo bonsi khe thihi magna ba, Marsini Basa thih hi baija phinya side nisi snadi khe nuba bokhe saosi nihabo da sainthi, thi hi magna ba.

¹⁰Ode, bo graothai riyaba khe mani ba; thikhabo, Thih hi baija phinma thiyaba graothai la snadi kho? thihi jarni bising ha sainlai ba.

¹¹Odehe, bonsi Jisu khe sing ba, Dara khe slingriyarao Elija phaida ma thihi snadi jabani thiba kho?

¹²Jisu bonsi khe thiphin ba, “Khrip dongba si khe salai rima ne Elija de phaida ma ning; thikhabo, Madai ni laisi ha, snadi jabani Marsini Basa dukhu rijao ma, dangkhlai jaoma thihi reb ba kho?

¹³Ang nisi khe thi du, Elija de phai blai kha. Boni balamha reb ba lai ning bokhe bonsi boni basaoha nangjaoba lai dang kha.”

¹⁴Boni gibin rikphayasarao niha phaiphin ba ha, subung buthu gabang githim lai hi dong ba, ar Dara khe slingriyarao gejesi jang niyalaiba khe nu ba.

¹⁵Subung buthu Jisu khe nuba jang, khrip bo gamang lai ba. Khaipha lang hi khripbo bo khe khlim ba.

¹⁶Jisu boni yaohon rikphayarao khe sing ba, Snadi grao ni balamha nisi niyalai ba?

¹⁷Subung githim laiyarao ni bising ha saosi bokhe thi ba, Slingriyasa, ang ani basa khe nini ha labu ba,

¹⁸Bokhe asaba ha bese gusu remthai kha ning, bokhe hah ha lemkhlai du. Boni bukhuh ha khudi baigo du, ar hathai wai du, ode boni sao rao thethe ja du. Nini yaohon rikphayarao niha ang khainsu ba, thikhabo, bonsi bese gusu khe rikhlai phuya.

¹⁹Jisu bonsi khe thi ba, Bislei lonma giri hi dong ma kho? Bislei sosi nisi jang ang dongpha phu nang kho? Bislei sosi nisi khe jon nang kho? Ansa khe aniha labu lah.

²⁰Bo ansa khe Jisu niha labu ba. Jisu khe nuba jang ning bese gusu ansa khe hamsi ning dukhu rihi, hah ha galai ri dada, khudi baigohi bo baider ba.

²¹Jisu ansani bupha khe sing ba, Ansa elei jaba bislei lao kha? Ansa ni phrang thihi thiphin ba.

²²Alang alang bokhe wai ha, dih ha nesing hi bese gusu bokhe sthaima bao ba. Blai khade, ning jingkhe juru lah.

²³Jisu bokhe thi ba, Blai re, ning londu thikhade lonma gnang nede khrip japhu du.

²⁴Ansa ni bupha srap jirikkhao dada Jisu khe thi ba, Ang lon du, thikhabo ani lonma raoya. Lonso mane angkhe juru lah.

²⁵Subung buthu boni gede khai buba khe nuhi, Jisu bese gusu khe hukhum ri ba, Ning nathong abbra bese gusu, ansa ni bising ni phrang baigo mane ang ningkhe hukhum ri du. Boni bising ni phrang baigo lah, ar musi khalibo da hap phin si.

²⁶Odehe, bo ansa bol jang jirikkhao dada sao nerphai hi bese gusu baigo lang kha. Ode, ansa de githi lai jahi dong ba. Odebani, subung buthu thilai ba, Bode thih kha.

²⁷Thikhabo Jisu bo ansakhe rem dada baija ri ba, ode bo songkhu kha.

²⁸Jisu noh bisingha hap phinba ha, boni yaohon rikphayarao bokhe phirik phirik sing ba, Snadi jabani jing bese gusu khe rikhlai phuya ba?

²⁹Bo bonsi khe thi ba, Eleiyaba khede hoh khongja donghi, Madai biya khade, musi jangbo rikhlai phuya.

³⁰Jisu ode boni yaohon rikphayarao bo hathan khe gar hi, Galili raji khe bailang hi thang la kha. Bo braha dong ba, saosi jang bo mithi jaoma nangjaoya.

³¹Bede thikhade, bo jarni yaohon rikphayarao khe elei slingri ba, Marsini Basa khe subungni yaoha yaopha jao ma, bonsi bokhe sthai ma, ode bo nokha saintham ha baijaphin ma.

³²Thikhabo, bo grao thiyaba khe bonsi mithi phuya, sing phinmabo bokhe khin du.

³³Bonsi Kapernaum ha sophai hi noh ha hapbani yaohon ha, Jisu jarni yaohon rikphayarao khe sing ba, Nisi lama ha snadi grao khe niyalai ba?

³⁴Thikhabo, bonsi boni ha thiphin raoya. Lamaha bonsini bising ha sere dedao ja ma thilaiba ni grao ha bonsi niyalai ba.

³⁵Jisu kham dada, jarni yaohon rikphayarao jhigin khe long hi, thi ba, “Asababo sagangthao jama nangjao khade, bo khrip subung yaohonthao ja nang, ode khrip subung ni dangyasa jahi dongma nang ma se.”

³⁶Odehe, bo ansa saosi khe bonsini bising ha song ri ba. Bo ansa khe bam hi, bonsi khe thi ba,

³⁷Sere ani bumu ni khlai hi ebo ansa ni bising ha saosi khe lamjao re, ang khe se bo lamjao ba; odehe sere ang khe lamjao re, angkhe haihayaba khe se bo lamjao ba.

³⁸Johan bokhe thi ba, Slingriyah, subung saosi nini bumu jang bese gusu buthu khe rikkhlai ba jing nu ba, bo jing jang rikphaya bani jing bokhe magna ba.

³⁹Jisu bonsi khe thi ba, Bokhe da magna lah. Sere ani bumu jang gmang thaosisiyaba khusi dang re ang khe sijiya.

⁴⁰Sere jing jang nanglaiya, bode jini gede gaba ba se.

⁴¹Gibi ning ang nisikhe thi du, nisi ani subung jabani, sere nisi ne dih bela masi mang mang bo ri re, gibi jang ning yaosandi mai nang.

⁴²Sere asababo angkhe lonhi khasi-daothaorao ni bisingha saosi khuda ri khade, boni gornaha mairong honkhliyaba longthai gedeba khe khah dada sagorha dangsing ba boni khlaihi hamdao.

⁴³Ode, nini yao jang doda ri khade, nini yaokhe dainso khla lah. Yao gonggin donghi norok waikhor thiyayaba ha thangba thanede, yao gongsi donghi hayuha thangba ningthane hamdao.

⁴⁴Norokni yungde thithaoya, waibo thithaoya.

⁴⁵Odehe, nini igah ning khe khuda rikha de, dainso khla lah. Igah gonggin jang norok ha thangba thane igah khora jahi hayuha hapba ninthane hamdao.

⁴⁶Norokni yungde thithaoya, waibo thithaoya.

⁴⁷Odehe, nini muthai ningkhe doda ri re thikhade, bokhe khaikho lah. Muthai thaigin jang norok ha thangba thane muthai thaisi jang Madai ni rajiha thangba ninthane hamdao.

⁴⁸Orahani hathan hade yungde thithaoya ar waibo thithaoya.

⁴⁹Bede thikhade, sem jang bandai riba ha thar riba lai khrip subung khe wai jang ragao rima se.

⁵⁰Sem hambi, thikhabo boni brabyaba gma kha la, bede khlaihi bokhe brab riphin ma? Nisi ni bisingha sem nangsmaiba lai saosi jang saosi nisi milihi dong lah.