Read Dimasa Dangyasarao 16 Bible Online

Dangyasarao 16 - Dimasa bible

Dangyasarao 16

¹Paul, Derbe jang Lustra habo thang ba, ode, oraha ning bumu Timothe thiyaba, lonyasa saosi dong ba. Bo lonyaba Judajik ni basa, thikhabo boni bupha de Greeksa se.

²Lustra jang Ikoniam ha daphlung dongyarao de Timothe khe bakhan khlai re.

³Paul bokhe jar jang baosi langphama nangjao ba; odebani boni jogai bujuh raso ba. Bede thikhade, boni bupha de Greek jadi se thihi bo hathan buthu ha dongyarao mithi thar du.

⁴Bonsi khrip nogor buthu ha thangba lamai jang, Jerusalem ni hoja dongyarao ni bisar khe mani mane khlai hi daphlungrao khe thiri du.

⁵Odebani, longjomrao khe lonma ha rao hi, sain midi bo bonsi bangdao phalang ba.

⁶Bese Gathar jang Asia raji ha grao thiba bo magna bani Phrugia ode Galatia raji ha bonsi thang la kha.

⁷Boha Musia raji gabasi sohi dada, Bithunia raji ha bonsi hapsing ma bao ba, thikhabo, Jisu ni Bese jang bo thang riya.

⁸Odebani, Musia raji khe lailang hi, Troas thiyaba ha bonsi thang la kha.

⁹Boha, Paul jang hor ha, saomi lai Makedonia raji ni subung saosi song hi, Makedonia raji ha phai hi, jing khe juru phai, thi hi boni ha khainsuba khe bo nu ba.

¹⁰Bo saomi khe nuhi srap Makedonia raji ha jing thangma nangma bao ba, Madai se jiniha hamba graojma sainthi mane jing khe longba thihi jing tharmai kha.

¹¹Troas ni phrang jing rung jang baigo hi, beleng thing thing Samothraki ha jing thuhi, gibin basain ha Neapoli ha jing thangphin kha.

¹²Oraha ni phrang Makedonia raji ni masi nolei Philippi thiyaba ha jing thang kha. Odehe, oraha basain galao jing dongthao ba.

¹³Lenggo basain ha khorongma ni daoglap baji gede dih dergong ha bithan ja ma baohi jing oraha thang ba. Ode, jing kham hi masainjik bojom japhaiyarao niha jing grao sainthi ba.

¹⁴Boha bumu Luda thiyaba, rih jaosro phainyaba, Thuatira nolei ni subung, Madai biyaba masainjik saosi, jing grao thiyaba khe khna ba, ode Paul grao thiyaba khe mani mane khlai hi Gabra ning boni khah khe khuru ri kha.

¹⁵Bo jang boni nokhorrao baptisma laha bani yaohon ha, Ang khe gibi jang Gabra ni lonyajik baokha de, ani noh ha phai hi dong lah, thihi jing khe mani hi bo langpha kha.

¹⁶Sainsi khali, jing biyaba hathan ha thangba ha, sereba mala lengjik, sgain sgo sma naiba ringyaba jang gajaoyaba khe goron ba, bo jakha de sma naihi jarni bubrarao ne khlai hi gabang rang rih bojai ri re.

¹⁷Bo Paul jang ode jing jang yaohon rikpha ba, Ebo buthu, nisi ne sogolam ni lama khe sainthiyaba de, Basaothao Madai ni leng buthu se, thihi bo jirikkhao ba.

¹⁸Bo mnang ni phrang ning olei dang re. Odebani, Paul de jajaoya hi, bo naiphin dada, sgain sgo niha thi ba, Jisu Krista ni bumu jang boni bising ni phrang baigo mane ang ning khe grao ri du, bo ode thi ba. Boha ning bo baigo lang la kha.

¹⁹Bokhe lengjik ni bubrarao nuhi, bonsi rang maiyaba khe jam ba thihi bonsi khna hi, Paul jang Sila khe bonsi rem hi, hojarao ni sagang ha hathaima ha sikbu ba.

²⁰Rom ni bisardarrao niha bonsi langhi thi ba, Ebo Judarao de jini nolei khe gaso suso khlai du.

²¹Bonsi gibin dara sling ri du, bo buthu khe jing ajaoba gathar niya, ode mani babo gathar niya, bede thikhade jing Rom sarao se.

²²Odebani, subung buthubo Paul jang Sila jang nanglai mane graosi jahi bonsi phai ba, Ode bisardarrao Paul ar Sila ni rih buthu khe jekhao hi khokhla hi, su mane grao ri ba.

²³Ode, bonsi gabang su bani yaohon ha, phatho ha bonsi jeb ba, ode raokhiyaba niha hamsisi dikhao hi raokhi mani khlai hi bonsi thi ba.

²⁴Phatho ni hoja olei hukhum maihi bonsi khe bising ni khutha ha phraojep hi, bonsi ni igah buthu ha jingjri gain ri ba.

²⁵Hogjer maothi maotha ha Paul jang Sila de bi hi ning Madai ni rajabthai khe rajab ba, ode phatho ha dongyarao bo khna ba.

²⁶Boha ning hamsi ning banglama phai ba, ode khrip derga khuru thar ba, ode subung jingjri jang khayaba buthu khuru thar ba.

²⁷Boha naisoyaba smaohi baijaba de, phatho khoh ni derga buthu khuru hi dongba khe bo nuhi, phatho khoh ha dongyarao khe khaithar kha thihi baoba. Odebani seng khaikho hi jar khe jar sthai la ma bao ba.

²⁸Thikhabo, Paul bol jang jirikkhao hi thi ba, Jar khe musibo da khlai, jing khrip bo eraha ning dongthar du.

²⁹Phatho naisoyaba thaophari sain hi, bising ha birsing ba, ode lup lup mao hi Paul jang Sila ni sagang ha bo blip pha ba.

³⁰Ode bo bonsi khe baji ha lang hi thi ba, Hoi ajurao, sogo mani khlai hi snadi khe ang dang ma? bo ode thi ba.

³¹Bonsi thiphin ba, Gabra Jisu Krista khe lon lah, odese ning jang nini nokhorrao bo goma mai ma.

³²Ode, bo jang boni noh ha dongyarao khrip subung buthu niha Madai ni grao khe bonsi sainthi kha.

³³Okhali ni hor ha ning bo bonsi khe lang hi, bonsi suba ha gasa jayaba buthu khe susa ba, ode, boha ning bo jang boni nokhorsibo bonsi baptisma lathar ba.

³⁴Ode, jarni noh ha bo langhi, bo ji mane ri ba; ode, bonsi Madai khe lon bani bo jang boni khrip nokhorrao jang hamsi ning khaja ba.

³⁵Phorong ha, Rom ni bisardarrao Bo buthu khe haiger ha, thi mane khlai hi subung remyarao khe bonsi haiha ba.

³⁶Odehe, phatho khe naisoyaba, Paul niha bonsi ni grao khe thi ba, Bisardarrao nisi khe haiger mane subung haiha ba, odebani, duha baigo hi santi jang thang lah.

³⁷Thikhabo, Paul subung remyarao niha thi ba, Jing de Rom ni subung se. Jini gajai jadu jaya tharmaiya hi, noleikhor ni sagang ha suhi, phatho ha jing khe jeb kha. Duha snadi jabani jing khe phirik phirik khaikho ba? Ode ja nang niya; bonsi ning phai hi khaikho phaila thing.

³⁸Siphaiyarao bo grao khe bisardarrao niha sainthi ba; ode, Rom ni subung se thihi bonsi mithiba jang hamsi ning bonsi khin kha.

³⁹Odebani, bonsi thang hi, bujai hi, baji ha lang hi, nogor ni phrang thangla mane khlai hi bonsi khe khainsu ba.

⁴⁰Paul jang Sila phatho khe haiger hi, Luda ni noh ha hap ba. Oraha daphlungrao jang bonsi goronlai hi khah santi ri hi, bonsi thangla kha.