Read Dimasa Luka 1 Bible Online

Luka 1 - Dimasa bible

Luka 1

¹O Mayani Theophil, Jini bisingha japhaiyaba grao khe gabang subung rebma bao ba.

²Jenba ni phrang ebo buthu khe nuyarao ar boni khusi dangyaba ni graojma jini ha sainthiyaba khe reb ba.

³Odebani, ebo buthu khe hamsisi khlai hi nai dada jenba ni phrang yaohonthao sosi, ninthane reb khade ham nang thihi ang bao ba.

⁴Sagang ha ninthane, bonsi riyaba grao khe, gibi ning thihi ning tharmaihi buji mani khlai hi ang reb ba.

⁵Juda rajiha, Herod Raja khamba ha, Abijah dol ni subung Zakaria thiyaba jonthai saosi dong ba. Bo Aron ni greng khe noh ja ba. Boni bihih ni bumu Elizabeth se.

⁶Bonsi gini jang Gabra ni muh ha hamba subung se. Odebani, Gabra ni dara disa khe hamsisi manihi dong ba.

⁷Elizabeth sagrima jabani, sasik maiya. Bonsi gini bo grasa grajik ja kha.

⁸Zakaria nalai dangba lai sainsi khali Jonthai ni khusi dang mane Madaikhoh ha hap ba.

⁹Odehe, Jonthai ni dara ha dongba lai, Gabra ni bikhoh ni bising ha hap hi bahai midim sao mane sama naiba ha boni saoha galai ba.

¹⁰Bo duna saosaiba ha baji ha subung buthu Madai bi ba.

¹¹Gabra ni sorgo degla masi nujao phai ba, ode Madai huthan ni yaoda gede songpha phai ba.

¹²Zakaria bokhe nu dada, waimu nang ba. Odehe hamsi ning khinbo khin ba.

¹³Thikhabo, sorgo ni degla bokhe thi ba, Zakaria, da khin, Madai ning biyaba khe khna kha. Nini nohbrajik Elizabeth ninthane basa saosi mai ri nang. Ning bokhe Johan thihi bumu deng lah.

¹⁴Bo hajai bani ning hamsi ning khaja nang, ode subung buthu gabang khaja nang.

¹⁵Bede thikhade, bode Gabrani sagang ha subung gedeba ja nang. Bo grep bidih ar ju musi khebo ling nang niya. Hajaiya sani sagang ha ning Bese Gathar jang gablai ba se.

¹⁶Bode Israelrao ni bising ha gabang subung khe jarni Gabra Madai niha khah phin rihi labuphin nang.

¹⁷Bupharao ni khah khe basathu nihah phin phin ri nang. Ode, subung grao maniyayarao khe girikyarao ni gede phin phin ri mani Gabrani khlai hi subung buthu salai hi deng mani, Elija ni bese jang khusi dang phu mani Gabra ni sagang ha bo thang da ma.

¹⁸Zakaria degla khe thi ba, Bede khlai hi ang tharmai phu nang? Ang bo grasa ja kha, ani nohbrajik bo grajik ja kha.

¹⁹Degla bokhe thiphin ba, Ang ning Gabriel, Madai ni sagang ha songyaba. Ebo hamba graojma khe sainthi mane angkhe haiha ba.

²⁰Khna lah, bubli sophai ginyaba grao khe ning lonya bani, boni grao sophaiya si ning grao jophuya hi thao ma.

²¹Zakaria khe subung buthu jonhi dong ba. Bikhoh bising ha budu lao bang bani bonsi hamsi ning gmang lai ba.

²²Bo baigo buba jang, grao jophuya kha. Odebani bikhoh bising ha nujaoyaba nu ba thihi bonsi tharmai ba, ode bo yao jang se grao jo si ba.

²³Bo jonthai ni khusi dangblai hi jarni noh gede thangphin kha.

²⁴Khaisa yaohon ha, boni nohbrajik Elizabeth sao khonggin ja kha, ar nokha dain bowa noh niphrang baigoya hi dong ba.

²⁵Duhade subung ni sagang ha musi jajaoya mane ani laji khe Gabra lang la kha, bo thi ba.

²⁶Odehe, Elizabeth sao khonggin daindo soba ha, Madai jarni degla saosi Gabriel thiyaba khe Galili raji ni nolei masi, Nazareth thiyaba ha,

²⁷mala gathar saosi niha haiha ba. Bode David ni sarik surik, Josep thiyaba jang noh jamane sandi dangseng hi dengyaba se. Bo mala ni bumu Mari se.

²⁸Degla boni ha phai hi thi ba, Juthai, nini ha santi dong thing. Ning jang Gabra dongpha du. Ninthane hamsi ning hamthai bo riha du.

²⁹Mari de olei sainthiyaba grao ni khlai hi hamsi ning khah waimu nang hi, Ebo khlimthai la sumjadi khlimthai ja kha thi hi bo khah ha bao ba.

³⁰Degla bokhe thi ba, Mari, da khin, Madai ning khe nangjao du.

³¹Khna lah, ning sao khonggin jahi basa miyah mai nang, boni bumu Jisu thihi ning deng la nang.

³²Bode subung gede ja ma. Judao thaoyaba Madai ni Basa thijao ma, ode Gabra Madai bokhe boni phagara David ni khamthan khe ri ma.

³³Ode, Jakob ni sarik surikrao ni basao ha thaoglao jang bo Raja ja nang. Boni raji jam nang niya.

³⁴Mari degla niha thi ba, Bede khlai hi olei ja phu ma? Ang la basai ning maiya kho?

³⁵Degla boniha thiphin ba, Bese Gathar nini basaoha akhai phai nang, ar judaothao ni raothai jang nini basao ha sainkhlim ja nang. Odebani hajai phaiginyaba nana de subung gathar, Madai ni basa thijao ma.

³⁶Nai lah, nini sengphongjik Elizabeth bo, grajik jaba ni yaohon ha duha sao khonggin ja ba daindo ja kha.

³⁷Madai ni khlai hi dang phuyayaba khusi musi bo giri.

³⁸Odehe, Mari thi ba, Angde Gabrani lengjik se. Ning thiba lai ning ani basao ha sophai thing. Ode sorgoni degla thang la kha.

³⁹Boni yaohon ha, Mari de salai dada Juda raji ni nolei masi ha sangga thang kha.

⁴⁰Bo Zakaria ni noh ha hap dada Elizabeth khe khlim ba.

⁴¹Mari khlimba ni khurang khe khna hi, Elizabeth ni hoh bising ha nana dongyaba mao kha. Ode, Elizabeth niha Bese Gathar gablai ba.

⁴²Bo bol jang jirik khaohi thi ba, Masainjikrao ni bising ha nini khophal hamdao thao.

⁴³Ani Gabra ni buma ani ha phaiba la sumjadi ni grao kho?

⁴⁴Ning khlimyaba khurang khe khnaba jang ani bohoh bising ha dongyaba nana baijlom kha.

⁴⁵Gabra boni ha grao sainthiyaba khe sophai ma thihi lon bani, boni khophal hambi.

⁴⁶Mari thi ba, “Ani khah ha Gabra khe bakhan khlai du,

⁴⁷Ani bese sogoyahba Madai ni khlai hi ang khaja du!

⁴⁸Bede thikhade, bode boni lengjik khasi daothaoyaba khe wainso du. Duha ni phrang khrip subung buthu ang khe khajayaba thi ba.

⁴⁹Raodaoyaba Madai anthane khusi gede dang ri kha, Boni bumu bo gathar se.

⁵⁰Bokhe khin hi dongyarao ni basaoha Jug jug khasaoma phnu nang.

⁵¹Bo jarni yao ni bol khe phnu kha, ar bonsini khah ha baoyaba sanggama buthu khe bo dra dri khlai kha.

⁵²Bo Raja gedebarao khe nekhlai hi, Gibin jadi khasiyarao khe sugu kha.

⁵³Hukhri jaoyarao khe hamba jimu jang hoh gablai ri kha, Ode, gnangrao khe yao khongja khlai hi haiha kha.

⁵⁴Jini phagrarao niha bo grao hanggai ba lai, Boni leng Israelrao khe naiso la kha.

⁵⁵Abraham ar boni sarik surik niha, thaoglao jang boni khasaoma khe phnu nang”.

⁵⁶Mari Elizabeth ni noh ha daintham lai dong hi jarni noh ha thangphin la kha.

⁵⁷Elizabeth nana mai mani bubli sophai hi bo nana miyah mai kha.

⁵⁸Boni noharirao ode hainthirao khna dada Gabra boni basaoha hamba khusi dang ri kha thihi hamsi ning bonsi bo jang khajapha ba.

⁵⁹Odehe sainjai so ba ha, nana khe bujuh raso mane bonsi phai ba. Bupha ni bumu lahi Zakaria thihi bonsi dengma bao ba.

⁶⁰Thikhabo, boni buma thi ba, Niya, boni bumu Johan deng nang.

⁶¹Bonsi Elizabeth khe thi ba, Elai bumu de nisini daphlungrao ni bising ha saosi bo giri kho!

⁶²Odehe, bonsi boni bupha niha yao jang grao johi nana ni bumu khe sumjadi deng ma thihi sing ba.

⁶³Zakaria reb mane longthai bakhlap sain hi, oraha Boni bumu Johan se thihi reb ba. Bonsi khrip bo gmang lai ba.

⁶⁴Boha ning khuh slai khru dada grao johi Madai khe bakhan khlai ba.

⁶⁵Noharirao khinthar hi Juda raji ni nolei buthu ha bo grao gublung thar kha.

⁶⁶Ode, khnayarao si khah ha baohi, bo grao khe sing ba, Ebo nana bede jahi thao nang? bonsi thilai ba. Gabra ni yao boni basao ha dongpha du.

⁶⁷Boni bupha Zakaria, Bese Gathar jang gablai hi dong ba. Bo edehe grao sainthi da ba:

⁶⁸“Gabra, Israel ni Madai khe bakhan jahi dong thing! Bo jarni subungrao khe juru hi sogo kha,

⁶⁹Boni leng David ni sarik surik ni phrang sogoma ni bogrong bo song ri kha.

⁷⁰Odehe, gada habo jarni gorasali ni khuh jang grao hanggai ba lai jasosi,

⁷¹Jini sotrurao, jing khe naisleyarao ni yao ni phrang jing khe sogo kha.

⁷²Jini phagararao ni basao ha khasaoma phnu mani, ode boni grao gathar khayaba khe wainso mani

⁷³Jini phagara Abraham niha smai dang hi grao hanggai ba.

⁷⁴Bo jing khe sotrurao ni yao ni phrang sogo nang

⁷⁵Jing thanghi dongba ha ning, gathar jang ragaosisi dongphu mani Boni muh ha bo jingkhe saikho ba.

⁷⁶Ode nanadao, ning khe judao thaoyaba ni gorasali thihi thi nang, ar boni lama khe slam mane Gabrani sagang ha ning thang nang.

⁷⁷Bonsi ni phap map jama ni sogo jaomane grao khe mithi ri nang.

⁷⁸Jini Madai ni khasaoma jang ar magain dik dikyaba basao ni phrang sain baigo hi jini ha jnama ri nang.

⁷⁹Andar jang githi ni sainkhlim ha khamyarao ar bonsini igah khe santhi ni lama gede hem ri mani basao ni phrang jnama sophai nang”.

⁸⁰Ansa dephalang hi juphalang hi sao jang bese gede raodao phalang ba. Odehe basain soya side Israel sarao niha nujaoya hi bo hajengling ha dong ba.