Read Dimasa Luka 24 Bible Online

Luka 24 - Dimasa bible

Luka 24

¹Sainsni ni basain sagangthao ni phorongma ha, masainjikrao thao midim bonsi salaiyaba khe langhi mangkhlong ha thang ba.

²Mangkhlong daoglap ni phrang longthai disaijao hi dongba khe bonsi nuhi ba,

³ode bonsi bising ha hap ba, thikhabo bonsi Gabra Jisu ni manggathi khe nuya.

⁴Bonsi nuya bani waimu nanghi dongba ha, subung gini, rih guphu phin hi, bonsini rogong ha songpha phai ba.

⁵Hamsi ning khin hi, masainjikrao hah ha gonggalai ba ha, subung buthu bonsi khe thi ba, “Nisi sumjabani githirao ni bising ha gathang khe smai ba?

⁶Eraha bo de giri kha, bo baijaphin kha. Galili raji ha bo dongba ha nisi niha thiyaba khe wainso lah.

⁷Marsini Basa de subung phaphirao ni yao ha yaopha jao ma, kross ha dikthai ma, ar saintham ha baijaphin ma, bo thiyaba khe wainso lah.”

⁸Bo thiyaba grao buthu khe masainjikrao wainso phin kha,

⁹mangkhlong ni phrang thangphin hi, bonsi khrip grao khe jhiseh ar gibinrao niha khna ri ba.

¹⁰Bo masainjikrao de Mari Magdalin, Joana ar Mari, Jakob ni buma, bonsi ar gibin masainjikrao se.

¹¹Thikhabo, rikphayarao la masainjikrao thiyaba grao khe grao haglai thihi bao ba, odebani bonsini grao khe bonsi lonya.

¹²Thikhabo, Peter baija dada, mangkhlong gede khailang ba; bo gonggalai hi naiba ha, bo rih miyao dudu phinyaba khe garhi de musi khebo nuya, ar bo noh ha thangphin hi, sumjadi japhai ba, bo gmang ba.

¹³Okhali ni basain ha boni rikphayarao ni bising ha subung gini, Emau nolei gede thang ba. Jerusalem ni phrang mel sni lai jain du.

¹⁴Bo bubli ha japhaiyaba grao khe sainlai ba.

¹⁵Bonsi hemlang hi grao sainlai saiba ha, Jisu jar ning bonsi niha sophai hi bonsi jang thangpha ba,

¹⁶bonsi bo khe nu ba, thikhabo bo sere thihi bonsi mithiya.

¹⁷Jisu bonsi khe thi ba, Nisi sumjadi grao khe sainlai ba? Waimu phnu hi bonsi songthao ba.

¹⁸Bumu Kleopa thiyaba bokhe sing ba, Jerusalem ha donghi, dini dakhna ni grao baigoyaba jathai khe ning sao jang se ning mithiya hi dong ba?

¹⁹Sumjadi grao? bo singalai ba. Bonsi thi ba, Nazareth Jisu ni grao. Madai ar khrip subung ni muh ha boni grao jang raothai ni khusi dang phuyaba gorasali ni grao,

²⁰bokhe jarni Jonthairao, ar hojarao thih mane bokhe yaopha ba, ar bokhe kross ha dikthai bani grao buthu khe.

²¹Jing la, Israel sarao khe sogo mane se jing asa khlai ba; bo se ning niya, okhali ni phrang dini jang saintham ja kha.

²²Jini bising ha masainjikrao gejesi jing khe gmang rila ba, phorongma ha bonsi mangkhlong ha thang ba,

²³thikhabo, bonsi Jisu ni manggathi khe nuya bani, bonsi phaiphin hi, jing sorgo ni degla khe nu ba, bonsi jini ha thi ba, bo de thangphin kha thihi bonsi thiphai ba.

²⁴Ode jini bising ha, gejesi mangkhlong ha thang ba, ar masainjikrao thiba lai ning bonsi nuhi ba, thikhabo bokhe de nuya.

²⁵Odehe, Jisu bonsi khe thi ba, Nisi subung gibirrao! Gorasalirao grao sainthiyaba khrip khe mani bani balam ha khah raoyarao!

²⁶Krista, boni muima ha hap mane ebo dukhu buthu khe mai ma nang ma niya?

²⁷Ode, Moses ni laisi buthu ni phrang jenhi khrip gorasalirao rebyaba grao buthu khe Jisu bonsine bujai ba.

²⁸Thangma baoyaba nolei ha bonsi sophaima ja ba ha, Jisu bokhe lailang maisi ba,

²⁹thikhabo, bonsi bokhe mathao ba, Jing jang dongpha lah, duha sari bo ja kha ar andar bo ja ma kha.

³⁰Bonsi jang jimane khalai khamba ha, hon khe lahahi bo hamthai ri ba, sbai hi bo bonsine ron ri ba.

³¹Olei baha, bonsini muthai khru lang kha, ar bonsi bokhe basao mithi kha, thikhabo boha ning bo gma langla kha.

³²Bonsi thilai ba, Lama ha bo jini ha grao johi Madaini laisini grao khe bo bujaiba jang jini khah bising ha sring jaba niya?

³³Ode, bonsi srap ning baija hi, Jerusalem gede thangphin ba. Oraha rikphayarao jhiseh jang ar bo jang dongphayarao bojom jalaiba khe bonsi nuhi ba,

³⁴ar bonsi thi ba, Gibi jang Gabra baijaphin kha, Simon nihabo bo nujao ba.

³⁵Bonsi gini bo, lama ha japhaiyaba ar bedehe Gabra hon sbaiba jang bonsi bokhe basao mithiba khe bonsi niha sainthi ba.

³⁶Bo grao sainthi saibaha, Jisu jar ning bonsini sagangha songphai hi bonsi khe thi ba, Nisini basao ha shanti dong thing.

³⁷Bonsi hamsi ning khin ba; bonsi bese khe nu kha thihi bao ba.

³⁸Odebani, Jisu bonsi khe thiba, Sumjabani nisi khin ba? Sumjabani nisini khah ha lonsoya ba?

³⁹Ani yao ar igah buthu khe nai lah. Nisi ang jar se thihi nu nang; ar ang khe yao dopha hi nai lah, ang khe nisi nuba lai bese de bahain begreng giri.

⁴⁰Ebo khe thihi bo bonsi niha boni yao ar igah khe phnu ba.

⁴¹Ode, bonsi khaja bang bani bonsi lonsingya ja ba, ode bonsi gmang bani bising ha, bonsi niha thi ba, “Eraha asaba jimani dong?”

⁴²Bonsi nah saoyaba khe bone ri ba,

⁴³bonsini sagang ha bo bokhe ji ba.

⁴⁴Ar bonsi khe thi ba, Nisi jang ang dongpha ba ha, nisi niha sainthiyaba ebo buthu ning. Moses ni Dara ha gorasalirao ni laisi bajap ha ar Bakhan ni Rajabthai ni laisi ha rebyaba ani grao khrip bo gibi sophaima nang ma.

⁴⁵Ode, Madai ni laisini grao khe mithiso phu mane, bo bonsi ni khah khe khru ri kha.

⁴⁶Ar bonsi khe thi ba, Edehe ning reb da, Krista sao ha dukhu mai hi, nokha saintham ha baija phin ma,

⁴⁷ar Jerusalem ni phrang jenhi, khah phin bani grao, ar phap khe map khlai bani grao khe khrip jadi niha sainthi ma nang ma.

⁴⁸Khrip ebo ni grao ha sakhi riyarao nisi ning.

⁴⁹Ar sumjadi ani bupha hanggai ba bokhe ang jar nisine ri nang. Thikhabo, nisini basao ha basao ni phrang raothai phaiya si de nisi Jerusalem ha jonhi dong lah.

⁵⁰Ar bo bonsi khe nogor ni phrang Bethani nolei sosi langpha ba. Oraha bo yao sugu dada bonsi khe hamthai ri ba.

⁵¹Bo bonsi khe hamthai ribani yaohon ha, bonsi khe gar dada sorgo ha sugu langjao kha.

⁵²Bonsi bokhe khlim hi, Jerusalem ha thangphin kha.

⁵³Ar khajasisi Madai khe bakhan khlai hi Madaikhoh ha nalai dongsong ba.