Read Dimasa Luka 6 Bible Online

Luka 6 - Dimasa bible

Luka 6

¹Lenggo basain ha mailing gejer ha Jisu baiso lang ba. Boni rikphayarao maiding sbai hi yao jang khuji phalang ba.

²Pharisairao gejesi sing ba, Sumjabani Lenggo basain ha dang thaoyayaba khe dang ba?

³Jisu bonsi khe thiphin ba, David jang boni lugurao makham hukhri jaoba ha, khusi dangyaba khe nisi phuriya?

⁴Bo Madai ni noh ha hap dada, Jonthairao khe garhi de gibin jiphuyayaba phnu riyaba hon khe lahahi ji ba. Ode boni lugurao ne bo riba niya?

⁵Jisu bonsi khe thi ba, Marsini Basa de Lenggo Basain ni Gabra se.

⁶Odehe, gibin Lenggo Basain ha Jisu sunagog ha hap hi bonsi khe slingri ba, ode oraha subung saosi yaoda ni yao adur dong ba.

⁷Dara khe slingriyarao ar Pharisairao bo khe gajai rimane, Lenggo basain ha ham ri du na riya thihi bo khe bonsi naidao ba.

⁸Thikhabo, Jisu bonsini baothai khe mithi hi, yao adur jayaba khe thi ba, Bai ja, ning eraha songphai. Boha ning bo baija hi song kha.

⁹Odehe, Jisu bonsi khe thi ba, Ang nisi khe sing du, Lenggo basain ha hamba khlai ma nang re na hamya khlaima nang re, sogoma nang re na sthaima nang re?

¹⁰Bo khrip khe naiding hi yao adur jayaba khe thi ba, Nini yao khe sugu lah. Ode bo sugu ba, boha ning boni yao ham lang la kha.

¹¹Bonsi Jisu ni basao ha hamsi ning thamsi baigo dada, sumjadi khlai ma kho thihi sainlai ba.

¹²Bo bubli ha bo hading khro ha thanghi hor song Madai niha bi ba.

¹³Phorong nokha naihi bo jarni rikphayarao khe longthim ba. Ode bonsini bising ha jhigin saikho dada bonsi ni bumu khe Apostol thihi deng ba.

¹⁴Bo buthu ni bumu de Simon (Peter bo thi re), ar boni buphlung Andria, Jakob ar Johan, Philip ar Bartholomai,

¹⁵Matthew ar Thoma, Alphai ni basa Jakob ar Simon (Zealot ni dol ni subung);

¹⁶Jakob ni basa Juda ar bo khe rem riyaba Juda Iskariot thu se.

¹⁷Odehe, Jisu jang boni rikphayarao hading ni phrang akhai bu dada, jarni rikphayarao jang haphlai ha song ba. Bo hathan ni subung buthu ar Juda raji ni phrang ar khrip hathan ni phrang ar sagor dergong nolei ni phrang ar Sidon ni subung buthu bojom japhai ba.

¹⁸Bo buthu de boni grao khe khna mane phaiyarao se. Ode bonsini limthai sathai khe ham rijao mane asa jang phaiyarao se. Ode saoha sgo sgain gajaoyarao se.

¹⁹Bo ni phrang khusi dangphu mane raothai baigo ba. Ode bo khrip khe ham ri ba. Odebani, khrip subung buthu bo khe dophama bao ba.

²⁰Jisu naiding hi boni rikphayarao khe nai dada thi ba, Nisi dukhisarao, nisi ni khophal hambi, Madai ni raji de nisi ni se.

²¹Duha nisi hukhri hi dongyarao, nisi ni khophal hambi, Nisini hoh gablai nang. Duha grayarao nisi ni khophal hambi, Nisi mini mai nang.

²²Marsi ni Basa ni khlai hi subung buthu nisi khe naisle kha bo, dangkhlai kha bo, jo kha bo, siji kha bo, nisi ni khophal hambi.

²³Oleiba ha nisi khaja hi baithreng lah, bede thikhala nisi yaosandi mai mane sorgo ha thathi hi deng du. Bonsi ni phagarao gorasalirao ni basaoha olei ning dang ba.

²⁴Nisi gnangrao, nisi ni bakho bubain risi bi Nisi suk jang khajama mai blai kha.

²⁵Duha nisi hoh gablaiyarao, nisi ni bubain risi bi, Nisi hukhri mai nang. Nisi duha miniyarao, nisi ni bubain risi bi, Khah waimu jang nisi grama se.

²⁶Nisi malai khe hamba sugu hi bakhan khlai kha bo, nisi ni basaoha bubain risi bi. Nisi ni phagara mosol gorasalirao ni basaoha bo olei ning dangba se.

²⁷Thikhabo, nisi ani grao khnayarao, nisi niha ang thi du, nisi ni sotrurao khe hamjao lah. Nisi khe sere naisle du bonsi ni basaoha hamba khusi khe dang lah.

²⁸Nisi khe sariyarao khe hamthai ri lah. Nisi khe dukhu riyarao ne Madai bi ri lah.

²⁹Nini bakhaolei khe malai saikhaosi gede bakhaolei ri kha de, saokhaosi gede bo ajao phin lah; ode nini rih khe malai lala kha de nini sola khe bo ri lah.

³⁰Niniha malai sain kha de, ri lah; nini jinis khe malai lala kha de, da sain phin.

³¹Madai nisi ni basaoha bede dang ma nangjao ba, nisi bo olei ning dang lah.

³²Nisi sere khe khasao ba, bo khe se ning khasao kha la, bedehe hamthai mai ma?

³³Nisi ni basaoha hamba khusi dangyarao ni basaoha se ning nisi hamba khusi dang re thikhala, bede khlaihi nisi hamthai mai ma?

³⁴Maiphin mane asa jang lagai jaoyarao ne se ning ri re thikhala, bede khlaihi nisi hamthai mai nang? Phaphirao bo maiphin mane olei lagai jaoba ri re.

³⁵Odebani nisi de jarni sotrurao khe hamjao lah, ode bonsi ham mane khusi dang lah; ar maiphin mane asa jayahi lagai ri lah, odese nisi hamthai ni yaosandi gabang mai hi judao thaoyaba ni sasik ja ma. Bo de khaja ba ringyayarao ode subung phaphirao khe bo khasao re.

³⁶Nisi ni bupha khasaoba lai ning nisi bo malai khe khasao lah.

³⁷Malai khe da musu lah, odese ning bo musu jaoya ma. Saosi khe bo gajai da ri lah, odese ning bo gajai rijaoya ma. Malai khe map khlai lah, odese ning bo map khlai jaoma se.

³⁸Ri lah odese nisi bo riphin jao ma; bo suyaba bokhoh ha nesik dada gaphao si nisi maiphin ma.

³⁹Ode, Jisu bonsine ebo daogari khe sainthi ba, “Gana jang gana de langsmai phu nang? Bonsi gini jang hakhor ha galaising nang niya?

⁴⁰Slingyasa de slingriyasa tha dedaoya. Thikhabo slingyasa asaba bo sling blaikha de boni slingriya lai ja nang.”

⁴¹“Jarni muthai ha dongyaba malang khe nuyahi, nini daphlung ni muthai ni muphin khe bedehe ning nu ba?

⁴²Jarni muthai ha dongyaba malang khe nuyahi jarni daphlung khe bede khlaihi nini muthaini muphin khe Ang khe khaikho ri lah thihi ning bede thiphu ba?”

⁴³“Hamba buphang ha de hamya bathai thaiya, ode hamyayaba buphang ha hamba bathai thaiya.

⁴⁴Asaba buphang khe bo bathai ha tharmai phu du. Busuphang ha thaikhrao bathai khaoya, dukha ha grep bathai khaoya.

⁴⁵Subung hamba de jarni khah bising ni don bokhoh ni phrang grao hamba khe saiphlung re, ode subung hamya de boni khah bising ni don bokhoh ni phrang hamya grao khe saiphlung re. Ode khah ha gablaiyaba gaphaohi khuh ha jo re.”

⁴⁶“Ani grao khe maniya hi sumjabani nisi ang khe Gabra, Gabra thi ba?

⁴⁷Asaba sere ani ha phaihi ani grao khe khna dada mani re, beleyaba subung thihi ang nisi ne phnu nang.

⁴⁸Bo subung jarne noh dang mane longthaima ha guthu jaohi longthai ni thong gaiba lai se. Dih dehi noh ha nang ba, thikhabo sbai phuya.

⁴⁹Asaba bo ani grao tharmai dada grao khe maniya kha de, longthaima ha noh dangya hi, hah ha thong gaihi noh dangba lai se. Bo noh dih raokha ning dih nepha phai hi baithar langba lai se.”