Read Dimasa Luka 4 Bible Online

Luka 4 - Dimasa bible

Luka 4

¹Jisu Bese Gathar jang gablai hi, Jordan dihbu ni phrang phaiphin dada, Bese Gathar jang bo khe hajengling ha langpha ba.

²Oraha basain jang bisagin ni bising ha bokhe Diabol naigrik ba. Ode, bo basain buthu ha musibo jiya. Yaohonthao ha bo hukhri jao kha.

³Diabol bo khe thi ba, Ning Madai ni basa thikhade, ebo longthai khe hon jamane grao ri lah.

⁴Jisu bo khe thiphin ba, Subung de hon jang se ning thangya thihi laisi ha rebyaba dong.

⁵Diabol bo khe hathan guju ha langpha dada muphrip gasi ha habsao raji khrip khe phnu ba.

⁶Ode, Diabol bo khe thi ba, Ebo buthu khrip ni basao ha hukhum jang raoma anthane ri kha. Ang sere ne rima nangjao re, ang riphu du.

⁷Ning ang khe khlim re thikhade, ebo buthu khrip nini jathar nang.

⁸Jisu bo khe thiphin ba, Ning jarni Gabra Madai khe khlim lah, ning boni khusi khe se ning dang lah, ode thihi laisiha reb du.

⁹Odehe, Diabol bo khe Jerusalem ha langpha hi, Madaikhoh ni nohkhu ha songri dada, bo khe thi ba, Ning Madai ni basa thikhade, jar khe eraha ni phrang galai lah.

¹⁰Madai ni laisi ha reb du, ning khe juru mane bo jarni deglarao khe haiha nang,

¹¹Bonsi ni yao jang ning khe bamkhu ma. Niyakha de igah ha longthai nang hi bumai nangma se thihi reb du.

¹²Jisu bo khe thiphin ba, Ning jarni Gabra Madai khe nai nai ma da bao, thihi laisi ha reb du.

¹³Odehe, Diabol Jisu khe khrip naigrik jang nainai hi boni yaohon ha khaisa bubli ni khlai hi bo ni phrang degao lang kha.

¹⁴Odehe, Jisu bese ni raothai jang Galili ha thangphin kha. Ode bo haphai ha boni grao gubblung thar kha.

¹⁵Bonsini sunagog ha bonsi khe sling ri ba. Subung buthu khripbo bo khe sugu hi khaja pha ba.

¹⁶Ode Jisu jar deyaba juyaba nolei Nazareth ha thangphin ba. Ode, nalai dangba lai ning Lenggo basain ha Sunagog ha hap hi Madai ni laisi khe phuri mane songkhu ba.

¹⁷Gorasali Isai ni laisi khe boni ha ri ba, ode bo laisi thonyaba khe khru dada olei rebyaba khe bo phuri ba.

¹⁸Gabra ni bese ani basao ha dongbani, Dukhisarao niha hamba graojma khe sainthi mane bo ang khe saikho ba. Leng jahi dongyarao khe haiger ri mane, Ganarao muh nuphin mani grao khe sainthi mane, ar Dukhu rijaoyarao khe sogo mane,

¹⁹Gabra ni khah khusi jayaba maithai ni grao khe sainthi mane bo ang khe haiha ba.

²⁰Odehe, laisi bothon khe bo thon khuphin hi dangyasa ne riphin dada, bo kham ba. Ode sunagog ni subung buthu khripbo bo ni basao ha muh galai ba.

²¹Bo bonsi khe thi ba, Madai ni laisi ni grao, nisi dini ha khnayaba, sophai kha.

²²Bo khasaoma ni grao joyaba khe khnayarao khna hi gmang ba. Odebani, khripbo bo jang khajapha ba. Bonsi thilai ba, Bo Josep ni basa niya?

²³Bo bonsi khe thi ba, Daktor, ning jar khe ham ri lah. Kapernaum nolei ha ning dangyaba khusi, jing khnayaba khe ebo jarni nolei ha bo dang lah, thihi nisi thi nang.

²⁴Ode bo bonsi khe thida ba, Ang gibi jang nisi khe thi du, jarni nolei ha de saosi bo gorasali khe lamjaoya.

²⁵Ang gibi jang nisi khe thi du, Elijah thanghi dongba basain ha hadi hayaba ni habsao ha asari galai ba. Boha Israel rajiha banjik gabang dong ba.

²⁶Thikhabo, bonsi ni bising ha saosi niha bo Elijah khe haihaya, Sidon raji ni Zerephat ha banjik saosi dongba, boni ha se ning haiha ba.

²⁷Gorasali Elisa thanghi dongbani basain ha bo, Israel raji ha khunthi jayaba subung gabang dong ba. Thikhabo, Suria raji ni Naaman khe garhi de saosi khe bo ham riya.

²⁸Ebo grao khe khnaba jang, Sunagog ha dongyarao khrip bo, boni basao ha thamsi baigo ba.

²⁹Ode bonsi baija dada Jisu khe nolei ni phrang rikhon hi bonsini nolei khro ni longrang ha langpha hi, braha ni phrang bo khe dangkhla mani khlai hi bonsi lang ba.

³⁰Thikhabo bo de bonsi ni gejer ni phrang thang la kha.

³¹Galili raji ni nolei masi Kapernaum ha thang dada Lenggo basain ha subung buthu khe bo sling riba.

³²Khemotha jang bo sling ri bani boni slingrithai khe subung buthu khrip bo gmang ba.

³³Sunagog ha sgo bese gusu gajaoyaba dong ba. Bo bol jang jirik khaohi thi ba,

³⁴Nazareth Jisu, jing khe sumjadi khlaima bao ba? Jing khe sjam mane phai ba? Ang mithi du, ning Madai ni subung gathar se.

³⁵Jisu bo khe jo dada, Ning phirik phirik dong lah, bo subung ni phrang baigo bu lah, thihi thiba jang, bo subung khe sgo sgain hah ha galai rihi, boni bising ni phrang baigo hi thang la kha.

³⁶Bonsi khrip bo gmang lai hi thi lai ba, Ebo la sumjadi grao ja kha? Boni khemotha ni grao jang khusi dangphuyaba raothai jang bese gusu buthu bo baigo lang du!

³⁷Ode, bo haphai ni khrip hathan buthu ha boni grao gubblung thar kha.

³⁸Bo baija langhi sunagog ni phrang baigo ba, ar Simon ni noh ha hap hi ba. Ode, Simon ni busuma limba raobani bonsi boni khlai hi khainsu ba.

³⁹Jisu boni rogong gabasi ha songpha dada limthai khe bo joba jang limma jam kha. Bo masainjik baija hi bonsi ne naiso nuso kha.

⁴⁰Ode, sainjro didih ha gibin gibin limyarao sayarao khrip khe boni ha labu ba, ode bonsi khe khrip ni basao ha yao deng hi hamthai ri ba.

⁴¹Sgo sgain buthu bo, Ning de Madai ni Basa se, thi hi bol jang jirik khao dada ar subung buthu ni sao ni phrang baigo lang ba.

⁴²Phorong nokha naiba jang bo baigo lang hi hagra siri siri hathan ha thang ba, ode subung buthu bo khe smai hi goron ba jang bonsi bo khe mathaoma bao ba.

⁴³Thikhabo, bo bonsi khe thi ba, Gibin nolei buthu habo Madai ni raji ni hamba graojma khe sainthi ma nang du, olei dangmane ning ang khe haiha ba se.

⁴⁴Odehe, bo Judai raji ni sunagog buthu habo grao sainthi phalang ba.