Read Dimasa Luka 15 Bible Online

Luka 15 - Dimasa bible

Luka 15

¹Subung buthu gejesi, khajna khrangyarao ar subung phaphirao gabang, boni grao khe khna mane, boni ha phai ba.

²Pharisairao ar Dara khe slingriyarao, Jisu khe Ebo subung la phaphirao jang sumja bani jipha lai ba, thihi ber ba.

³Odebani, Jisu ebo daogari khe sainthi ba.

⁴“Nisi ni bising ha saosi niha melma rjasi donghi, ar bo buthu ni bising ha masi gma lang re thikhala, bedehe khlai nang? Gibin bisabri majhi sgu khe galang dada gma jaoyaba masi khe maiphinya si sere smaiya nang?”

⁵Bo naiphin kha ning, khaja sisi phakhrong ha bainbu hi,

⁶Jarni noh ha phaiphin dada, boni lugurao niha, ar noharirao khe longthim hi, bo thi re, ‘Ani melma gmayaba khe ang maiphin kha, dei, khajapha lah,’ ode thi nang.

⁷Olei ning ang nisi khe thi du, hamba subung bisabri majhisgu ni basao ha khaja ba thane de phaphi subung saosi, khah phinyaba ni basaoha sorgo ha nangdaothao ja ma.

⁸“Ode asaba masainjik saosi niha aduli majhi dong ba. Bu buthuni bising ha masi gmang la re thikhade, thaophari phnang hi, noh ha sip dada maiphinya si hamsi ning smai nang niya?

⁹Bo aduli khe maiphinba ha, lugurao ar noharirao khe longthim dada, ‘Ani aduli gmayaba khe ang maiphin bani ang jang khajapha lah,’ thihi bo thi nang.

¹⁰Odelei ning ang nisi khe thidu, phaphi subung saosi khah phin kha de, Madai ni deglarao boni basao ha khaja ma se.

¹¹Ode Jisu bonsi khe thi ba, Subung saosi niha basa gini dong ba.

¹²Basa gididaoyaba bupha niha thi ba, ‘Abai, ang don maiginyaba phantha khe duha anthane ri lah.’ Ode, bo subung basa gini ne ron ri kha.

¹³Khaisa basain ni yaohon ha, basa gididaoyaba, jarni phantha khe bojom khlai hi, gibin raji gajain ha thang la kha. Oraha bo suk jang boni phantha khe yaowai thar kha.

¹⁴Bo jarni rang khe haglai gmathar bani yaohon ha, bo raji ha asari galai kha, boha jimane giri kha.

¹⁵Bo raji ni subung saosi niha khusi smai mane bo thang ba. Bo subung jarni hono khe raokhi mane bo khe phadain ha haiha ba.

¹⁶Hono buthu jiyaba ahar khe bo jihi hukhri goma nangjao ba, bede thikhade bone saosi bo jimu riya.

¹⁷Bo baophin hi thi ba, ‘Ani bupha ni noh ha de manao jiyarao jiblaiya si mai jidu; thikhabo ang la hukhri hi eraha thih ma ja kha.

¹⁸Ang baija hi abai niha thangphin hi thi nang, Abai, Madai ar nini basao ha ang dang gajai kha,

¹⁹Nisi basa thihi thijao mane bo ang de gathaya kha; nini ha manao jiyarao ni bisingha saosi lai ning ang khe yaowai lah,’ thi ma.

²⁰Ode bo baija hi, boni bupha niha thangphin la kha. Bo gajain ha dongba ha boni bupha bo khe nuha ba jang hamsi ning khasao sisi jajao hi bo khaipha lang dada bo khe gabaopha hi khudim ba.

²¹Bo jarni bupha niha thi ba, ‘Abai, nokhasao ni Madai ni basao ha, ar nini muh ha phap khusi ang dang kha. Nini basa thijao mane ang gathaya kha.’

²²Thikhabo, boni bupha boni leng buthu khe thi ba, ‘Srap khlai hi rih hamdaothao khe labu hi, bone thu ri lah, boni yaosi ha gaosidam gain ri lah, ar boni igah ha yaphadap ga ri lah.

²³Musu jla phongyaba khe labu hi sthai lah. Khaja hi jing jilai nang.

²⁴Bede thikhade, ebo ani basa thih kha, thikhabo bo thangphin kha; bo gma ba, thikhabo duha de jing maiphin kha. Odehe bonsi mel jilai kha’.

²⁵Basa radaoyaba bo bubli ha phadain ha donghi ba, Bo phaiphin hi noh ha sophaiba ha damthai suthai khe bo khna ba.

²⁶Ode leng saosi khe longha hi, bo sing ba, ‘Ebo sumjadi ja ba?’

²⁷Leng bo khe thiba, ‘Nini buphlung hamhi ringhi phaiphin bani, nini bupha mususa phongyaba khe dain ri ba.’

²⁸Boha ning bo thamsi baigo hi noh ha hapma nangjaoya kha. Boni bupha boniha phai hi bokhe grao thi ba.

²⁹Thikhabo, boni bupha niha bo thi ba, ‘Nai lah, maithai glao jang nini khusi khe ang dang ri ba; nini grao khe ang dangkhlaiya. Thikhabo lugurao jang khajalai mane burunsa masi mang mang khe bo ning anthane riya.

³⁰Ebo nini basa la, langginrao jang nini don khe khma thar kha, bo phaiphin ba ha, boni khlaihi musa phongyaba khe ning dain riba kho.’

³¹Ode boni bupha bo khe thiphin ba, ‘Ani basa, ani ha ning ning la dong thi, ar ani ha dongba si bo nini ning.

³²Ebo nini buphlung de thih hi bo thangphin kha; gma hi bo khe jing maiphin kha. Odebani khaja hi khusi jang jing dongma nang du.’