Read Dimasa Dangyasarao 14 Bible Online

Dangyasarao 14 - Dimasa bible

Dangyasarao 14

¹Ikoniam ha Judarao bojom jayaba noh ha Paul jang Barnaba hapsing ba. Boha bonsi jang grao sainthi ba, odebani Greek jang Juda gabang bo lon la kha.

²Thikhabo, lonma nangjaoya Judarao, Jentailrao ni khah ha bonsi sibring hi, daphlungrao khe bonsi nam jalai ri ba.

³Odebani, Gabra ni grao khe khitha rao hi thi dada, oraha ning Apostolrao budu galao dong hi, boha ning sin ode gmang thaosisi khusi dang rihi bonsi ni yao ni phrang, bo jarni khasaoma ni grao khe sakhi ri ba.

⁴Bo nolei ni subung buthu de bonsi degao ba; gejesi Judarao jang gaba kha; gejesi jakha de Apostolrao jang gaba kha.

⁵Odehe, Jentailrao ar Judarao, bonsi ni hojarao jang Apostolrao khe laji phunu hi longthai jang lem ma bao bani bonsi khe bonsi tharmai la kha.

⁶Apostolrao bokhe tharmaiba jang, bonsi Lukaonia raji ha ning, Lustra ode Derbe nolei ha ar bo raji buthu ni haphai ha khailang la kha.

⁷Ode, bonsi oraha ning hamba graojma khe sainthi kha.

⁸Lustra ha subung saosi khamhi dong ba, bo hajaiba ni phrang igah khora se, igah jang bo hemba giri.

⁹Bo Paul grao thiyaba khe khna hi dong ba, ode Paulbo bokhe nai hi, ham mane khlai hi lonma dong thihi bo tharmai ba;

¹⁰boha, Paul khurang bol jang jirik khao hi, Ning igah jang beleng hi song lah, bo ode thi ba. Ode, bo baijlom khu hi, igah jang hem lang la kha.

¹¹Subung buthu Paul khusi dangyaba khe nuba jang, Lukaonia grao jang khurang bol jang jirik khao hi, Madairao subung lai jahi jini ha akhai bu kha, thihi thi ba.

¹²Barnaba khe bonsi Jupitar thi du, Paul khe jakha de grao thiyaba ja bani Merkuri bonsi thi ba.

¹³Jupitar bikhoh nolei baji ha dong ba, bo bikhoh ni jonthai musu jlarao jang khim ni lik ni wadu, saokhuli buthu ni derga rogong ha laphai hi, subung buthu ni sagang ha bonsi bandai rima bao ba.

¹⁴Thikhabo, Apostol Barnaba jang Paul de, bo grao khe khnaba jang, bonsi ni rih khe bonsi jekhao hi, subung buthu ni gejer ha birsing hi, bonsi jirik khao ba,

¹⁵Hoi Ajurao, snadi jabani ebo khusi buthu khe nisi dang ba? Jingbo nisi lai ning subung se; ebo jinis haglai buthu khe nisi dangkhlai hi, nokhasao, phirthi, sagor, ar bonsi ni bising ha dongyaba khrip buthu khe slamyaba, thang hi dongyaba Madai niha nisi dong mane khlai hi hamba graojma khe nisi ne so riba se.

¹⁶Bo Madai, gada ha khrip jadi khe jar jarni lama ha thangma ri re.

¹⁷Thikabo, bo jar khe jar bonsi sakhi riba khe haigerya hi bo hamba khlai re. Nokhasao ni phrang hadi buthu ha rihi hamba maithai buthu khe nisi ne ri du, ode nisi ni khah ha ji mane khajama jang nisi khe gablai ri du.

¹⁸Ebo grao jang subung buthu sainlai mane bandai riginyaba khe bonsi mathao kha.

¹⁹Thikhabo, Antiokei jang Ikoniam ni subung sereba oraha phai hi, subung buthu khe jarni gede bonsi phuslai ba. Odebani, Paul khe bonsi longthai jang lemhi thih kha bao dada bonsi nogor ni baji ha siklang ba.

²⁰Thikhabo, lonyarao boni rogong ha sersi giding songphai hi, bo baija hi nolei ha happhin kha. Ode, gibin basain ha bo Barnaba jang baosi Derbe ha thang la kha.

²¹Paul ar Barnaba, bo nolei buthu ha ning hamba graojma khe sainthi hi, gabang rikphayasa slam bani yaohon ha, Lustra ha dongyarao, Ikoniam ha dongyarao, Antiokei ha thangphin la kha.

²²Gabang dukhu khlai hi Madai ni raji ha jing hapma nang du, thi hi yaohon rikphayarao ni khah khe raodao ri ba. Odehe, lonma ha ning dong mane khlai hi bonsi khe sibring ba.

²³Khrip longjomkhoh ha khraorao yaopha lang hi, hoh khongja khlai hi, bonsi bi bani yaohon ha, lonyaba Gabra niha bonsi dengpha lang ba.

²⁴Pisidia thiyaba raji ha thangthar hi, Pamphulia raji ha bonsi sohi kha.

²⁵Boha Perga ha bonsi grao thiblai hi, Attalia ha bonsi thang ba;

²⁶ode, oraha ni phrang bonsi rung jang baigo hi, Antiokei ha sophai phin ba, bo hathan jakha de bonsi khusi dang blaiyaba khe dang mane khlai hi daphlungrao Madai ni khasaoma ha deng riyaba hathan se.

²⁷Odehe, bonsi sohi bani yaohon ha, longjomrao khe bonsi longthim hi, Madai ning boni khasaoma jang bo dangyaba khrip jang, ode Jentailrao ne lon mani derga bo khuru riba ni balam khe bonsi sainthi ba.

²⁸Ode, lonyarao ni bising ha ning gabang basain laohi bonsi dongthao ba.