Read Dimasa Dangyasarao 1 Bible Online

Dangyasarao 1 - Dimasa bible

Dangyasarao 1

¹O Theophil, sagang ni laisi ha, Jisu Krista khusi dangyaba jang bo slingri jenyaba khrip grao khe ang reb kha.

²Bese Gathar ni juruma jang bo dangyasa saikho jaoyarao niha grao hanggai blai hi, sorgo ha langjao hi dong ba sosi ni grao se.

³Bo Apostolrao niha dukhu jablai bani yaohon ha gabang phorman jang jar khe jar bonsi ne gathang phunu ba, odehe basain jang bisagin sosi bonsi jang nujao hi, Madai ni raji ni grao khe bo sainthi ba.

⁴Odehe, bonsi bojom jayaba habo bo dongpha ba, Jerusalem khe da haiger, Madai grao hanggaiyaba ni balam ha ang thiyaba khe nisi khna kha, bokhe jon lah, thihi bo sani ba.

⁵Johan de dih jang bo baptisma khlai re, thikhabo khaisa basain ni yaohon ha nisi Bese Gathar ni baptisma mai nang, bo ode thi ba.

⁶Apostolrao bojom jahi Jisu khe goron ba ha, bonsi bokhe sing ba, Gabra, ning Israel raone raji riphin ginyaba la duha ja ma na?

⁷Jisu bonsi niha thiphin ba, Bupha ning bo bubli jang bo basain khe jarni hukhum ni grao ha dong mani khlai hi bo dengyaba khe nisi tharmai ma nangya dou.

⁸Thikhabo, Bese Gathar de nisi ni basao ha sophai kha ning, nisi raothai mai ma se. Odebani, Jerusalem, Juda odehe Samari raji ni khrip nolei ha, odehe phirthi jamthaoba sosi, nisi ani grao ni sakhi ja ma se.

⁹Ebo grao khe bo thiblai bani yaohon ha, bokhe naihi dongba ha ning, sorgo gede langjao hi dong ba, ode jimi jang nuso phuya si bokhe sugu lang la kha.

¹⁰Odehe, bo thangla bani sorgo gede bonsi naihi dongsai ba ha ning, subung gini rih guphu phin hi bonsi ni rogong ha songphai ba,

¹¹odehe bonsi khe thi ba, Galili raji ni subung buthu, snadi jabani nisi nokhasao gede naihi song ba? Ebo Jisu, nisi ni phrang nokhasao gede sugu hi langba khe nisi nuba lai ning, bo olei jasosi ning phaiphin ma se.

¹²Odehe, Apostolrao Oliv hading thiyaba ni phrang Jerusalem ha thangphin la kha, bo hading Jerusalem gabasi se. Lenggo basain habo daobai lang phudu.

¹³Bonsi hapsing hi bonsini dongthan khutha basao ha gakhulang hi, Peter, Johan, Jakob, Andri, Philip, Thoma, Bartholomai, Matthew, Alphai ni basa Jakob, Simon Zealot dol ni subung ar Jakob ni basa Juda.

¹⁴Bo buthu khrip bo masainjik sereba buthu odehe Jisu ni buma Mari, Jisu ni buphlung thu jang khah masi jahi khah jang muh jang bi dada dong ba.

¹⁵Gejesi basain ni yaohon ha, bonsi bojom jahi dong ba, (bonsi khrip jang rjasi khon lai ja du). Peter bonsi ni rogong ha song hi thi ba,

¹⁶“Ani daphlungrao, Bese Gathar jang David ni khuh ha, Jisu khe remyarao ni hoja Juda ni balam ha thidaya ba, bo Madai ni laisi ni grao de sophai ma ning.

¹⁷Bokhe jing sainpha kha, ebo khusi dangyaba ha bo phantha bo maipha kha.

¹⁸(Bo de boni phap ni dam jang hathan masi bonsi barai hi, bo blip pha hi galai dada, boni bohoh gejer ha berekkhaohi, boni bubu khrip baigo thar ba.

¹⁹Odehe bo grao khe Jerusalem ha dongyarao khripbo tharmai kha; odebani, bo hathan khe bonsi ni grao jang Akeldama thi kha, bode, thijao ni hathan thiyaba grao se.)

²⁰Bakhan ni Rajabthai ni laisi ha de, ebo grao khe reb du: Boni dongthan sajam jao thing, Boni bising ha saosi bo da dong thing. Ebo grao khe bo reb du, Bo hoja jayaba khe malai mai la thing.

²¹Odebani, Gabra Jisu Krista jini bising hapsing re baigo re, bo bubli ni bising ha jing jang dongphayaba,

²²odehe Baptisma riyaba Johan ni bubli ni phrang Jisu sugujao hi dongbani bubli sosi elei dongpha laiyaba subung saosi, bo baijaphinyaba khe mithi pha mane khlai hi jing saikho ma nang du,” thihi bo thi ba.

²³Odebani, subung gini khe bonsi saikho ba, saosi de Josef Barsabba (boni gibin bumu Jasta) ode saosi de Matthia.

²⁴Odehe bonsi, Gabra ning khrip subung ni khah khe mithiyaba, ebo buthu ha sere khe ning saikho ba, jing khe tharmai ri lah.

²⁵Juda de jarni dongthan ha thangla phumani khlai hi, ebo khusi dangyaba, ode dangyasa khusi bo raoya jahi, boni baslaine khlai hi, thihi bonsi bi ba.

²⁶Odehe, bonsi sama nai ba, ode bonsini sama de Matthia ni basao ha galai kha. Odebani, bokhe dangyasa jhiseh ni bising ha sainpha jao kha.