Read Dimasa Dangyasarao 17 Bible Online

Dangyasarao 17 - Dimasa bible

Dangyasarao 17

¹Paul jang Sila de Amphipoli jang Appolonia khe lailang hi, Thessalonika ha bonsi sohi kha. Oraha Judarao ni sunagog dong ba.

²Paul, jarni nalai ni dara lai, bonsi niha thang hi, phintham lenggo basain ha Madai ni grao ni phrang hamsisi sainthi phla ba,

³Krista de dukhu khlai ma nang mani grao khe, subung githi ni phrang thang hi baija phin bani grao khebo thiphla hi bo bujai re, Ebo Jisu khe nisi ne sainthiyaba de, bo ning Krista se, thihi bo thi du.

⁴Bonsi ni bising ha gejesi de mani rijao kha, ode Paul jang Sila goronlai kha; Madai khe baoyaba Greek subung hamsi ning ode, masainjikrao ni hoja gabang bo mani kha.

⁵Thikhabo, sereba Judarao de bonsi khe hingsa jahi, sthaima ni sereba sereba sele subung buthu khe labu hi, longthim ba. Khrip nogor khe bonsi gdang sdang khlai hi, Jason ni noh khe bonsi hamya khlai hi, bonsi khe nogor gejer ha langma bao ba.

⁶Thikhabo, bonsi khe maiya hi Jason jang gibin daphlungrao sereba sereba nolei ni hojarao khe labu hi, bonsi jirik khao ba, Habsao khe gdang sdang khlaiyarao eraha phai ba,

⁷Jason, jarni noh ha nohma thao ri ba. Ebo buthu khrip de Raja gibin Jisu thiyaba dong thihi Kaisar ni hukhum khe sbai du, ode bonsi thi ba.

⁸Subung buthu ode nogor ni bisardarrao bo grao buthu khe khna hi, bonsi gdang sdang ja kha.

⁹Odebani, bonsi Jason jang daphlung gibin buthu ni phrang bonsi baslai ha rang lahi, bonsi haiger kha.

¹⁰Hor ha ning daphlungrao, Paul jang Sila khe Beroia nolei ha bonsi srap haiha kha; ode bonsi oraha sohi ba jang, Judarao ni sunagog ha bonsi hapsing kha.

¹¹Oraha ni subung buthu de Thessalonika ni subung buthu thanebo bonsi hamdao. Odebani, khah ha khajama jang grao khe bonsi lamjao hi, bonsi grao thiyaba khe jadu na jaya mithi mani khlai hi sainmidi Madai ni laisi ha bonsi smai re.

¹²Odebani, bo subung buthu gabang ning lon kha; Greek masainjik man gnangrao ode miyahrao bo gabang ning bonsi lon kha.

¹³Thikhabo, Thessalonika ni Judarao, Paul de Beroia nolei ha Madai ni grao khe thi du thihi khna ba jang, orahabo bonsi thang hi, subung buthu khe phuslai hi, bonsi gdang sdang khlai phin ba.

¹⁴Boha daphlungrao ning Paul khe sagor ni dergong sosi thang mani khlai hi haiha kha. Thikhabo, Sila jang Timothe de oraha ning dongthao kha.

¹⁵Paul khe lang smaiyarao de Atheni sosi langsmai ba; ode Sila jang Timothe khe gebre hi boniha srap phai mani grao jamayaba khe lang hi bonsi phaiphin la kha.

¹⁶Paul, Atheni ha bonsi khe jon hi dongba ha, nogor de Madai ni saokhuli jang gablai ba khe bo nuhi bo khah rainjao kha.

¹⁷Odebani, sunagog ha Judarao jang Madai khe khlimyaba Jentailrao gabang bojom jayarao niha bo grao sainlai re, ode hathaima habo, oraha dongphaiyarao si jang sainmidi bobo nam jalai re.

¹⁸Epikuria ode Stoik slingriyasarao sereba subung gyanirao bokhe bonsi jophai ba. Bonsi ni bising ha gejesi, Ebo subung grao bangyaba la snadi grao khe thima bao ba? bonsi ode thi ba. Sereba gejesi jakha de, Raji gibin ni Madai buthu ni grao khe sainthiyaba janai du dou! ode bonsi thilai ba. Bede thikhade, Paul Jisu ni grao ar thanghi baijaphin bani grao khe thi kha.

¹⁹Odebani, bonsi Paul khe jar jang baosi Areopagi ha lang hi bokhe sing ba, Ebo slingrithai gadain, ning sainthiyaba khe jing tharmaiba ja nang?

²⁰ning gmang thaosisi grao thiyaba buthu khe jinthane khna ri du, boni ortho khe jing mithima nangjao du.

²¹(Bede thikhade, Atheni ha dongyarao khripbo, ode oraha naorai dongyarao bo gadain gadain grao buthu ode grao khna ba khe gar hi de gibin khusi ha bonsi basain phlaiya kha.)

²²Paul de Areopagi ni gejer gejer ha song hi, bo thi ba, Nisi Atheni ni subung buthu, khrip ha Madai khe maniyaba se thihi ang tharmai du,

²³bede thikhade, ang daobai langba ha, nisi khlimyaba khe nu ba, ode khapra masi ni basao ha, MITHIYAYABA MADAI NE KHLAI HI thihi rebyaba khe ang nu kha. Odebani, nisi mithiya hi khlimyaba khe ning nisi ne ang sainthi ba.

²⁴Madai, habsao ni bising ha jinis dongyaba khrip ode habsao ar sorgo ni Raja se bani, yao jang slamyaba noh ha, bo dongya.

²⁵Jinis bao joba lai jahi subung ni yao ha khusi dang riba habo dangya, bo jar ning khrip jadi ne, hayu buthu khe, hang buthu khe, ode khrip jadi khe bo ning riba se.

²⁶Phirthi sao ha khrip dong mane khlai hi, buphang masi jang khrip jadi subung khe bo slam ba. Ode, bonsi ni khlai hi bubli buthu khe deng hi, bonsi ni dongthan hari buthu khebo saokhrip ba.

²⁷Madai khe smai hi, bonsi gibring hi gibring hi, bonsi asaba dara jang mai mani khlai hi, thikhabo, bo jini phrang gajain dongya.

²⁸Nisi ni bising ha sereba subung thi kha, Boni khlai hi se thanghi dong ba, maobai ba, ode rao hi dong ba. Nisi ni rajabthai khakhuba ringyaraobo, Jingbo boni greng se, thihi thi ba lai.

²⁹Jing Madai ni grengrao jaba ni yaohon ha, Madai ni gede gajao ja thing, rang ja thing, longthai ja thing, subung slamba ringyaba ode bisar baohi khaikhoyaba lai jing thima niya.

³⁰Madai khe subung tharmaiyayaba bubli buthu ha, bo tharmaiya jamai si ba; thikhabo, bo basain hanggai bani, duha de khrip hathan ha khrip subung khah phin mani hukhum bo ri du;

³¹bo basain hade, bo subung ni hukhum jang phirthi ni subung buthu gibi jang bisar khlai ri ma se. Bo grao khe, Madai ning bokhe subung githi ni phrang bo mathangyaba jang, khrip subung niha phorman ri kha, thi du.

³²Subung githi ni phrang thangphin hi baija phinyaba grao khe bonsi khnaba jang sereba mini ba, sereba thi ba, Ebo grao khe bakhali nini ha khnaphin lai nang.

³³Ode, Paul de bonsi ni bising ni phrang baigo hi bo thang la kha.

³⁴Thikhabo, gejesi boni ha gaba hi, bonsi lon kha; bonsi ni bising ha gejesi buthu de Areopagi ha bisar khlaiyaba dol ni subung Dionusia ode, masainjik saosi boni bumu Damari, ode, boniha ar gibin subung buthu bo dong.