Read Dimasa Luka 20 Bible Online

Luka 20 - Dimasa bible

Luka 20

¹Sainsikhali Madaikhoh ha Jisu subung buthu khe slingri ba, ar hamba graojma khe sainthi saiba ha, Jonthairao ar Dara khe slingriyarao, hojarao jang phai ba,

²ode bo niha thi ba, Jinthane thiri sang, ebo khusi buthu khe dang mane nini ha ebo hok khe sere ri ba?

³Bo bonsi khe thiphin ba, ang bo grao thaisi nisi khe sing nang, ani ha thi lah,

⁴Johan, baptisma riyaba de sorgoni hukhum jang na subungni hukhum jang dang ba?

⁵Bonsi sainlai ba, Sumjadi khe jing thima? Sorgo ni phrang jing thikhala, bo ode thikhala nisi Johan ni grao khe maniyaba, thi ba,

⁶ar marsi ni phrang thikhade, subung githim laiyarao jing khe longthai jang lem ma se, sumjabani thikhala, bonsi Johan khe gorasali se thihi mani ba.

⁷Odebani, bonsi thiphin ba, Braha ni phrang phai ba, jing mithiya.

⁸Jisu bonsi khe thi ba, Sumjadi hok jang ebo khusi buthu khe dang ba, ang bo nisi ne sainthiya.

⁹Subung buthu niha ebo daogari grao khebo sainthi ba. Subung saosi grep ni bari slam hi, khusi dangyarao niha nepha dada, budu glao donghi mane, boni noh ni phrang thangla ba.

¹⁰Grep ni bathai khao mani bubli sophaiba ha boni phantha khe mai mane, bo jarni leng saosi khe, khusi dangyarao niha haiha ba. Thikhabo, khusi dangyarao leng khe su dada, yao khongja haiphin ha ba.

¹¹Bari ni bubra, gibin leng khe haiphin ha ba, thikhabo khusi dangyarao bo khebo do ba ar boni basao ha lasisi khusi dang hi yao khongja haiphin haba.

¹²Phin bo leng phintham ni khlai hi haiphin ha ba. Khusi dangyarao bo khebo suhi, sao dukhu riba ar baji ha bo khe lemkhla ba.

¹³Odehe, barini bubra edehe thi ba, bedehe ang khlaima kho? Ani maya ni basa khe ang haiha nang, bo khe de bonsi man khlai nang.

¹⁴Thikhabo, khusi dangyarao bo khe nuba jang, bonsi saosi jang saosi thilai ba, Ebo ning bubra ni basa, don ni phantha jaginyaba se; tha, jing bokhe sthai nang, odehe boni don jini ja la ma se.

¹⁵Odehe, bonsi barini bajiha bokhe lemkhla dada, bokhe sthai kha. Barini bubra bonsi khe bonsini basao ha bede khlai ma kho?

¹⁶Bo phai hi bari naisoyarao khe, sthai thar nang; ar grep bari khe gibin subung buthu ne ri nang. Ebo khe bonsi khna hi bonsi thi ba, Elei sosi de da ja thing.

¹⁷Thikhabo, bonsi khe naipha dada, Jisu sing ba, Ebo rebyaba grao de sumjadi? Haglai thi hi noh dangyarao, longthai khe nangjaoya hi dangkhlaiyaba, bo ning nohgrong ha nangdaothao ja kha.

¹⁸Asababo bo longthai ni basao ha galai re, bo glithar ma se; ar bo longthai asaba ni basao ha galai re thikhade, bo bokhe honkhli ma se.

¹⁹Dara slingriyarao ar Jonthairao bo daogari sainthiyaba, bonsi khe badai ba ning thi hi mithi ba, odebani Jisu khe rem ma bao ba, thikhabo, bonsi subung buthu khe khin ba.

²⁰Odebani bonsi hajora smai ba. Bonsi khrip subung lonma gnang thihi slam hi, Jisu khe sing rik hi jang rem mane bonsi khe haiha ba, bo khe remhi bisardar ar Latsap niha yaopha phumane.

²¹Ebo subung haihayarao Jisu khe thi ba, Slingriyah, jing mithi du, grao gibi khe ning johi slingriba thihi subung gede khase baoyahi marsirao Madai ni baothai khe ning sling ri du thihi jing mithi du.

²²Jinthane thi ri sang, Kaisar niha khajna riba la jadu na jaya?

²³Thikhabo, bonsini girikthai khe Jisu mithi hi bonsi khe thi ba,

²⁴Aduli masi khe anthane phnu ri lah. Ebo sere ni saogari ar sereni bumu? Kaisar ni bonsi thiphin ba.

²⁵Jisu thi ba, Ode thikhade, Kaisar ni jinis buthu khe Kaisar ne ri lah, ar Madai ni jinis buthu khe Madai ne ri lah.

²⁶Oraha dongyaba subung buthu ni sagang ha musi grao jangbo bonsi bokhe remphuya ar bo thiphinyaba grao khe bonsi gmanghi bonsi phirik phirik thao kha.

²⁷Subung thibani yaohon ha baijaphin nang niya thihi thiyaba Saddukairao Jisu niha phai hi thi ba,

²⁸“Slingriyah, basa-bisik maiya hi subung thih re thikhade, bo subung ni buphlung, boni noh brajik khe noh jama nang ma, odehe bo githi subung ni khlaihi bonsi basa bisik mai phu nang thihi Moses ebo dara khe reb lang ba.

²⁹Dei, duha khaphlung sni dong. Radaothaoyaba noh ja hi ansa maiya hi thih kha.

³⁰Ar boni buphlung giniyaba, boni noh brajik khe noh jaba, bobo ansa maiya hi thih kha.

³¹Ar gathamyaba bo noh jaba, olei ning sni bo noh ja ba, thikhabo ansa maiya hi thih thar kha.

³²Boni yaohon ha masainjik bo thih kha.

³³Ode thikhala, githirao baijaphin bani basain ha, sereni bihih ja ma? Khaphlung sni bokhe noh ja ba!”

³⁴Jisu bonsi khe thiphin ba, Ebo jug ni miyah masainjik noh ja du,

³⁵thikhabo, bo jug ha dong mane gatha hi subung thihyaba ni phrang baijaphinba ha noh ja nang niya kha.

³⁶Thih bo thih phin nang niya kha, sorgoni deglarao lai bonsi ja nang.

³⁷Githirao baijaphin ma thihi Moses ning ragaosisi phnu ba. Buphrip bejeng khambani grao ha, Gabra ning Ang Abraham ni Madai, Isak ni Madai ar Jakob ni Madai thihi bo khna ri kha.

³⁸Bo de githirao ni Madai niya, gathangrao ni Madai se. Bede thikhade boni khlai hi khrip bo thanghi dong ba.

³⁹Dara khe slingriyarao gejesi thi ba, Slingriya, ning hamsisi khlai hi sling ri kha,

⁴⁰Gibin grao khe bonsi singraoya kha.

⁴¹Thikhabo, Jisu bonsi khe sing ba, Bede khlai hi Krista, David ni sarik se thihi thiphu ba?

⁴²Bede thikhala, bakhan ni rajabthai ha, David jar ning elei thi ba, Gabra ani Gabra niha ani yaoda gede kham lah,

⁴³Nini sotrurao khe nini igah ni bakhla ha dengya si de, ning ani yaoda gede kham lah.

⁴⁴David bo khe Gabra thihi se long ba. Ode thikhala, bedehe Krista David ni basa ja phu nang?

⁴⁵Khrip subung boni grao khe khnaba ha Jisu jarni rikphayarao khe thi ba,

⁴⁶“Dara khe slingriyarao ni bising ha de girik lah. Sola glao thuhi, bonsi daobaima nangjao du; bikhoh ha ar mel ha ar jilaiba ha, bonsi khamthan hamba ha kham ma nangjao du.

⁴⁷Bonsi banjikrao ni don khe khao ji re, ar budu glao Madai bi re! Bangdao hi bonsi saja mai ji nang.”