Read Dimasa Luka 18 Bible Online

Luka 18 - Dimasa bible

Luka 18

¹Nalai bo thaoyasi Madai bi hi, bonsi dongma nangma thihi, bonsi khe sling ri mane Jisu rikphayarao niha ebo daogari grao khe sainthi ba:

²Nolei masi ha, bisardar saosi dong ba, bo Madai khebo khinya, ar subung khe bo musi baoya.

³Bo nolei ha banjik saosi dong ba, ‘Ani sotru khe saja rimane bisar khlai lah,’ thihi bo nalai bo boni ha phai ba.

⁴Bisiba basain sosi bisardar maniyahi dong ba; thikhabo, yaohonthao ha, bo elei ning bao ba. “Ang Madai khe khinya, marsi khebo lekha riya thikhabo,

⁵ebo banjik nalai phaihi, ang khe jaokhu phaibani, boni bisar khe ang hamsisi khlai ri nang, niyakha de nalai phaihi bo ang khe yisisi khlai ma se.”

⁶Gabra thipha langba, Hamyayaba bisardar thiyaba khe nisi khah ha bao lah.

⁷Jarni subung buthu sain hor juru mane boni ha biyarao khe Madai bisar khlai nang niya? Budu lao ri nang kho?

⁸Ang nisi khe thi du, bonsi khe juru hi bo srap bisar khlai nang; thikhabo, Marsini Basa phai khali ha ebo habsao ha bo lonma nu nang?

⁹Jar khe hamba subung thihi malai khe musuyarao niha ebo daogari khebo Jisu sainthi ba:

¹⁰Sainsi khali subung gini, Madai bimane Madaikhoh ha thang ba. Saosi ning Pharisai ar gibin saosi la khajna khrangyaba.

¹¹Pharisai, jar sao jang elei ning Madai bi ba, ‘O Madai, ang de gibin subung buthu lai harbaoya, khah gibiyaba, ar langgin jayaba niya bani, nini basao ha ang khaja du. Ebo khajna khrangyaba lai de ang niyabani nini basaoha ang khaja du.

¹²Hapta si ha, alang gini ang hoh khongja mani du, ar aniha dongyaba si ni phrang majhi ha masi khe ninthane ang ri du.’

¹³Khajna khrangyaba la, gajain ha songhi, sorgo gede bo naikhu raoya, jarni khahbao do dada, bo biba, O Madai, ning ang khe khasao lah, ang de phaphi subung se, thi ba.

¹⁴Ang nisi khe thi du, bo Pharisai subung thane de khajna khrangyaba gajai giri hi noh ha thangphin kha. Bede thikhade sere jar khe sugu ma bao re, bokhe hidao rima, sere jar khe hidao ri re, bo sugu jaoma se.

¹⁵Subung buthu gejesi, bonsini ansarao ni basao ha yao deng mane, Jisu niha labu ba. Bonsi khe nuba jang rikphayarao bonsi khe jo ba.

¹⁶Thikhabo, ansarao khe boniha long hi, Jisu thi ba, ansarao ani ha haiha lah, bonsi khe da mathao. Sumjabani thikhala, Madaini raji eleiyaba subung buthu ni se.

¹⁷Ang gibi jang nisi khe thi du, sere Madaini raji khe ansa khajaba lai khajayayaba de boni bising ha hap nang niya.

¹⁸Hoja saosi boni ha thi ba, Slingriyah hamba, thaoglao ni hayu mai mane, sumjadi khusi khe ang dang ma nang ma? thihi sing ba.

¹⁹Jisu bo khe thiba, Sumjabani ning ang khe hamba thi ba? Subung saosi khe garhi de saosi bo hamba giri, bo de Madai se.

²⁰Dara buthu khe ning mithi du da; langgin da ja, subung khe da sthai, da khao, grao mosol jang saosi khe da thi sing, nini buma bupha khe man khlai.

²¹Bo subung thiphin ba, Ansa ni phrang ebo dara disa buthu khe ang mani hi phai ba.

²²Jisu khna hi bo khe thi ba, Ning dangma nangyaba masi khusi dong kho. Nini ha dongyaba si khe phain dada dukhi saraone ron lah, odese ning sorgo ha don mai nang; ar phai hi ani yaohon rikpha lah.

²³Thikhabo, ebo khe khnaba jang bo waimu nang kha, sumjabani thikhala, bo gnang subung se.

²⁴Bo waimu nangba khe nuhi, Jisu thi ba, Gnangrao ni khlaihi de Madaini raji ha hapma bislei du du!

²⁵Gnang subung Madaini raji ha hapba thane de, mihhajeng simi ni khmaophu ha hap ba laidao.

²⁶Bokhe khnayarao bokhe sing ba, Ode thikhala sere gophu nang kho?

²⁷Jisu thiphin ba, Subung dangphuyayaba khusi khe Madai de dangphu du.

²⁸Peter thi ba, Nai lah, jarni noh hah khe galang dada jing nini yaohon rikpha ba.

²⁹Jisu bonsi khe thi ba, Gibi khe ning ang nisi khe thi du, sere Madai ni raji ni khlai hi, jarni noh, bihih, khaphlungrao, buma ar bupha odehe jarni ansarao khe dangkhlai re thikhade,

³⁰Duha thanghi dongdu si, bo bangdao hi mai nang; ar phaiginyaba bubli habo thaoglao ni hayu mai nang.

³¹Ode, Jisu jarni rikphayarao khe gibin khlai hi longkhao dada, bonsi khe thi ba, Nisi khna lah! Jing Jerusalem ha thang du, oraha Marsini Basa ni grao ha, gorasalirao rebyaba khrip bo sophai ma se.

³²Jentailrao niha bokhe yaopha ma, bonsi bokhe musu ma, jo ma, khudi thuphra ma,

³³Bonsi bokhe su ma, ar sthai ma, thikhabo nokha saintham ha bo baijaphin ma se.

³⁴Thikhabo, rikphayarao, bonsini khlai hi huihi dengbani bo grao buthu khe bujiya. Odebani, Jisu sumjadi grao khe thi ba, bonsi mithiya.

³⁵Jisu Jeriko raji sohima ja ba ha, muthai gana saosi, lama bijing ha khamhi khrang jihi dong ba.

³⁶Subung gabang himlangba khe khna hi, bo sumjadi jaba, thihi sing ba.

³⁷Bonsi thi ba, Nazareth Jisu thangba se.

³⁸Bo jirik khao ba, Jisu, David ni basa! Ning ang khe khasao lah!

³⁹Sagang gede ha thangyarao bokhe johi, phirik phirik dongmane sani ba, thikhabo, bol jang, David ni Basa, ning ang khe khasao lah thihi bo jirik khao dao ba.

⁴⁰Jisu songthao dada, bokhe boni ha labu mane khlai hi sani ba. Bo sophai baha Jisu bokhe sing ba,

⁴¹Ninthane sumjadi khe ang dangma ning nangjao du? Bo thiphin ba, Gedema, muthai nuphinma ang nangjao du.

⁴²Jisu bokhe thiba, Ning nuphin lah, nini lonma jang ning ham kha.

⁴³Boha ning muthai nu kha, bo Madai khe bakhan khlai hi, Jisu khe rikpha kha. Subung buthu bokhe nuhi Madai khe bakhan khlai ba.