Read Dimasa Dangyasarao 10 Bible Online

Dangyasarao 10 - Dimasa bible

Dangyasarao 10

¹Kaisari nolei ha bumu Korneli thiyaba, subung saosi dong ba. Bo Italy dol thiyaba ni siphaiya rjasi ni hoja se.

²Bo Madai khe maniyaba subung se, bonsi nokhorsi bo Madai khe khin re; ode, malai ne gabang jinis ri re, ar Madai niha bo bonsi hamsi ning bi re.

³Bo ning sainbli japhai hi, saomi lai ragao sisi saogari jang Madai ni degla saosi boni ha hapsing hi, bokhe grao thiba khe nu ba, O Korneli, thihi.

⁴Bo hamsisi nai dada khin ba, ode O Gabra, snadi? thihi sing ba. Sorgo ni degla thiphin ba, Ning biyaba buthu jang jinis yaophayaba grao buthu khe wainso mane khlai hi, Madai niha sohi kha.

⁵Duha, Joppa nolei ha subung haiha hi, subung saosi, Simon Peter thiyaba khe long tha.

⁶Migur slamyaba Simon ni noh ha naorai jahi dong, boni noh jakha de sagor ni dergong ha dong.

⁷Sorgo ni degla thang bani yaohon ha, Korneli jarni dangyasa ode Madai khe maniyaba siphaya saosi khe long ba.

⁸Bonsi gini niha bo khrip grao khe sainthi blai hi Joppa nolei ha bonsi khe haiha kha.

⁹Gibin basain ha, bonsi thangba ha, nolei gabasi ha sohi ba jang, Peter, sainjer ni makham jima ni bubli ha, Madai bima ni khlai hi, noh khim basao ha bo gakhu ba.

¹⁰Bo hukhrijao phai hi, makham jima nangjao kha; thikhabo, bonsi ji mane salaiba ha ning, phain merei jao kha.

¹¹Nokhasao khuru hi sma ba bokhoh masi rih gedeba lai, sersi giding bogrong grongbri ni phrang khathai dada hah ha dikkhlai ba khe bo nu ba.

¹²Boni bising ha de, igah gongbri ode hang gnang ar basao ha khrip jadi dao bo dong ba.

¹³Boniha, masi khurang jang, Peter, baija hi, sthai hi ji lah, ode bo thiphai ba.

¹⁴Thikhabo, Peter thi ba, Gabra, ang jiya dou, gathar niyayaba jang gathar khlaiyayaba asaba khebo ang jiya.

¹⁵Phingin, khurang jang, Madai gathar khlaiyaba asaba khebo ning gathar niya da thi, ode thi ba.

¹⁶Olei ning phintham ja kha, boha srap bo nokhasao ha sugu phin lang la kha.

¹⁷Peter saomi lai nuyaba khe, bo la snadi ja kha thihi khah waimu nang hi dongba ha, Korneli subung haihayarao Simon ni noh khe singso kha, ode boha ning bonsi derga kholei ha songphai hi,

¹⁸bonsi jirik ba, Simon, Peter thiyaba, eraha naorai jahi dong ba? thihi bonsi sing ba.

¹⁹Peter boni saomi ni grao khe baohi dongba ha, Bese jang bokhe thi ba, Nai lah, ning khe subung gini smai du,

²⁰odebani, baija hi, akhai dada, musi khebo lonya jaya hi bonsi ni yaohon rikpha lang lah. Bonsi khe ang ning haiha ba se.

²¹Odebani, Peter bo buthu ni sagang ha bo akhai hi, bonsi khe thi ba, Nisi smaiyaba de ang ning, nisi snadi khusi jang phai ba?

²²Bonsi thiphin ba, Korneli, siphaya rjasi ni hoja, jing khe haiha ba. Bo Madai khe khinyaba, Juda jadi khripbo man khlaiyaba, ar gibi subung se. Bo niha sorgo ni degla saosi nujao hi, ning khe boni noh ha thang mane longha du, ning grao sainthiyaba khna mane khlai hi.

²³Subung buthu khe noh ha longsing hi, bonsi khe thu ri kha. Gibin basain ha, baija hi bonsi jang baosi bo thang ba, Joppa nolei ni subung sereba sereba lonyarao bo bonsi jang baosi thangpha ba.

²⁴Gibin basain ha, Kaisari nolei ha bonsi hapsing hi kha. Ode, Korneli de boha jarni apnarao ode jarni lugu khathik buthu khe bo longthim hi, bonsi khe jonhi ning dong ba.

²⁵Peter hapsing ma jaba ha, Korneli khe bo lamjao hi boni igah rogong ha yasgu thuhi Madai khe khlimba lai bo khe khlim ba.

²⁶Thikhabo, Peter bokhe yao remkhu hi, Song lah, ang bo subung se, thihi thi ba.

²⁷Bo jang baosi sainlai hi ning, noh bising ha hap ba, oraha subung gabang bojom jaba hi dengba khe bo nu ba.

²⁸Bonsi khe Peter thi ba, Juda jadi gibin jang dongpha lai ba bo gathar niyathai khe nisi ning mithi du; thikhabo, Madai ang khe thi du, asaba subung khe bo gathar gusu da thi.

²⁹Odebani se, ang musibo thiyahi nisi longba jang phai ba, duha ang nisi khe sing du, snadi khusi ni khlai hi ang khe long ba?

³⁰Korneli thi ba, Nokha saintham ja kha, ang jarni noh ha phintham hading ha biba ha, subung saosi rih guphu jnayaba khe phin hi ani sagang ha songphai hi, thi ba,

³¹Korneli, ning biyaba khe khna ha kha, ode ning jinis yaophayaba buthu khe bo Madai tharmai kha,

³²Odebani, Joppa nolei ha subung haiha hi Simon, Peter thiyaba khe nini ha longha lah, bo sagor ni dergong ha, migur slamyaba Simon ni noh ha naorai jahi dong,

³³Odebani, nini ha ang srap subung haiha ba se; ning phai kha ham kha dou. Odebani, Gabra ning khe snadi grao thiba bokhe khna mane jing khripbo Madai ni sagang ha dong ba se.

³⁴Boha Peter thiba, Madai de subung hamjaodao hamjaoyadao jaya thihi gibi jang ang tharmai du;

³⁵thikhabo, khrip jadi ni bising habo sere bokhe khin hi, hamba khusi dangyaba si de, bo khaja jaoyaba subung jama se.

³⁶Bo ning, santi ni hamba graojma, Jisu Krista ni khuh jang sainthi hi Israel greng buthu niha grao haiha ba, (Jisu de khrip subung ni Gabra se).

³⁷Johan baptisma ni grao khe bai bani yaohon ha, Galili raji ni phrang jenhi, Juda raji ni khrip haphai ha grao gublung tharba khe nisibo mithi du thi.

³⁸Nazareth Jisu ni balam ni grao de, olei bokhe Madai ni Bese Gathar jang raothai ha lupha hi bo subung ni basao ha hamba khusi dang ba, ode Soithan jang dukhu rijaoya ba khrip khebo ham ri phalang re. Bede thikhade, Madai bo jang baosi dongpha du.

³⁹Juda raji jang Jerusalem ha bo khusi dangyaba buthu khrip ni jing ning sakhi se. Bokhe de kross ha dikpha hi bonsi sthai kha.

⁴⁰Thikhabo Madai ning bokhe nokha sain tham ha bo mathang phin hi, gibi jang bonsi ne phnu ri phai kha.

⁴¹Ode khrip subung niha niya hi, boni grao ni sakhi ne khlai hi sagang ha, Madai ning saikho kha, jing ning subung githi ni phrang baijaphin bani yaohon ha bo jang baosi jipha laiyarao lingpha laiyarao se.

⁴²Bo githirao jang thanghi dongyarao ni basao ha bisardar ne Madai salaiyaba de ebo ning thihi, subung buthu niha bai mane ode sakhi ri mane khlai hi Madai ning jing khe sani ba se.

⁴³Sere bokhe lon du, boni bumu ni khlai hi phap buthu ni map mai ma se thiyaba boni balam khe gorasalirao khrip bonsi sakhi ri du, bo ode thi ba.

⁴⁴Odehe, Peter grao khe thisaiba ha ning grao khnayarao khrip ni basao ha Bese Gathar sophai kha.

⁴⁵Judarao ni bising ha lonyarao, Peter jang baosi phaiyarao, Bese Gathar riyaba khe Jentailrao ni basao habo lukhru bani hamsi ning gmang ba.

⁴⁶Bede thikhade, grao jophuyayaba jang grao thihi, Madai khe bakhan khlaiba khe khna kha.

⁴⁷Ebo ni balam ha, Elei subung buthu, jing lai Bese Gathar maiyarao de bonsi baptisma jaya mane khlai hi dih yaowaiba khe sere mathao phuma? thihi Peter thi ba.

⁴⁸Odebani, Jisu Krista ni bumu jang baptisma ri mani grao ri ba. Boni yaohon ha basain glao dongthao mane khlai hi bonsi bokhe khainsu ba.