Read Dimasa Luka 5 Bible Online

Luka 5 - Dimasa bible

Luka 5

¹Sainsi khali subung buthu Madaini grao khna mane bonsi githim phaiba ha, Genesaret ni dihkharnai dergong ha Jisu song ba.

²Ode, kharnai dergong ha, rung magin dongyaba khe bo nu ba. Thikhabo, nah remyarao baigo dada, bonsi jarni jeh khe susa ba.

³Simon ni rung masi ha bo gakhu dada, bo khe sani ba, dergong ni phrang khaisa rung khe jao lang daoma ne. Ode bo kham hi rung ni phrang subung buthu khe sling ri ba.

⁴Bo grao jo blai hi, Simon khe thi ba, Dei, dih thudaoyaba gede nah rem mani nini jeh khe sai lah.

⁵Simon bo khe thi ba, Gedema, hor song nokha naisi, dukhu jang jeh sai kha, musibo maiya. Thikhabo, nini grao jang jeh saiphin nang.

⁶Bo saihaba jang nah gabang saikhip ba. Bonsini jeh jigao didih ja ba.

⁷Gibin rung dol ni lugurao khe juru mane bonsi khe yao gaosip hi longha ba. Ode, bonsi phai dada, rung magin ha nah gaphao sih gablai riba ha, rung glikdi glikdi ja ba.

⁸Bo khe nuhi Simon Peter, Jisuni igah ha blip pha hi boni ha thi ba, Gabra ani phrang thang lah, ang de phaphi se.

⁹Bo jang ar boniha dong phayarao khrip bo olei nah gabang remba khe hamsi ning gmang ba.

¹⁰Simon ni lugurao, Zebedai ni basa gini, Jakob ar Johanbo, bonsi hamsi ning gmang ba. Odebani Jisu Simon khe thi ba, Da khin, duha ni phrang de ning subung khe rem nang.

¹¹Bonsi rung buthu khe dergong ha lang hi, khrip khe gar dada, bo jang rikpha lang la kha.

¹²Sainsi khali Jisu nolei masi ha dong ba. Oraha subung saosi, khunthi jayaba, dong ba. Ode bo Jisu khe nuba jang bo khe hah ha blip phahi thi ba, Gabra, ning nangjao re thikhade, ang khe ragao riphu du, thi hi khainsu ba.

¹³Jisu yao phlao dada bo khe dopha hi bo khe thi ba, Ang nangjao du, ning ragao lang lah. Boha ning boni khunthi ham lang kha.

¹⁴Jisu bo khe thi ba, Saosi niha bo da sainthi, thikhabo, ning Jonthai niha thanghi phnu ri lah. Ning ham kha thihi khrip ne phnu phuma ne, ar Moses ni graothai ha dongba lai Madai humane yaopha lah.

¹⁵Thikhabo, boni grao de bangdao hi se gubblung dao ba, ar boni grao khna thaosisi khe khna mane subung buthu bojom ja ba. Ode bonsini limthai sathai buthu khe ham rimane boni ha bojom japhai ba.

¹⁶Thikhabo, bo hajengling, siri siriyaba ha thanghi Madai bi ba.

¹⁷Sainsi khali bo subung buthu khe sling risaiba ha, boni rogong ha Pharisairao ar Dara khe slingriyarao kham ba. Ode Galili ar Juda rajini khrip nolei ar Jerusalem ni phrang phaiyarao ode gilim gasa khe ham riphu mane Gabra niha raothai dong ba.

¹⁸Boha ning subung gejesi, sao adur jayaba khe thuyam ha bainbu hi phai ba. Ode Jisu ni rogong ha dengma bao ba.

¹⁹Thikhabo, subung jon bangbani, noh bising ha bainsing phuya. Odebani bonsi bo khe noh khimsao ha lang dada noh khim khe khusihi Jisu ni sagang bujui ha wadu jang dikkhlai ba.

²⁰Bonsini lonma khe bo nuhi boni ha thi ba, Hoi subung, nini phap dongba si khe map khlai kha.

²¹Dara khe slingriyarao ar Pharisairao, Elei Madai khe sijiba sere kho? Madai khe garhi de sere phap khe map khlai phu ma? thihi bonsi thilai ba.

²²Odebani Jisu bonsi ni baothai khe mithi hi bonsi khe thi ba, Nisi ni khah ha sumjabani ode bao ba?

²³Nini phap khe map khlai kha thiba laidao na baija hi igah jang hem lang lah thiba, sumbo laidao?

²⁴Marsini Basa habsao ha phap buthu khe map khlai phu du thihi nisi khe raothai phnu mane thihi adur khe thi ba, Ang nisi khe thi du, baija lah, nini thuyam khe la lah, ar nini noh ha thang lah!

²⁵Boha ning bonsi khrip nuba ha bo baija dada, jarni thuyam khe langhi, Madai khe bakhan khlai dada, jarni noh gede thang la kha.

²⁶Bonsi khrip bo gmang hi khin ba! Bonsi Madai khe bakhan khlai hi thi ba, Jing dini ha nuyaba khusi bislei gmang thaosisi!

²⁷Boni yaohon ha Jisu baigo lang hi bumu Levi thiyaba, bo khajna khrangyaba, khamthan ha khamyaba khe Jisu nu ba, ode bo khe thi ba, Ani yaohon rikpha lah.

²⁸Ode Levi baija hi, khrip jinis khe gar dada, bo jang rikpha kha.

²⁹Odehe Levi Jisu ni khlai hi, jarni noh ha, mel salai ri ba. Boha khajna suguyarao, ode gibin subung buthu khe bo long ba.

³⁰Pharisairao gejesi ar Dara khe slingriyarao gejesi, Jisu ni rikphayarao jang niyalai ba. Ode bonsi khe thi ba, Sumjabani nisi la khajna khrangyarao ar phaphirao jang ji phalai ba ling phalai ba? bonsi thi ba.

³¹Bonsi khe Jisu thiphin ba, Sao hamyarao de Daktor khe nangya, sao hamyayarao se Daktor khe nang ba.

³²Hamba subung buthu khe lamjao mane ang phaiya, phaphi subungrao khe khah phin rima ne se ang phai ba.

³³Subung buthu gejesi Jisu khe thi ba, Johan ni rikphayarao hoh khongja donghi Madai bi du, odelei ning Pharisairao ni slingriyarao bo yaowai du. Thikhabo nini rikphayarao la jidu lingdu lao.

³⁴Jisu bonsi khe thiphin ba, Daman dong du si ha jukhuba ha longjaoyarao jiyahi lingya hi hoh khongja dongphu nang?

³⁵Thikhabo, daman khe bonsi ni phrang lang mani basain sophai khali ha de, hoh khongja bonsi dong nang.

³⁶Jisu gibin daogari jang bonsi niha thi ba, Saosi bo rih gadain khe jekhaohi rih gajam ha su phaya; ode khlai re thikhade, bo rih gadain khe jegao rima se. Rih gadain jang gajam mili nang niya.

³⁷Saosi bo grep bidih gadain khe migur bokhoh gajam ha lusingya. Lusing re thikhade, grep bidih gadain migur bokhoh gajam khe berekkhao ma. Ode galai thar hi migur bokhoh berekkhao ma se.

³⁸Grep bidih gadain khe de migur bokhoh gadain ha ning lusingma nang ma se.

³⁹Odehe saosi bo grep bidih gajam ling bani yaohon ha grep bidih gadain khe lingma nangjaoya. Grep bidih gajam hamdao bonsi thi re.