Read Dimasa John 7 Bible Online

John 7 - Dimasa bible

John 7

¹Boni yaohon ha, Jisu Galili raji ha thang ba. Judarao bokhe sthai mane bao bani khlai hi, bo Judai rajiha thangma nangjaoya.

²Bo bubli ha Judarao ni Khepsa ni Mel sampha kha,

³odehe, boni buphlungthu boni ha, Nini rikphayaraobo ning khusi dangyaba buthu khe nuphu mane ebo hathan khe haiger hi, Judai rajiha thang lah.

⁴Bumu gnang jama khe nangjao hi asababo khaohi khusi dangya. Ebo khusi buthu khe ning dang kha de, habsao ni sagang ha ning phnu ri lah, thihi bonsi thi ba.

⁵(Boni buphlung thubo bokhe lonya).

⁶Jisu bonsi niha, Ani bubli sophaiya kho, thikhabo nisi ni bubli de nalai bo sophai sai kha.

⁷Habsao nisi khe jajaoya jaya, thikhabo ang khe de jajaoya ja re, bede thikhala bonsi ni dang gajai buthu khe ang thiphla bani.

⁸Mel ha nisi thang lah. Ang de ebo mel ha thang nang niya, bede thikhade ani bubli sophaiya kho, thihi bo thi ba.

⁹Ebo grao khe thibani yaohon ha, bo Galili raji ha ning dong la kha.

¹⁰Boni buphlungthu mel ha thang bani yaohon ha, bobo oraha phirik phirik mithi jaoyahi thang ba.

¹¹Mel ha Judarao bokhe smai hi, Bo la braha dong? thi hi sing ba.

¹²Subung bojom jayarao boni balam ha grao singlai ba. Sereba Bo hamba subung se thihi grao thi ba, sereba de, Niya, bo subung buthu khe hamyayaba lama ha langpha ba se thihi thi ba.

¹³Thikhabo, Judarao khe khin bani khlai hi boni balam ha saosi nebo grao thiphla raoya.

¹⁴Mel jisaiba ha Jisu Madaikhoh ha thanghi sling riba.

¹⁵Judarao hamsi ning gmang ba, Ebo subung la slingyahi, bede elei gyan mai ba? thihi thi ba.

¹⁶Jisu bonsi khe thiphin ba, Ang slingriyaba grao jarni niya, ang khe haihayaba ni se.

¹⁷Sere Madai ni nangjaoma khe dang ma nangjao re, ang slingriyaba grao khe Madai ni phrang baigoyaba na ang jarni nangjaoba lai thiba thihi tharmai nang.

¹⁸Sere jarni nangjaoma lai grao thi re, bo jarni muima khe se smai ba. Sere jarni haihayaba ni muima khe smaiyaba de lonma gnang se, boha musibo gajai giri.

¹⁹Moses nisi ne Dara riya na somo? Nisi la saosi bo Dara khe maniya. Snadi jabani ang khe sthaima bao ba?

²⁰Subung buthu thiphin ba, Ning de sgain madai se. Sere ning khe sthaima bao ba?

²¹Jisu bonsi khe thiphin ba, Ang masi khusi dangba ha, nisi khrip bo gmang ba.

²²Moses buju rasoma ni hukhum nisi ne riba, (bo Moses ni gede baigoyaba niyahi phagararao ni gede baigoyaba se). Odehe, Lenggo Basain habo nisi buju raso re.

²³Moses ni Dara khe mani mane Lenggo Basain ha buju raso re thikhade, snadi jabani Lenggo Basain ha ang ham ribani khlai hi ani basao ha nisi thamsi baigo ba?

²⁴Baji ha nujaoba lai niyahi gibi jang bisar khlai lah.

²⁵Jerusalem ni gejesi subung, Ebo subung malai sthai ma baoyaba niya?

²⁶Nai lah! Khrip ni sagang ha grao jo du, saosi nebo bokhe aphoti khlaiya! Hojarao ebo khe Messia se thihi bonsi tharmai la kha thi?

²⁷Ebo subung braha ni phrang phaiba jing mithi du; Krista de phaiba ha la braha ni phrang bo phai ba, saosi bo mithi nang niya, thihi bonsi thi ba.

²⁸Madai ni bikhoh ha slingriba ha Jisu jirik khao ba, Nisi ang khe mithi du, braha ni phrang ang phaiba, bo khebo nisi mithi du. Thikhabo, ang jarni khemotha jang phaiya. Ang khe haihayaba de gibiyaba se, bokhe nisi mithiya.

²⁹Ang de bokhe mithi du, boni phrang se ang phai ba, bo ning ang khe haihayaba se. thihi bo thi ba.

³⁰Odehe, bonsi bokhe remma bao ba, thikhabo boni bubli sophaiya bani khlaihi saosi nebo boni basao ha yao dophaya.

³¹Subungrao ni bising ha gabang bokhe lon ba, Krista phaiba ha ebo subung dangba thane bangdao hi gmang thaosisiyaba sin buthu khe dang ri ma na somo? thihi bonsi thi ba.

³²Boni balam ha subung buthu phirik phirik grao thiba khe khna hi Pharisairao ar Jonthaimarao bokhe rem mane bikhoh naisoyarao khe bonsi haiha ba.

³³Jisu thi ba, Khaisa bubli ni khlaihi ang nisi jang dongpha ma, boni yaohon ha ang khe haihayaba niha ang thang la ma.

³⁴Nisi ang khe smai ma, thikhabo nisi ang khe nu nang niya, ang dongyaba hathan habo nisi phai phuya.

³⁵Judarao thi ba, Bo braha thangma bao ba, jing bokhe maiya mani? Greek saraoni bising ha Judarao dongyaba jang thanghi, Greek sarao khe sling ri mane baoba na somo?

³⁶Nisi ang khe smaima, thikhabo nisi ang khe mai nang niya, ang dongyaba hathan habo nisi phai phuiya, bo thiyaba ni ortho de sumjadi ja ma? thihi bonsi thi ba.

³⁷Mel ni yaohonthao ni basain, basain dedao thaoyaba ha Jisu song hi, jirik khao hi grao jo ba, Sere dih gangjao re, aniha phaihi ling la thing.

³⁸Sere ang khe lon re, Madai ni Laisi ha thiba lai ning, boni khuh ni phrang hayuni dikhong buthu baigo lang ma se, thihi thi ba.

³⁹Ebo grao boni lonyarao Bese mai mani grao se. Bese de bo bubli sosi ri phaya, Jisu bakhan maiya bani khlai hi.

⁴⁰Subung githim laiyarao ni bising ha khrip subung ebo grao buthu khe khna hi, Ebo subung de gorasali se ning, thihi bonsi thi ba.

⁴¹Gibin subung, Ebo de Krista se thi ba. Thikhabo, gibin buthu la, Krista Galili raji ni phrang baigoma niya, thi ba.

⁴²Madai ni grao de Krista de David ni greng ni phrang, David dongyaba nolei, Bethlehem ni phrang se baigo ma thihi thiya? thihi sani ba.

⁴³Odehe, boni khlai hi subung buthu ni bising ha degaolei ba.

⁴⁴Bonsi ni bising ha khrip subung bokhe remma nangjao ba, thikhabo, saosibo boni basao ha yao suguya.

⁴⁵Naisoyaba siphaiyarao jonthaimarao ar Pharisairao niha phaiphin ba; bonsi, Sumjabani nisi bokhe labuya ba? thihi bonsi khe sing ba.

⁴⁶Siphaiyarao thiphin ba, Saosi bo elei grao thiphuya!

⁴⁷Pharisairao bonsi khe thi ba, Nisi khebo bo thokhi kha na?

⁴⁸Hojarao ar Pharisairao ni bising ha saosi nebo bokhe lonya thihi nisi mithiya?

⁴⁹Ebo subung buthu, Dara khe mithiyayarao se, bonsi sarithai maiyaba se.

⁵⁰Bonsi ni bising ha saosi, Nikodem thiyaba, sagang ha Jisu niha phaiyaba, bonsi niha thi ba,

⁵¹Jini Dara ha, subung ni khuh ni grao jang jarni dangyaba khusi khe mithi bani sagang ha gajai riphu nang?

⁵²Bonsi thi ba, Ningbo Galili ni subung na? Madai ni laisi ni grao khe hamsi ning smai lah, Galili ni phrang gorasali baigoya thihi ning nu nang.

⁵³Odehe, khrip subungbo jar jarni noh ha thang la kha.