Read Dimasa John 11 Bible Online

John 11 - Dimasa bible

John 11

¹Lazaras thijaoyaba subung saosi limhi dong ba. Mari ode boni bahandao Martha ni nolei ha bo dong ba.

²Ebo bo Mari ning, sere Gabra ni basao ha thao midim khe lukhru hi jarni khnai jang Gabra ni yapha basao ha rusa ri ba, boni buphlung Lazaras limhi dong ba.

³Odebani boni bahandao thu Jisu niha graojma hai ba, Nai lah, Gabra, ning hamjaoyaba limhi dong.

⁴Ebo khe khna hi, Jisu thiba, Ebo limyaba de thih mani de niya, thikhabo, Madai ni muima ni khlai hi se ja ba, boni gede jahi Madai ni Basa ni muima ja mani khlai hi.

⁵Jisu Martha khe ode boni bahandao ode Lazaras khe khasao re.

⁶Lazaras limhi dong thihi khnahibo, braha bo dong ba, oraha bo ar nokha sain gini dongthao ba.

⁷Yaohon ha Jisu jarni rikphayarao niha thi ba, Phai, jing Judai raji gede thangphin nang.

⁸Rikphayarao Jisu niha thi ba, Rabbi, sagang ha se ning Judarao ning khe longthai lem ma bao ba, ode oraha ning thangphin ma bao du kho?

⁹Jisu thiphin ba, Sain si ha gontha jhi gini bubli jaya? Saosi subung sain ha daobai ba ha khudaya, bede thikhala, ebo phirthi ni jdanma jang gede nu bani.

¹⁰Sere andar ha daobai re thikhade bo khuda ma se, bede thikhala oraha jdanma giri.

¹¹Ebo khe thibani yaohon ha, bo bonsi niha thilang ba, Jini lugu Lazaras thuhi mudri thang la kha; thikhabo bokhe masaphin mane ang oraha thang du.

¹²Boni rikphayarao thiphin ba, Gabra bo thu kha thikhade bo hamphin ma se.

¹³Jisu boni thihbani balam ha se thi ba, thikhabo nalai thuhi mudri thangba lai se thihi boni rikphayarao bao la ba.

¹⁴Odese Jisu bonsi niha ragao sisi thi ri ba, Lazaras thih kha,

¹⁵nisi ni khlai hi ang khaja la du, ang oraha giri, odebani nisi lon lah, thikhabo phai, jing boniha thang nang.

¹⁶Thomas Didumas thijaoyaba jarni ha thaoyaba rikphayarao thi ba, Phai jingbo bo jang thihpha mane thang nang.

¹⁷Bokhe mangkhlong ha phipba nokha sain bri ja kha thihi Jisu sophai hi ebo khe tharmai ba.

¹⁸Jerusalem ni phrang Bethani hamsi jain kha bo mel gin lai se ning ja ma.

¹⁹Martha ode Mari niha boni buphlung thih bani, bonsi khe dukhu waimu phoron rimane gabang ning Judarao phai ba.

²⁰Jisu phai du thihi graojma khna ba ha ning bo jang goron lai mane bajiha baigo lang ba, thikhabo Mari noh ha ning khamhi dong ba.

²¹Martha Jisu niha thi ba, Ning eraha dongpha kha de ani buphlung thih nang niya mu,

²²asababo, Madai niha ning khainsu kha de, Madai ninthane bokhe ri nang thihi ang tharmai du.

²³Jisu bokhe thi ba, Nini buphlung baijaphin ma se.

²⁴Martha thiphin ba, Jamthaohiba ni basain ha baijaphin ma thihi ang tharmai du.

²⁵Jisu bokhe thi ba, “Baija phinriyaba ode hayu ang se ning. Sere ani basao ha lonma deng re, bo thih la khabo, thangphin ma se.

²⁶Sere thanghi dong ode ani basao ha lonma dong, bo thaoglao habo thih thaoya kha, ebo grao khe ning lon du?”

²⁷Om, Gabra, bo thiphin ba, ang lon du, Madai ni Basa Krista, sere phirthi ha phaiginyaba dongba, bo de ning se.

²⁸Ebo khe thiblai hi bo thang la kha, ode jarni bahandao Mari khe longkhao hi thi ba, Slingriyah era ning dong, bo ning khe long hadu.

²⁹Mari khnaba jang baija hi boni ha phai ba.

³⁰Jisu duha sosibo nolei ha sohiya kho, braha Martha bo jang goron ba, bo hathan ha ning dong kho.

³¹Judarao Mari jang baosi noh ha dongba ode bonsi khe dukhu waimu phoronba ha Mari srap baija hi baji gede baigo langba khe nuhi, bonsi baoba, bo mangkhlong ha gra mane se thang ba, odebani boni yaohon rikpha ba.

³²Braha Jisu dong ba, Mari oraha sohiba ode bokhe nuba jang boni igah ha galai hi thi ba, Gabra, ning eraha dongkha de, ani buphlung thihya kha mu.

³³Jisu bokhe ode bo jang baosi Judarao phai phayarao khe bo graba khe nuhi Bese ha hamsi ning dukhu nang ba.

³⁴Ode, bo sing ba, Nisi bokhe braha deng ba? Bonsi thiphin ba, Phai hi nai lah, Gabra.

³⁵Jisu gra ba.

³⁶Odehe Judarao thi ba, Nai lah, bo Lazaras khe bislei hamjao du!

³⁷Thikhabo, bonsi ni bising ha gejesi thi ba, Bo gana subung khe muh nu riphuyaba se, ebo subung khe bo githi ni phrang mathang phinphu nang niya?

³⁸Jisu khasu ha dukhu nang hi mangkhlong ha sophai ba. Bo masi longkhor se, odebani hapsing thani ha masi longthai jang baophung hi deng ba.

³⁹Jisu thi ba, Longthai khe disai lah. Bo thihyaba ni bahandao Martha thi ba, Gabra bo ni phrang maramyaba bahai phai du, bede thikhala bo thiba nokha sain bri ja kha.

⁴⁰Yaohon ha Jisu thi ba, Ning lon du thikhade Madai ni muima khe ning numa se thihi ang ninthane thiya na?

⁴¹Odehe, bonsi longthai khe disai ba, yaohon ha Jisu basao ha naikhu hi thi ba, Abai, ning ani grao khe khnaba ni ang nini basao ha khaja la du.

⁴²Ning nalaibo ani grao khe gainsong du thihi ang tharmai du; thikhabo, ning se ang khe haiha ba thihi bonsi lonphu mane ode eraha subung buthu songhi dongyarao ni khlai hi se ang ebo grao khe thi ba.

⁴³Ebo grao khe bo thi hi, Jisu khurang si jirik khao hi longhun ba, Lazaras, bajiha phai lah.

⁴⁴Boni yao ode yapha ha rih jang repding hi ode masi rih boni mukhang repphung hi githi subung baji ha baigo phai ba. Jisu bonsi khe thi ba, Rih khe khru ode bo khe haiha.

⁴⁵Gabang Judarao Mari niha daobai phai ba, ode Jisu dangyaba khusi khe nu ba, bonsi gabang ning Jisu ni basao ha lon la ba.

⁴⁶Thikhabo bonsi ni bising ha gejesi subung Pharisairao niha thang ba, ode Jisu dangyaba khusi khe bonsi niha sainthi ri ba.

⁴⁷Ode, Jonthaimarao, Pharisairao, Khamhojarao khe masi mel jamani longthim ba, Jing snadi khlaima kho? thi hi bonsi sing ba. Ebo subung gabang ning gmang thaosisiyaba khusi khe dang phnu kha.

⁴⁸Jodi jing bokhe elei ning haiger re thikhade, khripbo boni basao ha lonma phaima se, ode Rom sarao phaihi jini hathan ode jadi magin ni basao ha hok ja lama se.

⁴⁹Ode bonsi ni bising ha saosi subung, bumu Kaiapha thijaoyaba dong ba, bo maithai ha Jonthaima jahi dong ba, bo thi ba, Nisi musi khe bo mithiya.

⁵⁰Khrip jadi gma tharba thane subung buthu ni khlai hi saosi subung thihba se nisi ni khlai hi hamdao thihi nisi baoba maiya?

⁵¹Ebo grao khe bo jarni gede jahi de thiya, thikhabo bo maithai ha Jonthaima jahi, japhai ginyaba khe se thida ri ba, Juda jadi ni khlai hi Jisu thih ma.

⁵²Bo jadi ni khlai hi se ning niya, thikhabo, Madai ni sasik dra-dri japhlung tharyaba khrip bonsi khe labu hi bojom khlai ma, ode bonsi khe masi slam ma.

⁵³Odese, bo basain ni phrang bokhe sthai mani baolei ma.

⁵⁴Odehe, Judarao ni bising ha Jisu gabang daobaiya hi dong ba, masi hathan ni hajengling gabasi ha Ephraim thiyaba nolei ha bo thang la hi, jarni rikphayarao jang bo oraha se dong ba.

⁵⁵Judarao ni Baiglai ni Busu ni bubli sampha phai kha bani gabang subung jar khe thar rila mani khlai hi jarni mulug ni phrang Baiglai ni Busu ni sagang ha Jerusalem ha thang ba.

⁵⁶Bonsi Jisu khe smai hi, Madaikhoh ni hathan ha songhi bonsi jar jang jar thilai ba, Ning la bedehe bao du? Mel ha bo phai nang niya?

⁵⁷Jonthaimarao ode Pharisairao Jisu khe rem mani khlai hi, sere boni dongthan khe tharmai re thikhade bonsi khe khna rima nangma thihi hukhum ri ba.