Read Dimasa Luka 22 Bible Online

Luka 22 - Dimasa bible

Luka 22

¹Humao giriyaba hon ni mel, Baiglai Mel thiyaba, sampha phai kha.

²Jonthairao ar Dara khe slingriyarao, subung buthu khe khin bani, Jisu khe phirik phirik sthai mani lama smai ba.

³Jhigin ni bising ha, Juda Iskariot thiyaba ni bising ha Soithan hap ba.

⁴Odehe, bo thang dada, bedehe bo Jisu khe rem rima thihi Jonthairao ar Madaikhoh raokhiyarao ni hojarao jang sainlai ba.

⁵Bonsi khajahi bone rang ri mane grao hanggai ba.

⁶Bo jajao hi subung buthu jang mithi jaoyahi, Jisu khe bonsini yao ha yaopha mane hajora smai kha.

⁷Humao giriyaba mel ha, Baiglaini Melni khlai hi, melma basa buthu khe sthai mani basain sophai kha.

⁸Jisu, Peter jang Johan khe elei sanihi haiha ba, Nisi jinthane Baiglai Busuni jimu salai tha.

⁹Bonsi bo khe sing ba, Braha salai mane ning jing khe nangjao ba?

¹⁰Bo thiphin ba, Nisi nogor ha hap hiba ha, subung saosi dihdig jang dih khaoba khe nisi goron nang. Bo hapyaba noh ha bokhe rikpha lah.

¹¹Ode, noh ni bubra niha thi lah, Slingriyah ning khe thidu, ani rikphayarao jang Baiglaini mel jhiginyaba nohkhoh gedeba braha?

¹²Bo basao ni khutha masi khe nisi ne phnu nang. Oraha nisi khrip jadi salai hi dengyaba khe mai ma se. Oraha ning jinthane salai lah.

¹³Odehe bonsi thang dada bonsi niha bo sainthiba lai ning khrip nuhi ba. Odehe, bonsi oraha Baiglaini mel salai kha.

¹⁴Makham jimane bubli sophai kha. Jisu jarni rikphayarao jang khalai phang khampha kha.

¹⁵Bo bonsi khe thi ba, Ang dukhu maiya saniha, nisi jang ebo Baiglaini mel khe jima hamsi ning nangjao du.

¹⁶Ang nisi khe thi du, Madaini raji ha, gibiyaba mel phaiya si de, ang ebo khe ji nang niya kha!

¹⁷Ode, bela khe lahahi, Madai niha hamjaoma rihi thiba, Ebo khe lahahi nisi ronlai lah,

¹⁸Ang nisi khe thi du, Madaini raji sophaiya si de, duha ni phrang, ebo grep bidih khe ang ling nang niya kha.

¹⁹Ode, bo hon khe bo lahahi, Madai niha hamjaoma ri ba. Bo khe sgao hi bonsine ri ba, Ebo ning ani saomang, nisine riginyaba. Ang khe wainso mane ebo khe dang lai lah, thi ba.

²⁰Odelei ning, bonsi jibani yaohonha, bela khe laha dada, Ebo ning nisine baigoyaba ani bithi, grao gadain khayaba se, thihi thi ba.

²¹Thikhabo, nai lah, ang khe remginyaba subung ebo basang ha ang jang baosi dongpha du.

²²Marsini Basa de Madai salaiba lai ning thang ma nang ma, thikhabo remriyaba ni khlai hi bisi bubain risi nang!

²³Bonsini bising ha sere oleiyaba khusi dangma thihi bonsi saosi jang saosi singlai ba.

²⁴Bonsi ni bising ha, sere dedaothao jama thibani graoha rikphayarao niyalai ba.

²⁵Jisu bonsi khe thi ba, “Jentail saraoni rajarao, jarni subung buthu ni basao ha, khemotha jang yaowai re, ar hamba khusi dangba thihi thi re.

²⁶Nisini bisingha de elei ja nang niya; thikhabo, nisini bisingha dedao thaoyaba gidi thaoyaba lai dong thing, ar naisoyaba leng lai dong thing.

²⁷Sere dedao ja ma, jimane khamyaba na bone makham samlai khu riyaba? Gibi jang ning jimane khamyaba dedao. Thikhabo, ang de nisini bising ha makham khu riyaba lai dong ba.”

²⁸“Ang dukhu jayaba ha nisi ang jang dongpha ba,

²⁹ani bupha anthane raji riba lai ning, ang bo nisine ri du.

³⁰Ani raji ha nisi, ani basang ha jihi linghi dongphu mani khlai hi, ar Israel sengphong jhi gini ni basao ha nisi Rajani khamthan ha khamphu ma.”

³¹Simon! Simon! Khna lah! Phadain dangyaba maigrik ni phrang maijubu khe gibin khlaiba lai, hamba hamya gibin khlai mane nisi khe sain du.

³²Thikhabo, nisini lonma khe gmaya mane ang bi du, ning ani gede phaiphin khali, nini daphlungrao khe rao ri lah.

³³Peter Jisu khe thiphin ba, Gabra, phatho ni ha ning jang thangma, ar thihginyaba ha bo ang ning jang thangpha ma se.

³⁴Jisu thi ba, Peter, ang ning khe thi du, dini hor ha, alang tham ning ang khe mithiya thihi thiyasi de daono gisi nang niya.

³⁵Odehe, Jisu jarni rikphayarao khe sing ba, Juli ar yaphadap langya hi nisi khe ang haihaba ha, asaba soyahi nisi dong ba? Musi giri dongya, bonsi thiphin ba.

³⁶Bo bonsi khe thi ba, Duha la sere niha seng ar juli dong, bo lang la thing; ar sere niha seng giri, bo jarni rih phain dada barai la thing.

³⁷Bede thikhade, ang thi du, phaphirao jang baosi ning sainpha jao kha thihi rebyaba ani basao ha sophaima ja kha. Sumjabani thikhala, ani basao ha rebyaba grao khrip sophaima ja kha.

³⁸Boni rikphayarao thi ba, Nai lah, Gabra, eraha seng magin dong! Ja kha bo thiphin ba.

³⁹Bo baigolang hi, nalai lai ning Oliv hadingha bo thang ba, boni rikphayaraobo, bo jang rikpha ba.

⁴⁰Bo hathan ha sohi dada, bonsi khe thiba, Naigrik ha galaiya mane nisi bi lah.

⁴¹Bonsi ni phrang khaisa jaindao hi thang dada, bo yasgu thuhi bi ba.

⁴²Abai, ning nangjao re thikhade, ebo bela khe ani phrang disai lah. Thikhabo, ang nangjaoba lai niyahi, ning nangjaoba lai ning ja thing.

⁴³Sorgoni degla saosi boni ha nujao hi, bone raoma ri ba.

⁴⁴Bo hamsi ning waimu nang bani khah ri hi biphin ba; boni glimdih thijao lai hah ha galai ba.

⁴⁵Bo bi blai dada, baija hi boni rikphayarao niha thangphin baha, bonsi mudri jang gablai hi thuba khe bo nuhi ba.

⁴⁶Bo bonsi khe thi ba, Nisi sumjabani thu ba? Naigrik ha galaiya mane baijahi bi lah.

⁴⁷Bo grao thisaiba ha ning, subung buthu sophai ba, rikphayarao jhigin ni bising ha saosi, Juda thiyaba subung gabang labu hi Jisu khe khudim mane phai ba.

⁴⁸Thikhabo, Jisu bo khe thi ba, Juda, Marsini Basa khe khudim dada ning rem ri ma?

⁴⁹Rogong ha dongyarao, japhai ginyaba khe nuhi, Gabra, jing seng jang dain ma? thihi sing ba.

⁵⁰Odehe, bonsini bising ha saosi, Jonthaima ni lengni yaodani khmao khe dainkhao kha.

⁵¹Thikhabo, Jisu thiba, Elei jang ning ja kha! Bo subungni khmao ha yao dopha dada bo khe ham riphin ba.

⁵²Bo khe rem mane phaiyarao, Jonthairao ar Madaikhoh khe naisoyarao ar hojarao niha Jisu thi ba, Ang khe makhao khe remba lai rem mane seng, daobu labuhi phai ba?

⁵³Sain midi Madaikhoh ha nisi jang ang dongpha ba; thikhabo, nisi ang khe rem ma baoya. Duha de nisini bubli ja kha, ar andarni hukhum yaowaiyaba bubli ja kha.

⁵⁴Odehe, Jisu khe bonsi rem dada, Jonthaima ni noh ha langpha ba; ar Peter de gajain ni phrang bo khe rikpha ba.

⁵⁵Hakhli ha bonsi wai suba, oraha waisi khamyarao niha Peter bo kham hi ba.

⁵⁶Wai jdanyaba ha lengjik saosi bo waisi khamba khe nuha ba; bo khe naipha dada thi ba, Ebo subungbo Jisu jang dongphayaba saosi se!

⁵⁷Thikhabo, Peter niya ba, Masainjik, ang bokhe mithiya! thihi thi ba.

⁵⁸Khaisa yaohon ha, gibin subung saosi Peter khe nuhi thi ba, Ningbo bonsini bising ha saosi ning! Thikhabo, Peter thiphin ba, Lugu, ang de niya.

⁵⁹Gontha si ni yaohon ha, gibin subung saosi thi ba, Ebo subungbo gibi jang ning Jisu jang dongpha ba; bobo Galili rajini subung se!

⁶⁰Thikhabo, Peter bo khe thiphin ba, Lugu, sumjadi khe ning thi ba, bokhe ang mithiya! Bo grao sainthiba ha, daono gisi ba.

⁶¹Gabra naiphin hi Peter khe naiha ba, ar Peter, dini ha daono gisiya sani ha alang tham ning ang khe mithiya jamai si ma Gabra boni ha thiyaba khe wainsophin ba.

⁶²Odebani, Peter baji gede baigo langhi hamsi ning gra ba.

⁶³Jisu khe remyarao bokhe minithai hi su ba.

⁶⁴Boni mukhang khe khaphong hi bokhe bonsi sing ba, Sere ning khe do ba? Ning thi sang!

⁶⁵Ar bonsi hamya grao gibin gibin jang siji hi bokhe ran ba.

⁶⁶Phorongma ha, Hojarao, Jonthairao ar Dara khe slingriyarao, bojom jalai hi Sanhedrin ha bo khe langpha ba.

⁶⁷‘Ning Krista ning thikha de, jing khe thi lah’! bonsi thi ba. Bo bonsi khe thiphin ba, “Nisi khe ang thi re thikhade, nisi ang khe lon nang niya,

⁶⁸ang nisi khe grao sing re thikhade, nisi ang khe thiphin nang niya.

⁶⁹Thikhabo, duha ni phrang de Marsini Basa judao thaoyaba Madaini yaoda gede ha khamba khe nisi nu nang.”

⁷⁰Bonsi khrip thilai ba, Ode thikhade, ning Madaini Basa ning? Bo thiphin ba, Nisi ang ning thihi thi du.

⁷¹Ode, bonsi thi ba, Gibin sakhi musi jing nangdaoya kha! Bo jarni khuh jang thiyaba khe jing khna kha.