Read Dimasa Luka 12 Bible Online

Luka 12 - Dimasa bible

Luka 12

¹Gabang subung, rjing rjing gasep lai si bonsi bojom japhaba ha, Jisu sagangthao ha jarni yaohon rikphayarao khe thi ba, Pharisairao ni humao ni phrang girik lah, bonsi de giriklaiyarao se.

²Thikhabo, nujaoya hi, huihi deng mani musibo giri. Ar mithiya mane khlip phung hi deng mani musibo giri.

³Odebani, nisi andar mithim ha sainlaiyaba grao khe, sain jdanyaba ha khna nang. Ar noh bising ha grao makhao sainlaiyaba khe, noh khim sao ha jirik khao hi phla nang.

⁴“Ani lugurao, ang nisi khe thidu, saomang sthai hi boni yaohon ha musibo khlai phin phuyayaba khe da khin.

⁵Thikhabo, sere khe nisi khinma nang re, ang nisi ne thi ri nang; sthaiba ni yaohonha norok ha lemsing mani khemotha gnang khe khin lah. Ang thi du, bo khe se ning khin lah!”

⁶“Daophersi mabowa khe phoisa magin jang phainya na somo? Daophersi masi mang mang khe bo Madai blaoya.

⁷Nisi ni khro ni khanairim khrip sain hi deng kha; odebani nisi da khin lah, gabang ning daophersi thane nisi ni muilo bangdao!”

⁸Ang nisi khe thi du, “asaba sere subung buthuni sagangha ang khe ajao kha de, Marsini Basa bo, Madai ni deglarao ni sagang ha bo khebo olei ning ajao ma se.

⁹Thikhabo, subung buthu ni sagang ha, sere ang khe maniya re, Marsini Basa bo Madaini deglarao ni sagang ha bokhe maniya ma se.”

¹⁰“Sere Marsini Basa khe siji re, bo khe map khlai phu nang. Thikhabo, sere Bese Gathar khe siji re, bo de map ja nang niya.”

¹¹Nisi khe bisar ri mani subung buthu sunagog ha, ar hojarao ar bisardarrao ni sagang ha lang nang. Bedehe grao thiphin ma thihi nisi khah waimu da nang.

¹²Bede thikhade, bo bubli ha sumjadi grao khe nisi thima, nisine Bese Gathar sainthi nang.

¹³Subung githim laiyarao ni bising ha saosi Jisu khe thi ba, Slingriyah, jini bupha jinthane dengyaba don ni phrang anthane phantha rimane ani buphlung khe sani lah.

¹⁴Jisu bo khe thiphin ba, Ani lugu, nisi ni don ni basao ha bisar khlai mane ar don ron ri mane sere ang khe deng ba?

¹⁵Odebani, bo bonsi khe thi ba, Nisi harbaoma ni phrang girik lah. Don jang mang mang de subung thangya.

¹⁶Ode bo, bonsi ne ebo daogari masi khe sainthi ba: Gnang subung saosi, maihadi danghi, mai mai dada lab ja ba.

¹⁷Odebani, bo jarni khah ha bao ba, ani mai dengmani maikhoh ha jaoya kha, ang sumjadi khlai ma kho?

¹⁸Ang elei dang ma. Ani maikhoh buthu khe rukhlai hi, mai ar gibin bostu buthu khe gibin maikhoh dedao hi dang dada, oraha bojom deng nang.

¹⁹Ode, ani hayu khe ang thi nang, Hoi ani hayu, maithai glao ni khlaihi, jarne nangyaba khe bojom khlai kha, duha ji lah ling lah, lenggo hi khaja sisi dong lah.

²⁰Thikhabo, Madai bo khe thi ba, Ning gibir subung! Ebo hor ha ning, nini hayu khe lang la jaoma kha. Ning bostu bojom khlai hi dengyaba buthu, sere ne ja nang kho?

²¹Ode Jisu thiphin ba, Subung jarni sao jang don bojom khlai hi, Madaini gede bojom khlaiya kha de, olei ja re.

²²Odehe, Jisu jarni rikphayarao khe thi ba, “Nisi ni hayu, nisi jima lingma, ar gainsari phinsari ni khlai hi waimu da nang.

²³Jimu thane hayu nangdao, ar gainsari phinsari thane saomang nangdao.

²⁴Daokha buthu khe nai la sang. Bo buthu mai gaiya, ra bo raya, maikhoh habo mai bojom khlaiya; thikhabo bo buthune Madai jimu ri du. daomi tha de nisi gabang muilo bangdao.

²⁵Nini bising ha waimu nang bani la, jarni hayune yao musilai laodao riphuya ba sere dong?

²⁶Ebo khusi basasa khe nisi dangphuya thikhala, gibin gibin khusi ni khlai hi sumjabani waimu nang ba?

²⁷Nai lah, hagrani lili khim khe bedehe depha lang ba. Bonsi dang bo dangya, jarne khun bo luya. Thikhabo, ang nisi khe thi du, Solomon Raja, boni rijem jang majang ri khabo, hagra ni lili khim laibo majangya.

²⁸Hagrani sam, dini ha thangdu, dakhna ha wai ha kham khrip du, bo khebo Madai majang sisi sal khlai ri kha la, O nisi lonma bangyayarao, bonsi tha ne nisi khe bo majang dao ri nang niya?”

²⁹“Odebani, jimu lingmu ni khlai hi, nisi waimu da nang

³⁰Bede thikhade, ebo habsao ni khrip subung eboni khlai hi waimu nang re. Nisi nang du thihi nisini Bupha Madai mithi du.

³¹Boni raji khe smai da lah, odese ebo khrip buthu khe nisi ne ri nang.”

³²“Dol bangyarao, da khin. Nisi ni Bupha nisi ne raji ri mane nangjao du.

³³Nisi don khe phain dada, dukhi saraone ri lah, ar sorgo ha, makhao thang phuyayaba ha, haro ji phuyayaba ha, rangkhoh gajam ja phuyayaba sorgoni rangkhoh ha, nisi ni rang khe thathi lah.

³⁴Nisi ni don braha dong, oraha ning nisi ni khah bo dong ma se.”

³⁵“Jengkhong khah hi ning, nisini thaophari khe phnang hi ning, salai hi dong lah,

³⁶disingba ni phrang bubra phaiphin ba ha, derga doba jang khru mane jon hi dongba lai jon lah.

³⁷Bubra phaiphin ba ha, lengrao khe smao hi, salai hi bubra goron phaiyarao ni khophal de hambi. Ang gibi khe thi du, bo jar ning bonsi ne khusi dang ri hi, bonsi jang khalai phang khampha nang.

³⁸Hogjer ha jathing, nokha nai hi jathing, bo phaiba ha, bo dangyasa salai hi dangba khe bo nuphai kha de bo ni khophal hambi.

³⁹Ebo khe nisi mithi lah. Noh ni bubra, makhao phai mane bubli khe mithi re thikhade, makhao khe hap ri nang niya.

⁴⁰Odebani nisi salai hi dong lah, nisi salaiya hi dongba ha, Marsini Basa phai ma.”

⁴¹Peter thiba, “Gabra, ebo daogari grao la jinthane se ning na khrip subung ne bo?” thihi sing ba.

⁴²Gabra thiphin ba, “Lonma gnang subung girikyaba, bubra ni don khe raokhiyarao ne gibi bubli ha nokhorsi ni jimu lingmu ri mane bo hoja saikhuyaba sere ja nang?

⁴³Olei ning dangba khe bubra phaiphin ba ha nuphai kha de, bo leng ni khophal hambi.

⁴⁴Gibi jang ang nisi khe thi du, bubra bo leng khe, boni don dongbasi ni basao ha bokhe hoja slam nang.

⁴⁵Thikhabo, bo leng boni bubra srap phaiphin nang niya thihi bao dada gibin leng miyah masainjikrao khe dohi suhi, jihi linghi baola ja re thikhade,

⁴⁶bo leng ni bubra khe, asa khlaiya hi dongba basain ha phai nang. Bubra bo khe dainso hi, lonyayarao ni basao ha bede dang ba, olei ning boni basao ha dang nang.

⁴⁷Leng, boni bubra ni nangjaothai khe mithi dada, bubra nangjaoba lai khusi dangya kha de, rao hi ning bo khe dohi suhi saja ri nang.

⁴⁸Thikhabo, bubra ni nangjaoba khe mithiya hi khusi dang re thikhade, bokhe bo khaisa dohi suhi saja ri nang. Sere gabang ri re bo ni phrang bangdao hi huseng ma. Sere ne gabang nepha re, boni ha bangdao hi sainphin ma.”

⁴⁹“Habsao ha wai haiger sing mane se ang phai ba, duha bo kham mane ang nangjao du!

⁵⁰Ang masi baptisma lahama dong, bo khe soyasi de, ani khah ha dukhu dong.

⁵¹Phirthi ha mili ri mani khlaihi ang khe phai ba bao ba? Niya, ang nisi khe thi du, nanglai ri mane se ang phai ba.

⁵²Duha ni phrang de, subung nokhorsi ha subung bowa degao lai hi, gatham gini jang nanglai nang, gini gatham jang nanglai nang.

⁵³Buphathu jarni basathu jang nam ja nang, basathu jarni buphathu jang nam ja nang; bumathu jarni bisik jang nam ja nang, bisikthu jarni bumathu jang nam ja nang; busumathu jarni bahamjikthu jang nam ja nang, bahamjikthu jarni busumathu jang nam ja nang”.

⁵⁴Subung buthu niha Jisu edehe thi ba, Sain jroba gede ni phrang jimi phaiba khe nisi nukha de, hadi ha ma nisi thi re, ar hadi bo ha re,

⁵⁵ode, sain yaosi gede ni phrang bar phaikha de, sain dung ma se, nisi thi re, ar olei ning ja re.

⁵⁶Nisi Giriklaiyarao! Jamaisiyarao! Habsao nokhasao khe naiba jang jathai khe mithi phu du, sumjabani dini dakhnani jathai khe mithi phuya ba?

⁵⁷Sumjabani nisi gibi grao khe bisar khlai phuya ba?

⁵⁸Bisardar ni sagang ha, ning jang nanglaiyaba ning khe bisar rimani, lama ha thangpha laiba ha bo jang mili mane smai lah. Niya khade, ning khe remyarao niha rem ri hi, bo ning khe phatho ha jeb ma se.

⁵⁹Ang nisi khe thi du, nini lagai, phoisa masi mang mang khe bo suphinya si de, oraha ni phrang ning baigo mai nang niya.