Read Dimasa Dangyasarao 13 Bible Online

Dangyasarao 13 - Dimasa bible

Dangyasarao 13

¹Antiokei ha longjomrao ni bising ha ning grao sainthiyarao ode slingriyarao dong ba, bonsi Barnaba thu, Simeon, bonsi Niger thijaoyaba thu, Kurini nolei ni Lukia thu, Raja Herod ni daphlung Manaina thu, Saul thu se.

²Bonsi Gabra ni khusi dang hi, hoh khongja dongba ha, Bese Gathar jang, Barnaba jang Saul khe anthane khlai hi, ang saniba lai khusi dang mane, gibin khlai ha, thiba.

³Odebani, hoh khongja donghi, bonsi Madai bi blai bani yaohon ha bonsi ni basao ha yao deng hi bonsi khe haiha kha.

⁴Odebani, Bese Gathar haijao hi, bonsi thangla kha. Selukai nolei ha thang hi, oraha ni phrang Kupra hahgojo ha rung jang bonsi thang kha.

⁵Salamis nolei ha bonsi sohi dada, Juda bojom jayaba noh buthu ha Madai ni grao khe bonsi sainthi ba; Johan khebo bonsi ni khusi dang mani khlai hi langpha ba.

⁶Odehe, bo hahgojo ha Paphos sosi bonsi thangpha lang hi, mosol gorasali, Juda subung saosi khe nu ba, boni bumu de Bar Jisu.

⁷Bo de Rajani baslai ha khamyaba, Serjia Paula, subung girikyaba niha dongyaba se. Bo Rajani baslai ha khamyaba ning Barnaba jang Saul khe long hi, Madai ni grao khe khna ma nangjao ma.

⁸Thikhabo, Elum (Bar Jisu ni gibin bumu, boni ortho de montro ringba thiyaba se) Raja ni baslai ha khamyaba khe lon riya mane baohi, bonsi jang niya lai ba.

⁹Boha Saul, Paul thiyaba, Bese Gathar jang gablai hi bokhe naipha hi thi ba,

¹⁰Ning subung thokhiyaba jang rege rege khrip ha gablaiyaba, Soithan ni basa, ning khrip jadi ha hamba giriyaba, ning Gabra ni lama belengyaba khe gugui khlai mane haigerya na?

¹¹Duha mithi lah, Gabra ni yao nini basao ha galai hi, nini muthai gana ja nang; ode, sain khe nu nang niya kha, bo ode thi ba. Srap khlai hi andar jang jimi boni basao ha galai kha, bokhe yao rem mane smai kha.

¹²Raja ni baslai ha khamyaba, bo sophaiya ba jathai khe nuba jang, Gabra slingriyaba grao khe hamsi ning gmang hi lon kha.

¹³Paul de boni lugurao jang boha Paphos ni phrang rung ha thang hi, Pamphulia raji ni Perga thiyaba ha sohi kha; ode, Johan de bonsi khe dangkhlai lang hi Jerusalem ha bo thangphin la kha.

¹⁴Thikhabo, bonsi Perga ni phrang thangpha lang hi, Pisidia raji ni Antiokei ha sohi kha; ode, lenggo basain ha bojom jayaba noh ha hap hi bonsi kham ba.

¹⁵Odehe, Dara ni laisi jang Gorasalirao ni laisi phuri blai hi, bojom jayaba ni hojarao niha subung haiha hi sing ba, Daphlungrao, subung buthu sibring mani nisi niha dong kha de, nisi thi lah, bonsi ode thi ba.

¹⁶Paul songkhu hi, yao sip hi thi ba, Israel subung buthu ode Madai khe khinyarao, khna lah,

¹⁷Israel buthu ni Madai ning jini greng buthu khe saikho hi, Egypt raji ha bonsi naorai jahi dong ba, oraha ni phrang Madai ni yao ni bol jang langthar kha.

¹⁸Nokha maithai jang bisagin sosi hajengling ha bonsi khusi dangyaba buthu khe bo nai hi ning dong ba.

¹⁹Kanaan raji ha jadi sni ni subung buthu khe sjam blai bani yaohon ha, nokha maithai jang rjabri gejer ni bising ha bonsi ni raji khe ning lala mane khlai hi bo ronpha lang ba.

²⁰Ebo khrip nokha maithai jang rjabri gejer nang ba. Ebo ni yaohon ha se gorasali Samuel ni bubli sosi bonsi ni bisardarrao ne bo nepha ba.

²¹Boni yaohon ha, bonsi Raja sain ba; odebani, Madai ning Saul, Kis thiyaba ni basa, Benjamin sengphong ni subung khe bonsi ne Raja slam ri kha.

²²Bokhe nekhao bani yaohon ha se, bonsi ni Raja ne khlai hi David khe Raja slam ba. Madai ning jarni grao jang thi ba, David, Jesai ni basa, ani khah jang baosiyaba subung khe ang mai kha, bo ning ani nangjaoma khe phura dang ma se, ode thi ba.

²³Bo bongso ni bising ha Madai ning, jar grao hanggaiyaba lai jasosi ning, Israelrao niha saosi sogoyahba Jisu khe bo haiha ba.

²⁴Jisu jarni khusi dangjenba ni sagang ha, Johan de khah phinhi phap khe dangkhlai hi baptisma labani grao khe Israel subung khrip jadi ni bising ha sainthi kha.

²⁵Johan, bo jarni khusi khe phura dangba ha, thi ba, Ning ang khe snadi buji ba? Bo ang niya dou. Thikhabo, nai lah, ani yaohon ha sereba subung phai du, boni jutha kho ri mane bo ang gathaya.

²⁶O daphlungrao, Abraham ni greng ni basa thu, nisi ni bising ha khrip Madai khe khinyarao, jini ha ebo sogoma ni grao khe haiha kha!

²⁷Jerusalem ha dongyarao, ode bonsi ni hojaraobo, bokhe bonsi tharmaiya bani, ode gorasalirao nalai lenggo basain ha phuriyaba khe bonsi bujiya bani, bo khe gajai rihi bo grao buthu khe bonsi phura khlai ba.

²⁸Bonsi sthai mane sosi boha musibo gajai maiya; thikhabo, Pilat niha bo khe sthai mane bonsi khainsu ba.

²⁹Ode, boni balam ha rebyaba grao buthu khe phura khlai hi, bo khe kross ni phrang dikkhlai hi mangkhlong ha thu ri ba.

³⁰Thikhabo, Madai ning bokhe githi ni phrang mathangphin hi baija ri kha,

³¹Galili raji ni phrang Jerusalem sosi bo jang baosi thangpha laiyarao gabang basain sosi bonsi jang nujao ba; bo subung buthu de duhabo subung niha bo grao khe sakhi ri du.

³²Jing bo jini greng buthu niha grao hanggaiyaba ni balam ha khajama ni graojma khe nisine sainthi phai du.

³³Odelai ning, Madai ning Jisu khe baija ri hi, bo ning hanggaiyaba khe jini greng buthu ni khlai hi phura khlai kha; Bakhan ni Rajabthai maginyaba ha reb ba: Ning ani basa se dou, Dini ha ning khe ang hajai ri kha.

³⁴Saoyaba hathan ha thangphinya mani khlai hi, Madai ning bokhe subung githi ni bising ni phrang mathang bani balam habo ede thi du, David niha khasaoma hanggaiyaba buthu khe, Nini ha ang ri nang.

³⁵Odebani, bo ar masi rajabthai habo thi du: Ning jarni subung gathar khe sao mane ri nang niya.

³⁶Bede thikhade, David Madai nangjao ba lai jarni bubli ha bo khusi dangblai hi, thulang la kha, ode jarni greng buthu niha thuhi bo saolang la kha.

³⁷Thikhabo, Madai mathang phinyaba de musi khali bo sao nang niya.

³⁸Odebani, daphlungrao, nisi tharmai lah, eboni khlai hi se phap map mai mani balam ni grao khe nisi niha bo sainthi ba;

³⁹sere bokhe lon du, khrip habo gajai ha galai rijao nang niya, odebani Moses ni dara jang de nisi gajai jayahi de dongphuya.

⁴⁰Odebani, girik lah. Ode niyakhade, gorasalirao ni laisi ha bonsi thiyaba grao de nisi ni basao habo sophai ma se.

⁴¹Nisi musuyarao, nai lah! Ode gmang hi jam lang lah, Bede thikhade, nisi thanghi dongba basain buthu ha ang masi khusi dang du, bo jinis khe malai nisi khe thi la khabo nisi de lon nang niya.

⁴²Paul jang Barnaba sunagog ni phrang baigoba jang, subung buthu gibin lenggo basain ha bo grao khe thiphin mane khlai hi khainsu ba.

⁴³Odehe, bojom jayarao dra thar ba jang, Judarao jang bonsi ni dormo khe maniyaba Jentailrao gabang subung Paul jang Barnaba jang bonsi rikpha hi bonsi jang sainlai ba, ode Madai ni khasaoma ha dongsong mane khlai hi bonsi khe sibring ba.

⁴⁴Lenggo basain gibin ha, bo nolei si jang Madai ni grao khe khna mani khlai hi bonsi bojom japhai ba.

⁴⁵Thikhabo, Judarao subung bang ba khe nuhi, hingsa ja ba, ode Paul grao thiyaba khe jajaoya hi bonsi hamsi ning grao niya lai ba.

⁴⁶Paul ar Barnaba, khitha raoma jang thi ba, Madai ni graothai khe sagangthao ha nisi niha sainthi ma nangjao ba muh. Thikhabo, nisi bokhe dangkhlai bani, ar nisi jar khe thaoglao ni haiyu mai mane latha giri bani, duha Jentailrao ni gede jing sagang lang ma se.

⁴⁷Bede thikhade, Gabra ning olei jing khe sani du, Ang ning khe Jentailrao niha jna ri mane slam kha, Phirthi grongbri sosi sogoma nisi sophu mane khlai hi, thihi reb ba lai.

⁴⁸Jentailrao bo grao khe khnaba jang bonsi khaja hi, Madai khe bakhan khlai hi, ode thaoglao hayu ni khlai hi saikhu jaoyaba khrip bonsi lon kha.

⁴⁹Gabra ni grao bo raji ni haphai ha gublung thar ba.

⁵⁰Thikhabo, Judarao masainjik man gnang, Madai khe lonyarao ode nolei ni khraorao khe khuphai khao hi, Paul jang Barnaba khe bonsi dukhu rihi bonsi ni raji ni phrang rik khlai ba.

⁵¹Ode, bonsi, bonsi ni basao ha bonsi ni yapha ni haduri khe thisa hi, Ikoniam ha sohi kha.

⁵²Antiokei ni lonyarao khajama ar Bese Gathar jang gablai thar kha.