Read Dimasa John 19 Bible Online

John 19 - Dimasa bible

John 19

¹Odehe, Pilat Jisu khe langhi bokhe su ri ba.

²Odehe, siphaiyarao busuh ni khrothu slam hi boni bokhro ha thu riba. Bonsi bokhe rih jaosro phin riba.

³Ode boni ha phai hi thi ba, Juthai, Judarao ni raja! thihi bokhe bakhao lai bo riba.

⁴Pilat ar phinsi bajiha baigo phin hi Judarao niha thi ba, Nai lah! bokhe ang nisi niha bajiha labu phin ridu, nisi se tharmai lama, ang boni basao ha musibo gajai maiya.

⁵Jekhali Jisu rih jaosro khe gain hi busuh ni khrothu khe thu hi baji ha baigo phai ba, Pilat bonsi niha thi ba, Subung khe nai lah!

⁶Jonthaimarao ode bonsini dangyasarao bokhe nuba jang, bonsi jirik khao hi thi ba, Kross ha dikpha lah! Kross ha dikpha lah! Pilat bonsi khe thi ba, Nisi bokhe lang lah ar kross ha bokhe dikpha lah, thikhabo boni basao ha ang musi khebo gajai maiya.

⁷Judarao bokhe thiphin ba, Jini bo dara dong, ode bo dara maphi thih ma ning nang du, bede thikhala bo jar khe Madai ni basa thi la du.

⁸Ebo khe khna hi Pilat hamsi ning khin sing ba.

⁹Odebani bo bangla bising ha thangphin hi Jisu khe sing ba, Ning braha ni phrang phai ba? Thikhabo, Jisu bokhe thiphinya.

¹⁰Pilat bokhe thi ba, Ning ang jang sainlai ma nangjaoya? Ning khe haiger mani ode ning khe kross ha dikthai manibo aniha khemotha dong thihi ning baoba mai laya?

¹¹Jisu thiphin ba, Ninthane basao ni phrang riya thikhade, ning ani basao ha dang mani musibo khemotha dong nang niya. Odebani sere saosi ang khe nini yao ha yaophayaba gajai ha galai bani boni phap gedeyaba masi se.

¹²Pilat ebo grao khe khna ba jang Jisu khe sogo mani nai kha kho. Thikhabo Judarao jirik khao hi thi ba, Jodi ning bokhe sogo re thikhade, eboni ortho de Raja Kaisar ni lugu niya! Asaba saosi jar khe raja baola re bo Raja Kaisar ni sotru se ja ba.

¹³Ebo grao khe khna hi, Pilat Jisu khe baji ha labu ba, ode dara ni bisar phaiso ginyaba ni khamthan ha kham ba, bo Longthai ni Khamthan thi hi thi re. (Hebrai grao jang Gabbatha)

¹⁴Ebo Baiglai ni Busu salai mani basain ode gontha doh lai se ning thaosi ba, Pilat Judarao khe thi ba, Nai lah, nisi ni Raja khe.

¹⁵Bonsi jirik phin ba, Bokhe sthai lah! Sthai lah! Kross ha dikthai lah! Pilat singphin ba, Nisi ni Raja khe ang se kross hah dikthai ma kho? Jonthaimarao thiphin ba, Kaisar khe garhi jini saosi bo raja giri.

¹⁶Odese, kross ha dikthai mane Pilat Jisu khe bonsini yao ha yaopha ba. Ode bonsi Jisu khe lang ba.

¹⁷Jisu jarni kross khe bain hi Laokhrong ni hathan (Hebrai grao jang Golgotha thiyaba) gede thang ba.

¹⁸Oraha bonsi Jisu ode bo jang baosi subung gini khe kross ha dikthai ba, saosi khe ejang ar gibin khe ojang ode gejer ha Jisu khe.

¹⁹NAZARETH NI JISU, JUDARAO NI RAJA thihi Pilat laisi ha reb hi kross ni basao ha pha ba.

²⁰Gabang Judarao ebo rebyaba laisi khe phuri ba, bede thikhala Jisu khe kross ha riyaba hathan nogor gabasi ha se. Ode, Hebrai, Latin ar Greek grao jang ebo laisi khe reb ba.

²¹Judarao ni Jonthaimarao Pilat niha aphoti ja ba, Judarao ni Raja thihi da reb, thikhabo bo jar se ang Judarao ni raja thihi thila ba, thihi reb lah, thi ba.

²²Pilat bonsi khe thiphin ba, Ang snadi khe reb kha, reb kha.

²³Jisu khe kross ha dikthai blai hi, siphaiyarao boni rih khe lahi jikhao hi phantha bri khlai hi saosi ha phantha si phantha si ronlai ba. Thikhabo, ebo sola glaoyaba se basao ni phrang bakhla sosi supha laiyaba se.

²⁴Ebo khe jikhaoya, thihi bonsi saosi jang saosi thilai ba. Jing eboni bising ha laisi seng hi deng, sere mai re jing mai nang. Sastro ha dongyaba jaso thar mani se elei ja ba: Bonsi ani rih khe bonsi ni bising ha ronlai ba, ani rih ni khlai hi sma nai ba. odebani siphaiyarao olei dang ba.

²⁵Boni buma, boni buma ni bahandao, Kleopas ni bihih, ode Mari Magdalene, Jisu ni kross gabasi ha song hi dong ba.

²⁶Jisu boni buma, ode boni rikphayasa, sere khe bo hamjao la re, oraha gabasi ha song hi dongba khe nu ba, boni buma niha thi ba, Ebo de nini basa

²⁷Ode rikphayasa khe bo thi ba, Bo se nini buma. Bo bubli ha ning ebo rikphayasa bokhe boni noh ha lang kha.

²⁸Duha khrip jaso thar kha thihi yaohon ha Jisu tharmai la kha, odebani sastro ni grao jaso thar thing thihi thi ba, Ang dih gang du.

²⁹Oraha grep bidi gabrab mudig si dong ba. Odebani bonsi khaokhusa khe grep bidi gabrab ha jem hi, khaokhusa khe war geju ha khephre hi boni khujer ha repha ba.

³⁰Jisu lingba mai hi bo thi ba, Jaso thar kha! Ode bokhro naikhlai hi boni hang jagao ba.

³¹Odehe, bo salai mani basain jahi dong ba, odebani, Judarao Pilat niha khainsu hi ba, bonsi ni igah khe sbai ri mane, ode bokhe dikhlai ri mane. Lenggo basain ha kross basao ha dengthaoya. Bede thikhala, bo lenggo basain gedeba basain se dong ba.

³²Jisu jang baosi kross ha rijaoyaba gini dongyaba khe siphaiyarao phai hi sagang ha saosi ni igah khe sbai da ba, ode gibin ni igah khe sbai ba.

³³Thikhabo, Jisu niha phai hi naiphai ba, bo thiblai kha, thikhabo boni igah khe sbaiya.

³⁴Siphaiyarao ni bising ha saosi siphaiya jong jang Jisu ni bohoh ha jao ba jang bithi jang dih baigo phai ba.

³⁵Sere subung ebo khe nuba bo ning thila du, ode bo tharmai la du. Gibi khe ning thila du, odebani nisi lon lah.

³⁶Odebani se eleiyaba sastro ha dongyaba grao gibi jathar mane, Bo begreng grengsi bo sbai jao nang niya.

³⁷Ode sastro ha gibin grao khebo thi du, Sere saosi bonsi jao du, bonsi ni bao habo naiphla ma.

³⁸Yaohon ha Jisu ni manggathi ni khlai hi Arimathai ni Josep, Pilat niha khainsu ba. Josep Jisu ni saosi rikphayasa jahi dong ba, bede thikhala bo Judarao khe mithi jaone khin bani phirik phirik dong ba. Pilat jang grao ribani bo phai ba ode manggathi khe lang ba.

³⁹Nikodemas, sere saosi subung hor ha Jisu niha daobai lang ba, Josep jang thangpha ba. Nikodemas herdan jadidih midimyaba bidih ode aloe labu ba.

⁴⁰Bonsi gini jang Jisu ni manggathi lang hi ode Juda jadini dara maphi phip mani khlai hi midimyaba bidi ode rih grangsi jang bokhe repding ba.

⁴¹Bo hathan, braha Jisu khe kross ha riba, oraha masi bari gadain dong, ode bo bari sing ha masi gadain mangkhlong dong. Oraha saosi bo phip ba giri.

⁴²Bede thikhala bo basain Judarao ni salai mani basain jahi dong ba. Odebani bo mangkhlong sampha daoba ni Jisu khe oraha phip ba.