Read Dimasa Luka 21 Bible Online

Luka 21 - Dimasa bible

Luka 21

¹Ode, Jisu naiding haba ha, gnangrao bikhoh ha khrangphain riba khe nu ba.

²Ar banjik dukhisa saosi phoisa magin dangsingba khe bo nu ba.

³Bo thi ba, Gibi jang nisi khe ang thi du, khrip gibinrao tha de, ebo banjik dukhisa bangdao hi ri ba.

⁴Gibinrao de gabang bonsi niha dongyaba haglai ni phrang se bonsi ri ba. Thikhabo, bo dukhisa la thanghi dong mane boni ha dongyaba si khe rithar kha.

⁵Subung gejesi, Madaikhoh ni grao khe sainlai ba; bo bislei majangsisi, ar Madai niha riyaba yaosandi ni grao khe bonsi sainlai ba, Jisu thiba,

⁶Elei basain bo sophai nang, boha ebo buthu khrip, nisi nuyaba longthai, degaoya hi dong nang niya, khrip longthai buthu hokhlai thar jaoma se.

⁷Bonsi singba, Slingriyah, bo la bakhali ja ma?

⁸Jisu bonsi khe thiphin ba, Nisi girik lah! Thokhi jaoyahi da dong. Gabang subung, ani bumu lahi phai nang, ar thi nang, Ang ning bo se, bubli sophai kha thihi. Thikhabo, bonsi jang da rikpha lah.

⁹Jbah ar nam khormu ni grao khe nisi khna khali ha da khin, bo buthu de sophai da ma ning; thikhabo, jam mani basain de niya kho.

¹⁰Ar bo thi ba, Jadi jang jadi jbah nanglai nang, ar raji masi jang raji masi, nam jalai nang.

¹¹Banglama hamsi ning raohi phai nang; gibin gibin hathan ha asari galai nang, ar limthai sathai bang nang, ar nokhasao ni phrang gmang thaosisi ar khin thaosisi jathai phnu nang.

¹²Thikhabo, ebo buthu khrip sophaiya sani ha, nisi khe rem nang; ar nisi khe dukhu ri nang; ar bonsi sunagog buthu ha langhi, phatho ha jebjao mane ani bumuni khlai hi Rajarao niha ar Bisardar niha nisi khe bonsi lang nang.

¹³Bo de, graojma khe sainthi mane nisine hamba hajora ja nang.

¹⁴Odebani, thiphin mani baodaya mane khlai hi, nisini khah khe rao ri lah.

¹⁵Bede thikhade, nisini sotrurao nisi khe niyathai phuya mane nisine ang girikthai ri nang.

¹⁶Jarni buma-bupha, khaphlungrao, hainthirao, ar lugurao nisi khe rem ri nang; ar nisini bising ha gejesi subung sthai nang.

¹⁷Ani bumu ni khlai hi khrip bo nisi khe naisle ma se.

¹⁸Thikhabo, nisi ni khnai dingsi bo gma jao nang niya.

¹⁹Nisini khah laoma jang nisi jar khe sogo nang.

²⁰Siphaiyarao Jerusalem khe gadingba khe nisi nukha ning bo khe hamya khlai ma thihi nisi mithi nang.

²¹Okhaliha de sere Judai rajiha dong re, hading buthu ha khailang thing. Sere nogor bisingha dong re, oraha ni phrang thang la thing; ar sere bajiha dong re, bising ha da hap thing.

²²Madai ni laisi ha reb hi dongyaba khrip sophai rimane okhali ni basain de baslai labani basain ja nang.

²³Bo basain ha de, sao khonggin jayarao ar nana bamyarao ne de bisi dukhu ja nang! Bede thikhade, ebo rajini basao ha hamsi ning dukhu sophai hi, ebo subung buthu ni basao ha thamsi sophai nang.

²⁴Bonsi gabang subung khe seng jang dain ma, gibin subung buthu khe de leng jamane khrip jadini rajiha langthar ma, ar Jentail saraoni basain jamya si de Jerusalem khe Jentailrao gasep ma.

²⁵Ode, sain, dain ar sathrai buthu ha gmang thaosisi sin phnu ma, sagor ar dithon biringba khe khinbani, mulugni raji buthu asama giri dong ma.

²⁶Subung buthu habsao ha japhai ginyaba khe baohi, khinma jang thi wai ma, bede thikhade, nokhasao ni raothai buthu maoma se.

²⁷Odehe, Marsini Basa, raothai ar muima gedeba jang, jimi ha phaihi nujao ma.

²⁸Ebo buthu sophai kha ning, nisi songkhu hi naikhu lah; nisini khojao mani sampha kha.

²⁹Jisu bonsine ebo daogari khebo sainthi ba, “Thaikhrao phang ar khrip bongphang buthu khe nai lah.

³⁰Bo buthu ni balai gili baigo khali, jalang sophai kha thihi nisi mithi du.

³¹Odelei ning khrip ebo buthu japhaiba khe nisi nukha ning Madai ni raji sampha phai kha thihi nisi mithi nang.”

³²Ebo buthu japhaiya sani ha, duha thanghi dongyarao, khrip de thih thar nang niya.

³³Nokhasao ar habsao jam lang nang, thikhabo ani grao de jam nang niya.

³⁴Odebani, girik hi dong lah! Jiba lingba ha suk smai hi, ju baola jang, ar habsaoni waimu jang gablai hi da dong; bo basain khali ha de dukhon ha nangba lai nisini basao ha japhai nang.

³⁵Bede thikhade, habsaoni khrip subung buthu ni basao ha olei ning japhai nang.

³⁶Odebani, japhai ginyaba bubli khe lailang phu mane, ar nisine raothai maiphu mane ar Marsini Basa ni sagang ha songphu mane, nalai bo bi hi salai dada dong lah.

³⁷Sainmidi Jisu Madaikhoh ha slingri ba, hor ha de bo Oliv thiyaba hading ha thanghi thu re.

³⁸Phorong midi subung buthu boni grao khe khna mane Madaikhoh ha bojom ja re.