Read Dimasa Dangyasarao 15 Bible Online

Dangyasarao 15 - Dimasa bible

Dangyasarao 15

¹Sereba subung Judai raji ni phrang phai hi, Moses ni dara ha dongba lai nisi jogai bujuh rasoma khlaiya thikhade, sogoma khe maiphu nang niya, thihi daphlungrao khe bonsi sling ri ba.

²Paul jang Barnaba, bonsi jang nam khormo jahi ode niyalai hi bonsi grao banglai bani, bonsi ni bising ha sereba subung ebo grao ni balam ha Jerusalem ha Apostolrao ode khraorao niha thang mane bonsi nepha ba.

³Longjom jang bonsi degar hi, bonsi Jentailrao khe khah phin mani balam ni grao khe thipha lang hi Phoiniki raji ode Samari raji ha sothar kha, odehe, khrip daphlung hamsi ning khaja lai ba.

⁴Jerusalem ha bonsi sohiba jang, longjomrao, dangyasarao, ode khraorao bonsi khaja ba. Ode Madai bonsi khe yaowai hi khusi dangyaba khrip khe bonsi sainthi ba.

⁵Thikhabo, Pharisai dolni lonyarao sereba baija hi thi ba, Jentailrao jogai bujuh rasoma khlai ma nang ma se, Moses ni dara khe mani mane hukhum ri ma nang du, bonsi ode thi ba.

⁶Apostolrao jang khraorao bo grao khe bisar khlai mane khlai hi bonsi bojom ja ba.

⁷Bonsi gabang grao banglai bani yaohon ha, Peter baija hi, bonsi niha, Daphlungrao, Jentailrao ning ani khuh ni phrang hamba graojma khna hi lon mani khlai hi, Madai ning sagang ha nisi ni bising ni phrang bo a ne nephaba khe nisi tharmai kha.

⁸Ode, khah mithiyaba Madai, jinthane bo riba lai ning, Bese Gathar bonsi ni ha bo rijao hi, bonsi ni basao ha bo khaja du thihi bonsi sakhi ri du;

⁹bonsi jang jing khe naidao naiyadao jaya hi lonma jang bonsi ni khah khe bo gathar khlai kha.

¹⁰Ode thikhala, jini phagrarao jang jing horphuyaba jowal khe lonyarao ni basao ha dengma bao hi snadi jabani Madai ni gyan khe nisi nai nai ba?

¹¹Bonsi lon ba lai ning jing bo Gabra Jisu ni khasaoma jang goma mai mane jing lon ba se. ode bo thi ba.

¹²Boha khrip subung buthu phirik phirik jahi Barnaba jang Paul khe Madai ning bonsi khe yaowai hi sin buthu jang gmang thaosisiyaba buthu khe Jentailrao ni bising ha dong hi sainthi du si de bonsini grao khe bonsi khna ba.

¹³Bonsi thiblai bani yaohon ha, Jakob song hi thi ba, O daphlungrao, ani grao khe khna lah,

¹⁴Madai ning sagang ha jarni bumu lama ne khlai hi bonsini bising ni phrang bo jarni subung buthu khe khaikho mane khlai hi Jentailrao phai bani grao khe Simon ning sainthi kha.

¹⁵Bo buthu grao jang gorasalirao ni grao mili du:

¹⁶Eboni yaohon ha se ang phaiphin hi David ni khepsa baiyaba khe slamphin ma, Bo hamyayaba khrip khe bo ang hamsisi slamphin ma.

¹⁷Odebani, gibin jadi, Jentailrao khrip ani bumu khe jirikyarao, Gabra khe smai mane khlaihi khepsa khe songkhu ma.

¹⁸Ebo grao buthu khe ning Gabra, habsao jenba ni phrang khna rihi phaiba se, thihi Gabra thi du.

¹⁹Odebani, ang elei bisar khlai du; Jentail raoni bising ha Madai ni gede naiphinyarao khe dukhu riya hi,

²⁰saokhuli ne riyaba jinis gusu khe jiyaba buthu, gaori-gaora jayaba ni balam buthu, gorna derthaiyaba mih ni mogong jiyaba buthu, odehe bithi lingyaba buthu ni phrang gajain dongmane khlaihi bonsi niha reb ba khe se jing nangjao ba.

²¹Bede thikhade, Moses gda ha ning khrip nolei noleiha boni dara ni balam ha sainthi hi sunagog buthu ha lenggo basain sophai kha ning sainthi re, bo ode thi ba.

²²Odehe, yaohon rikphayarao khrip longjomkhoh ni khraorao jang, bonsini dol ni subung khe saikho hi, Paul jang Barnaba jang baosi Antiokei ha haiha mane bao ba. Bonsi saikhoyarao ni bumu de Juda, Barsabba thiyaba, ar Silas se. Bonsi lonyarao ni bising ha man-gnang ar jadaoyaba se.

²³Odehe, bonsini yao ha ede reb hi bonsi haiha ba, Jing Apostolrao, khraorao ode daphlungrao ning Antiokei ha, Suria raji ha, Kilikia raji ha, Jentail daphlung dongyarao khe juthai khlim ha du.

²⁴Jini dolni bisingni sereba subung oraha thanghi nisi khe jarni grao jang khin ri ba, ode nisi khe khah waimu nang riba thihi jing khna ba, thikhabo jing bonsi khe musibo saniya.

²⁵Odebani, jing graosi jahi gibi jang buji hi saikhoyaba subung buthu khe Paul jang Barnaba khe nisi niha jing haiha ba se.

²⁶Gabra Jisu Krista ni bumu ni khlai hi jarni hang khe bisar khlaiyayaba bonsi jang baosi subung saikho hi nisi niha haiha ba ham nang thihi jing tharmai du.

²⁷Odebani se, Juda jang Sila khe jing haiha ba, bonsi bo ebo grao khe ning nisi khe thima se.

²⁸Bese Gathar jang jing khe, ebo grao nangyayaba bubain khe de nisi jarni basaoha dengya kha de ham nang thihi jing thi du.

²⁹Saokhuli khe biyaba mogong da ji lah, ar bithi da ji lah, ar mih ni gorna derphai hi sthaiyaba ni bahain bo da ji lah. Ebo buthu khe nisi haiger kha de, nisini khlai hi ham nang. Hamsisi dong lah.

³⁰Bonsi haijaoyaba buthu Antiokei ha thang la kha. Boha sohiba ha, subung buthu khe bonsi longthim hi, laisi khe bonsi yaopha kha.

³¹Subung buthu bokhe phuri blai hi, bonsi hamsi ning khaja kha, bede thikhade, bo laisi bonsi khe sibring kha.

³²Juda jang Sila de gorasali se bani, grao gabang jang bonsi khe sibring hi rao ri ba.

³³Oraha bonsi budu galao dongbani yaohon ha, bonsi khe haihayarao niha haiphin ha mane khlai hi daphlungrao khe bonsi santi jang haiphin kha.

³⁴(Thikhabo, Sila thiyaba de oraha ning dongsong ma bao ba).

³⁵Paul jang Barnaba gabang gibin subung jang baosi Antiokei ha ning Gabra slingriyaba grao khe sainthi hi dongthao ba.

³⁶Khaisa basain ni yaohon ha, Paul, Barnaba niha thi ba, Duha thangphin hi, khrip nolei ha Gabrani grao khe jing khna riyaba si ha, daphlung dongyarao niha thangpha lang hi, bonsini dongthai khe jing naipha lang nang.

³⁷Boha Barnaba de Johan (Marka thiyaba khe) bonsi niha langphama bao ba, thikhabo Paul de bonsi niha bo langphama nangjaoya.

³⁸Bede thikhade, bonsi khusi dangpha laiba ha, bo bonsi jang baosi thangphaya hi, Pamphulia ha bo khe dangkhlai kha.

³⁹Odebani, hamsi ning bonsi niyalai hi, bonsi degao lai kha. Barnaba, Mark khe jar jang baosi langpha hi, Kupra hahgojo gede rung jang thangla kha.

⁴⁰Paul, Sila khe saikho hi, daphlungrao ne Gabrani khasaoma khe bonsine deng ribani yaohon ha bo thangla kha.

⁴¹Longjomrao khe rao ripha langhi Suria jang Kilikia raji ha bo thang pha lang kha.