Read Dimasa Luka 14 Bible Online

Luka 14 - Dimasa bible

Luka 14

¹Lenggo Basain ha Pharisairao ni bising ha hoja saosi ni noh ha, bo makham jimane thang ba; boha bonsi bo khe naidao ba.

²Boha subung saosi, boni yao ar igah dujaoyaba, Jisu niha phai ba.

³Jisu Dara khe slingriyarao ar Pharisairao jang sainlai ba, Jini Dara ha Lenggo basain ha la hamriba ragao nang na ragaoya? ode bonsi khe sing ba.

⁴Thikhabo, bonsi phirik phirik dong ba. Odebani, Jisu limyaba subung khe yao remhi hamri dada haiha kha.

⁵Ode bo bonsi khe thi ba, Nisi ni bising ha asaba ni basa ar nisi ni musu jla, lenggo basain ha dikhor ha galai sing re thikha la, lenggo basain thikhabo sugu nang niya?

⁶Ebo grao khe bonsi thiphin phuya kha.

⁷“Mel ha subung girikyarao khamthan hamba hamba saikhoba khe Jisu nuhi daogari grao jang bonsi khe sainthi ba.

⁸Disingbani mel ha sereba nisi khe jimani khlaihi longre thikhade, khamthan hamdao ha da kham; ning tha dedaoyaba khe longla phu re.

⁹Longyaba bubra, ‘Ebo subung kham ma se, ning degao lah,’ ode thi re thikhade, mukhang gisim jahi khamthan hidao ha se ning khamphin ma.

¹⁰Thikhabo, ning khe long re thikhade, khamthan hidao ha kham lah. Odese ning khe longyaba bubra nini ha phai hi, ‘Lugu, khamthan hamba ha kham la phai,’ thi re thikhade, khrip ni sagang ha, ning man mai ma.

¹¹Jar khe sere sugu ma bao re, bo khe de hidao ri nang ar jar khe sere hidao ri re, bo khe de sugu nang.”

¹²Longyaba bubra khe Jisu thi ba, Sain ha ja thing, sari ha ja thing, mel slamba ha, ning jarni lugurao ar daphlung, ar hainthirao khe ode gnang ar noharirao khe da long lah. Bede thikhade bonsi bo ningthane suphin ma nangma se.

¹³Ning mel slamba ha, dukhisarao, hajaiba soyayarao, khorarao ar muthai ganarao khe long lah,

¹⁴ode thikhade, ning hamthai mai nang. Sumjabani thikhala, bonsi de ningthane suphin phu nang niya. Hamba subung baija phin khali ha ninthane suphin nang.

¹⁵Khalai khamyarao ni bising ha saosi Jisu khe thi ba, Madai ni raji ha mel jiyarao ni khophal hambi.

¹⁶Jisu bo khe thi ba, Subung saosi hor ha mel gedeba salai hi, subung gabang long ba.

¹⁷Mel jimane bubli jaba ha, longyarao khe, ‘Dei, phai la ga, khrip jadi khe salai blai kha,’ thihi long mane bo boni leng khe haiha ba.

¹⁸Thikhabo, bonsi khrip bo, saosi saosi thisingthai ni balam slam ba. Sagang thaoyaba, ‘Ang, hadi masi barai kha, bo khe mai mane thangma nang du, khasao hi ang khe map ri lah,’ thi ba.

¹⁹Ode gibin saosi, ‘Ang musu jla jor bowa barai kha, bo khe nai mane thangma nang du, khasao hi ang khe de map ri lah,’ thi ba.

²⁰Gibin saosi thi ba, ‘Ang noh jabani ang thangphu nang niya.’

²¹Leng thangphin hi, khrip ebo grao khe bubra niha khna ri ba. Bubra hamsi ning thamsi baigo kha. Ode boni leng khe thi ba, ‘Ning srap baigophin hi nolei ni lamayung ha, ar nolei ni lama gugui buthu ha, thanghi dukhisarao, hajaiba soyayarao, ar ganarao ode khorarao khe eraha longthim lah.’

²²Leng bubra niha thangphin ba, ‘Gedema ning saniba lai, ang dang kha, thikhabo hathan haglai bangbi kho’, thihi thi ba.

²³Noh bubra leng khe thi ba, ‘Lamayung ha, lama bijing ha, dongyarao niha ning thang hi, ani noh gablai mane subung buthu khe longbu lah.

²⁴Ang nisi khe thi du, ang longyaba subung buthu la, saosi bo ani mel ha jimane gathaya mu’.

²⁵Subung buthu bo jang thangpha ba khe bo naiphin dada, bonsi khe thi ba,

²⁶“Asaba bo ani ha phai kha de, jarni buma bupha ar bihih ar ansarao ar daphlungrao ar bahandaorao, ode jarni hayu khe maya nangya hi ang khe maya nangya thikhade, bo de ani rikphayasa ja phuya.

²⁷Sere jarni kross khe bain hi, ani yaohon rikphaya, bo de ani rikphayasa ja phuya.

²⁸Nisi ni bising ha asaba bo nohju dangma baore thikhade, bo kham dada noh dang blai mane rang dong na giri baodaya hi sere dong nang?

²⁹Ode niyakha la, bo dangba jen dada bo dang blai sophuya thikhade, nuyarao minithai ma se.

³⁰‘Ebo subung la noh dangba jenhi dang blai soya,’ malai thima se.

³¹Odehe, Raja saosi boni ha siphaiya rjingjhi dongyaba jang gibin Raja siphaiya rjing khon dongyaba jang jbah nanglai mane baigo re thikhade, bo khamhi gibin Raja khe de mane, boni rjingjhi siphaiya jang de nang na deya thihi baoda nang niya?

³²De nang niya bao kha de, gibin Raja gajain ha dongyaba ha bo haiyasarao khe haiha hi, mili mane grao khe khainsu nang.

³³Odelei ning nisi ni bising habo, sere niha dongyaba si don khe haigerya si de, ani rikphayasa ja phuya.”

³⁴“Sem hambi, thikhabo boni brabthai khe gma lang re thikha la, bedehe khlai hi brab ri phin ma?

³⁵Bo de hah ne khlai hi hamya, ar hah ha haphlam rimane bo hamya kha, odebani bo de subung buthu dangkhlai jao re. Sere niha khna mane khmao dong, bo khna la thing.”