Read Dimasa John 17 Bible Online

John 17 - Dimasa bible

John 17

¹Jisu ebo khe thiblai bani yaohon ha, bo nokhasao gede naikhu ba, ode bihi thi ba, “Abai, bubli sophaima ja kha, jar ni Basa khe muima khlai lah, odese nini Basa bo ning khe muima khlai mane.

²Bede thikhade ning khrip subung ni basao ha hok ri ba, serene ning ri riba bo buthu khrip nebo thaoglao ni hayu riphu mane.

³Ode, thaoglaoni hayu ebo se, gibi Madai ode sere khe ning haihayaba Jisu Krista khe tharmaiyaba.

⁴Snadi khusi khe ning anthane dangma ri ba, bokhe dang sohi, ang habsao ha nini muima khlai ri kha.

⁵O Abai! Habsao dong bani sagang ha nini ha ang muima jang dongyaba khe duha ning jar jang ang khe muima khlai ri lah.”

⁶“Ning habsao ha anthane riyaba buthu khe ang nini ha mithi ri kha. Bonsi nini se, ar ning bonsi khe anthane ri bani, bonsi nini grao khe mani la kha,

⁷ar ning anthane riyaba khrip buthu khe nini phrang se phai ba thihi duha bonsi tharmai la kha.

⁸Ning anthane riyaba grao buthu khe ang bonsi niha ri kha, bokhe bonsi ajao kha. Nini phrang se ang baigo phaiba thihi bonsi gibi jang tharmai kha, ode, ning se ang khe haiha ba thihibo bonsi lon kha.”

⁹“Bonsi ni khlai hi ang bi la du, habsao ni khlai hi de ang biya, thikhabo bonsini khlai hi snadi khe ning anthane riba, bede thikhala bonsi de nini se.

¹⁰Aniha khrip dongyaba nini se, nini ha khrip dongyababo ani se. Odebani bonsi ni gede jahi de muima aniha phai ma.

¹¹Ang habsao ha bubli glao dongya kha, thikhabo bonsi de dongma kho, odebani ang nini ha phai du. Gathar Abai, anthane riyaba nini bumu ni raothai gede jahi bonsi khe dimkhao lah, odese bonsibo jing lai jasosi masi ja ma.

¹²Bonsi jang ang dongba sainkhali ha bonsi khe ang dimkhao hi deng kha, ode ning anthane riyaba bumu ni gede jahi bonsi khe raokhi hi deng ba. Gmaginyaba saosi khe garhi saosibo gmaya, odese sastro ni grao jaso thar ma.

¹³Duha ang nini ha phai du, thikhabo ebo buthu khe ang habsao ha dongba ha thi riba, ani khajama khe bonsi jarni bising ha maithar ma.

¹⁴Ang nini grao khe bonsi niha so ri hi kha, thikhabo habsao bokhe nangjaoya, bede thikhade ang habsao ni niyaba lai jasosi bobo habsao ni niya.

¹⁵Bonsi khe habsao ni phrang khaikho lang mane ang khainsuya, thikhabo, bonsi khe Soithan ni phrang dimkhao hi deng mane ang nini ha sain ba.

¹⁶Angbo habsao ni niyaba lai ning bonsi bo habsao ni niya.

¹⁷Gibi ni gede jahi bonsi khe thar lah, nini grao gibi se.

¹⁸Ning ang khe habsao ha haiha ba lai jasosi, bonsi khebo ang habsao ha haiha kha.

¹⁹Bonsi ni khlai hi ang jar khe thar la ba, bede thikhala bonsibo gibi ni gede jahi gathar japhu mani.”

²⁰“Bonsi ni khlai hi de ning ang biya, thikhabo bonsi ni khlai hi se sere bonsi ni graojma ni gede jahi ani basao ha lon ba,

²¹Bonsi khrip masi jahi jomsi japhu mane ang bi la du. Abai! bedehe ning aniha dongpha du, ode ang nini ha dongpha du, olei jasosi bonsi bo jini ha dongpha thing. Odese, ning ang khe haiha ba thihi habsao lon ma.

²²Jing bedehe masi ja ba, olei jasosi bonsi bo masi ja la thing thihi snadi khe ning anthane ri ba, bo muima khe ang bonsine ri kha.

²³Ang bonsi niha, ning ani ha, odese bonsi khe labu hi masi ja thar thing thikhase habsao tharmai ma ning se ang khe haiha ba, ode ning ang khe hamjaoba lai jasosi bonsi khebo hamjao ma.”

²⁴“Abai ang nangjao du, snadi khe ning anthane ri ba, braha ang dong ba, oraha ning bonsi bo ang jang dongpha ba, odese bonsi ani muima khe nu phu ma, snadi khe ning anthane ri ba, bede thikhala, habsao khe sangsai mani sagang haning ning ang khe hamjao la du.

²⁵Gajai giriyaba Abai, habsao ning khe mithiya kho, thikhabo ang de ning khe mithi du, ode ning se ang khe haiha ba thihi bonsibo mithi du.

²⁶Bonsi niha ang ning khe mithi ri kha, ode ning khe mithi song rihi ning deng ma, snadi hamjaoma ha ning ang khe hamjao ba, bo hamjaoma bonsi nihabo dong thing, ode ang jarbo bonsi jang dong pha ma.”