Read Dimasa John 6 Bible Online

John 6 - Dimasa bible

John 6

¹Boni yaohon ha Jisu Galili dihkharnai ni nar gede bailang ba (Tiberia dihkharnai bo thi re.)

²Limyarao ni basao ha gmangthao sisiyaba sin khlaiyaba buthu khe nu bani khlai hi gabang subung bokhe rikpha kha.

³Jisu hading ha gakhu lang kha, bo hathan ha boni rikphayarao jang khamhi dong ba.

⁴Baiglai ni mel, Judarao ni mel sampha kha.

⁵Jisu naiding ha ba de, gabang subung githimlai hi boni gede phaiba khe nu ba, Philip niha, Ebo subung buthune ji ri mane braha ni phrang jimu jing barai ma? thihi sing ba.

⁶Bo de Philip khe nainai mane se thi ba, bo ning sumjadi khusi khe dang ba, bo mithi la du.

⁷Philip bo khe thiphin ba, Khrip ne khaisa khaisa jimane bo honthik ri manebo hon aduli rja gin ni dam jangbo ja nang niya.

⁸Boni rikphayarao ni bising ha subung saosi Simon Peter ni buphlung Andri, boni ha thi ba,

⁹Eraha nagasa saosi, boni ha maiju ni hon pher bowa ar nah doh gini dongyaba dong. Thikhabo, elei subung khrip ne khlai hi ebo jang musibo ja nang niya.

¹⁰Subung buthu khe kham ri lah, thihi Jisu bonsi khe sani ba. Bo hathan ha dubri bang bi, ode khripbo kham kha. Subung buthu khrip jang rjing bowa lai ja du.

¹¹Odehe, Jisu hon buthu khe lahi, khajama ni grao thihi, oraha khamyarao ne ron ri ba. Olei ning nah buthu khe bo ron ri ba.

¹²Bonsi ji blai bani yaohon ha, boni rikphayarao niha, Musibo khmaya mani khlai hi haglaiyaba buthu khe bojom khlai lah, thihi sani ba.

¹³Odehe, bonsi bojom khlai kha, maiju ni hon pher bowa jiyaba ni phrang haglaiyaba khamphlu jhigin gablai si bojom khlai ba.

¹⁴Gmangthao sisiyaba sin dangyaba khe subung buthu nuhi, Ebo subung de gorasali, habsao ha phaiginyaba se, thihi thi ba.

¹⁵Bo khe remhi raja slam mane bonsi bao du thihi Jisu tharmai ba, ode bo sao jang hading ha thangphin la kha.

¹⁶Sainbli japhai hi, boni rikphayarao dihkharnai gede thang ba,

¹⁷bonsi rung ha ga hi, dihkharnai khe bailang hi Kapernaum gede thangphin kha; Jisu bonsi niha phaiphinya.

¹⁸Bar raohi sip bani khlai hi dihthon bo gabang rao bi.

¹⁹Rung mel tham mel bri thangba khali ha, Jisu dihkharnai ni basao ha hemhi rung ni gede phaiyaba khe bonsi nu ba, bonsi hamsi ning khin ba.

²⁰Thikhabo, bo boni ha, Ang se, da khin thihi thi ba.

²¹Odehe, bokhe rung ha kham ribani yaohon ha srap ning bonsini rung, dihkharnai ni nar sohi kha.

²²Gibin basain ha dihkharnai dergong ha dongyaba subung dongyarao de, rung masi khe garhi de rung gibin giri thihi bonsi nu kha, Jisu boni rikphayarao ni bising ha rung ha gaphaya, boni rikphayarao bonsi se ning thangba thihi tharmai ba.

²³Tiberia ni phrang phaiyaba gibin rung buthu, Gabra hon khe hamthai rihi bonsi jilaiyaba hathan ha sohi kha.

²⁴Odebani, subung buthu Jisu jang boni rikphayarao boha giri thihi tharmai ba ha, bonsibo rung buthu ha gahi Jisu khe smai mane Kapernaum ha thangla kha.

²⁵Dihkharnai ni ojang nar ha Jisu khe nuhi bokhe sing ba, Rabbi, bakhali ning ejang sohi kha?

²⁶Jisu bonsi niha thi ba, Gibi jang ang nisi khe thi du, gmangthao sisiyaba sin buthu khe nisi nuba ni khlai hi ang khe smaiya, ning hoh gablaisi hon jibani se ang khe smai ba.

²⁷Makham jam ginyaba khe smai hi dukhu da khlai, thaoglao sosi dongyaba makham, Marsini Basa ri ginyaba khe smai lah, boni khlai hi Bupha Madai ne phnuya kha.

²⁸Odehe, bonsi boni ha, Madai ni khusi khe jing dang bani khlai hi sumjadi khusi khe dangma nang du? thihi sing ba.

²⁹Jisu bonsi khe thiphin ba, Madai ni khusi dang ba de ede se; Bo haihayaba khe lon lah.

³⁰Bonsi boni ha, Ode thikhade, jing nuhi ning khe lonmani khlai hi sumjadi sin khe ning dang ma? Sumjadi khusi khe ning dang ma?

³¹Bonsi jimane nokhasao ni phrang hon ri kha thihi rebyaba lai, jini phagararao hajengling ha manna ji kha thiyaba lai jing khe sin ri lah, thihi bonsi thi ba.

³²Jisu bonsi niha, Ang gibi jang nisi khe thi du, nokhasao ni phrang nisi ne hon riyaba de Moses niya, ani Bupha se nisi ne hon gibiyaba khe ri ba.

³³Madai ni hon de nokhasao ni phrang akhai buhi, habsao niha hayu riyaba se.

³⁴Bonsi boni ha, Gabra, bo hon khe jinthane nalai ri lah, thihi khainsu ba.

³⁵Jisu bonsi khe thi ba, Ang ning hayuni hon se. Sere aniha phai du, bo hukhri nang niya, sere ang khe lon du, bo musi khalibo dih gangphinya.

³⁶Thikhabo, nisi de ang khe nuhibo nisi ang khe lonya thihi ang nisi khe thi du.

³⁷Bupha ang khe riyaba khrip ani ha phai ma, sere aniha phai re, ang bokhe rik khlai nang niya.

³⁸Jar nangjaoyaba khusi khe dang mane ang sorgo ni phrang akhai buyaba niya, ang khe haihayaba ni nangjaoma khe dang mane se ang phai ba.

³⁹Ang khe haihayaba ni nangjaoma de elei ning: Bo ang khe riyaba khrip khe saosibo ang khmaya hi, yaohonthao ni basain ha bonsi khe mathang phinhi baija rima.

⁴⁰Ani Bupha ni nangjaoma ede se: Sere Basa khe nuhi lon re, thaoglao ni hayu mai nang, odehe, ang bokhe jamthao mani basain ha mathang phin ma se.

⁴¹Bo sorgo ni phrang akhai buyaba hon se thihi thibani khlai hi Judarao boni basao ha khah rainphai kha.

⁴²Odebani bonsi thi ba, Ebo subung la Josef ni basa Jisu niya? Boni buma jang bupha khebo jing tharmai du. Bede khlai hi Ang sorgo ni phrang akhai buyaba thi hi jar khe thiphu re?

⁴³Jisu bonsi khe thiphin ba, Daber si.

⁴⁴Ang khe haihayaba Bupha sikphaya thikhade saosi bo aniha phai phuya; ode ang bonsi khe jam khali ni basain ha mathang phin ma.

⁴⁵Gorasalirao ni laisi ha, Madai sling ri hi bonsi dong ma se thihi reb du. Sere Bupha ni grao khe khna hi, bo ni phrang slingyarao de aniha phai re.

⁴⁶Saosi bo Bupha khe nu kha thihi thiya, Madai ni phrang saosi baigoyaba khe garhi de; bo de Bupha khe nu kha.

⁴⁷Gibi jang ang nisi khe thi du, sere bokhe lon du, thaoglao ni hayu mai kha.

⁴⁸Ang ning hayu ni hon se.

⁴⁹Nisi ni phagararao hajengling ha manna ji khabo, bonsi thih kha.

⁵⁰Sorgo ni phrang hon akhai buyaba de ebo ning, sere bokhe ji re, bo de thithaoya.

⁵¹Ang ning sorgo ni phrang akhai buyaba, mathang riyaba hon se. Sere ebo hon khe ji du, bo thaoglao sosi thanghi dong ma se, habsao ni hayu ni khlai hi hon ang riginyaba de ani bahain se, thihi bo thi ba.

⁵²Odehe, Judarao hamsi ning nam jalai ba, Ebo subung la jarni bahain khe jimane jinthane bedehe riphu ma? thihi bonsi thi ba.

⁵³Jisu bonsi niha thi ba, Gibi jang ang nisi khe thi du, Marsi ni Basa ni bahain khe jihi, boni bithi khe lingya kha de, nisi jar niha de hayu giri.

⁵⁴Sere ani bahain khe ji hi, ani bithi khe ling re, bo thaoglao ni hayu khe mai re, yaohonthao ni basain ha ang bokhe baija ri nang.

⁵⁵Ani bahain ning asol jimu, ar ani bithi ning asol lingmu se.

⁵⁶Sere ani bahain khe ji hi, ani thih khe ling re, bo aniha dong du, angbo boni ha dongsong du.

⁵⁷Thanghi dongyaba Bupha ang khe haiha ba, ode, boni khlai hi ang thanghi dongba lai ning, ang khe jiyababo ani khlai hi thang hi dongma se.

⁵⁸Ebo de sorgo ni phrang akhai buyaba hon se. Nisi ni phagararao ji kha, ar thih kha; thikhabo ebo hon khe jiyaba de thaoglao sosi thanghi dong ma se.

⁵⁹Ebo grao buthu Jisu Kapernaum ni sunagog ha sling ribani bubli ha thiyaba grao se.

⁶⁰Boni rikphayarao gabang subung ebo grao buthu khe khnahi bo khe thi ba, Ebo grao de hamsi ning rao bi, sere bo buthu khe tharmai phu ma?

⁶¹Ebo grao ni balam ha, boni rikphayarao ni khah berlaiba thihi Jisu tharmai ba, ode bonsi niha thi ba, Ebo grao nisi khe khasai ri ba?

⁶²Marsi ni Basa sagang ni dongthan ha thangphinba khe nu khali nisi bede ja ma?

⁶³Hayu riyaba de bese se; bahain de musi khusi nibo niya. Nisi niha ang grao thiyaba buthu de bese se, ode hayubo bo ning.

⁶⁴Thikhabo nisi ni bising ha asaba lonyayaba dong. (Jisu bokhe lonyayarao ar bokhe remriyasa khe sagang ni phrang mithi ladu.)

⁶⁵Bo grao thipha ba, Eboni khlai hi se ang nisi khe thi ba, Bupha juruya kha de, saosibo ani ha phai phuiya thihi ang thiyaba grao de ebo grao se.

⁶⁶Ebo grao ni khlai hi, bo ni phrang boni rikphayarao gabang bokhe haiger kha, ar boni yaohon rikphaya kha.

⁶⁷Odebani, Jisu jhigin niha, Nisibo thang lama nangjao du? thihi sing ba.

⁶⁸Simon Peter boni ha, Gabra, sere niha jing thang ma? Thaoglao ni hayu ni grao nini ha se dong ba.

⁶⁹Madai ni gatharyaba subung ning se ning thihi jing lon kha, ar mithibo mithi kha, thihi thiphin ba.

⁷⁰Jisu bonsi khe thiphin ba, Nisi jhigin khe ang saikhoba niya? Thikhabo, nisi ni bising ha saosi de Diabol se!

⁷¹Bo Simon Iskariot ni basa Juda ni grao khe ning thi ba. Bo de jhigin ni bising ha dongyaba, bo khe rem riginyaba de bo ning.