Read Dimasa Luka 17 Bible Online

Luka 17 - Dimasa bible

Luka 17

¹Jisu boni rikphayarao khe thi ba, Subung buthu saosi bo galaiya hi dong nang niya, bo galai re; thikhabo, sere galai riyaba ni bubain risi bi.

²Sere ebo khasidao thaoyaba subung buthu ni bising ha, asaba khe bo galai ri re, mai honyaba longthai gedeba boni gorna ha khah dada, sagor ha lemsingba se bone phantha hamdao.

³Nisi ni bada buphlung phap khusi dang re thikhade, bokhe jo lah; ar bo khah phin re thikhade, bokhe map khlai lah.

⁴Sainsi ni bising ha, nisi ni basao ha alang sni bo dang gajai re thikha de, bo nini ha phai hi, Ang khah phin kha thi hi nini ha map sain re thikhade, bokhe map khlai lah.

⁵Rikphayarao Gabra khe thi ba, Jini lonma khe raodao ri lah.

⁶Gabra thiphin ba, “Yaolei grongsi lai nisi niha lonma dong khade, ebo malbari phang khe Ning jar jang jar gukhur hi, sagor ha japhin lah, nisi thi re thikhade, bo nisi ni grao khe mani nang.”

⁷“Nisi ni bising ha sere jarni leng niha, hah haliba ja thing, melma raokhiba ja thing, bo khusi dang hi noh ha phaiphin ba ha, Ning sangga jiphai nisi thi re?

⁸Ode thiyahi, Anthane makham salai ri lah, ang jiba ha rih ragaosisi phin hi, ning ang khe naiso lah, ode yaohon ha ning ji nang, nisi thi re.

⁹Jarni leng, boni grao khe mani bani, leng khe hamjaoma ri du?

¹⁰Odelei ning, nisi khe khrip khusi saniba lai, dangblai bani yaohon ha, nisi bo, Jing leng jabani se, dangma nangyaba khusi khe jing dangba se, thi lah.”

¹¹Odehe, Jerusalem gede Jisu thangpha langba ha, Samaria raji ar Galili raji ni gejer khe lailang ba.

¹²Nolei masi ha, bo hap hiba ha, khunthi jayaba subung jhi, bo khe goron ba.

¹³Bonsi gajain ha songthao hi, jirik khao ba, Jisu, slingriyah, ning jing khe khasao lah.

¹⁴Bonsi khe nuba jang, Jisu bonsi khe thi ba, Nisi thang hi Jonthai niha phnu ri lah. Bonsi lama ha thangsai baha ning ragao lang la kha.

¹⁵Bonsini bising ha, saosi jar hamphinba khe mithi dada, bo jirik khao hi Madai khe bakhan khlai hi phaiphin kha.

¹⁶Jisu ni igah ni rogong ha galai dada, boni ha hamjaoma riba. Bo de Samari subung se.

¹⁷Jisu thi ba, Subung jhi hamphinya na somo? Subung sgu la braha dong?

¹⁸Ebo gibin jadini subung se ning Madai khe hamjaoma rimane phaiphin ba?

¹⁹Jisu bo khe thi ba, Baija hi thang lah, nini lonma jang ning khe ham ri kha.

²⁰Pharisairao gejesi Jisu khe bakhali Madaini raji sophai ma thihi sing bani, bo bonsi khe thiphin ba, Madai ni raji de nujao hi phaiya.

²¹Saosi bo, Nai lah, eraha ning dong, na oraha ning dong thiphuya. Bede thikhade, nai lah, Madai ni raji nisi ni bising ha se dong ba.

²²Bo rikphayarao khe thi ba, Marsini Basa thanghi dongbani basain sainsi khebo nisi numa nangjao mani basain sophai nang; thikhabo nisi nu nang niya kha.

²³Nai lah, Bo oraha ning dong! niya kha de, bo eraha ning dong! thihi nisi niha thima se. Thikhabo, bo khe nai mane da baigo lah, ar bonsi jang da thangpha lah.

²⁴Nokhasao gurjliba ha, grongsi ni phrang gibin grongsi sosi jdan riba lai, Marsini Basa phaiba habo olei ja ma se.

²⁵Thikhabo, duhani jug ni subung buthu ni yao jang bokhe dukhu rihi dangkhlai da ma kho!

²⁶Noah ni basain ha jaba lai ning, Marsini Basa phai mani basain habo olei ja ma.

²⁷Noah rungha hapsing hi, dih limphai hi, bonsi khrip khebo sthaitharya si de, subung buthu jilai ba, linglai ba, ode miyah masainjik noh jalai ba;

²⁸Lot, thanghi dongba habo jaba lai ning, subung buthu jiba, lingba, barai ba, phain ba, gaiba ar slam ba,

²⁹Sodom ni phrang Lot baigo bani basain ha, nokhasao ni phrang wai ar gondok ni hadi ha hi bonsi khrip bo thih thar ba.

³⁰Marsini Basa nujao phai khali bo, olei jasosi ning ja ma se.

³¹Bo basain sophai khali ha, sere noh khimsao ha dong re, boni rangri khe laha mane, noh bising ha da nakhai thing; odelei ning sere phadain ha dong re, noh ha da thangphin thing.

³²Lot ni bihih khe wainso lah.

³³Sere jarni hayu khe sogoma bao re, bo bokhe khma nang, ar sere jarni hayu khe khma re, bo bokhe sogo nang.

³⁴Nisi khe ang thi du, bo horha de thuthan masi ha, subung gini thupha lai nang, saosi khe lang nang, saosi khe galang nang.

³⁵Masainjik gini, mai supha lai nang; saosi khe langla nang, saosi khe galang nang.

³⁶Subung gini phadain ha khusi dangpha lai nang; saosi khe langla nang, saosi khe galang nang.

³⁷Odebani, bonsi sing ba, Braha, Gabra? Jisu thiphin ba, Braha manggathi dong, oraha naowai buthu bojom jama se.