Read Dimasa Dangyasarao 19 Bible Online

Dangyasarao 19 - Dimasa bible

Dangyasarao 19

¹Apollo Korinth ha dongba hatho ha, Paul, basao gede ni khrip haphai ha thanghi Ephesi ha bo phai ba, oraha sereba yaohon rikphayarao bo nuba;

²bo bonsi khe sing ba, Lon jenba ni bubli ha nisi Bese Gathar khe mai kha? Bonsi boni ha, Maiya, Bese Gathar dong thihi bo jing tharmaiya, bonsi thiphin ba.

³Bo bonsi khe thi ba, Thikha la, nisi sere ni baptisma la ba? Bonsi thiphin ba, Johan ni baptisma.

⁴Paul thi ba, Johan ede thihi khah phinma ni baptisma ri ba, ar Israelrao khe boni yaohon ha phaiginyaba khe lonma nang du thihi thi ba, bo de Jisu se ning.

⁵Bo grao khe bonsi khnaba jang Gabra Jisu ni bumu jang baptisma la kha.

⁶Paul bonsi ni basao ha boni yao khe deng hi, Bese Gathar bonsi ni basao ha sophai kha. Boha bonsi grao mithiyayaba buthu jang grao sainthi ba, ode Madai ni grao khebo bonsi sainthi ba.

⁷Bonsi khrip jang jhigin ja du.

⁸Odehe, Paul sunagog ha hap hi, nokha dain tham sosi khinya hi bo grao thi ba, ode Madai ni raji ni balam habo niyathai hi bujai re.

⁹Thikhabo, subung gejesi de khah rao bani bonsi lonma nangjaoya, ode subung buthu ni sagang ha lama ni grao khe bonsi sijiba jang

¹⁰nokha maithai gin sosi olei bo khusi dang ba. Odebani, Asia raji ha dongyaba khrip Judarao ode Greekrao bo Gabra ni grao khe bonsi khna thar kha.

¹¹Paul ni yao jang Madai ning gmang thaosisiyaba khusi khe dang ri ba.

¹²Bo jarni saomang ha rusayaba rih ja thing, gasa rusayaba buthu ja thing, limyarao niha bonsi labu hi, bonsi ni gilim gasa jam re, ode bonsi ni sao bising ni phrang sgain buthu bo baigo re.

¹³Sereba Juda pheren bai hi daobaiyaba, Jisu ni bumu lahi sgain bese gusu rik khlai mane khusi dang re. Bonsi Sere Paul sainthiyaba Jisu ni bumu jang ning khe jo du thihi thi re.

¹⁴Judarao ni jonthai saosi Skeva thiyaba ni basathu sni olei ning dangbai re.

¹⁵Thikhabo, sgain bese gusu ning bonsi khe thi ba, Jisu khe ang lon du, ode Paul khebo ang tharmai du, thikhabo nisi la sere?

¹⁶Ode, sgain bese, subung ni bising ha dongyaba, baipha phai ba ar bonsi khe de kha. Odebani, bo noh ni phrang langtha jahi bumai jang bo khaihun lang kha.

¹⁷Ephesi ha dongyarao khrip Judarao ode Greeksarao niha ebo grao gublung thar kha. Odebani, bonsi khin hi, Gabra Jisu ni bumu jadao ba.

¹⁸Boha lonyarao bo gabang subung phai hi, jar jar khusi dangyaba buthu khe mani hi bonsi thiphla kha.

¹⁹Gabang subung montro yaowaiyarao bo bonsi ni montro laisi buthu khe bojom khlai hi khrip subung ni sagang ha saokhrip ba, ode boni dam bo rjing dan lai ja du.

²⁰Olei sosi bol jang grao thihi Gabra ni grao gublung thar ba, ode bonsi de phalang ba.

²¹Ebo grao buthu khrip ja bani yaohon ha, Paul de bese jang sikphajao hi Makedonia jang Akaia raji gede jahi Jerusalem habo thangma bao ba. Oraha thang bani yaohon ha Rom habo ang thang ma, thihi bao ba.

²²Odebani, jarni Juruyahsa gini, Timothe jang Erasta khe Makedonia ha haiha hi, ode bo jakha de Asia raji ha dongthao ba.

²³Bo bubli ha bo lama ni balam ni khlai hi Ephesi ha gede dukhu ja ba.

²⁴Subung saosi, boni bumu Demetrias, guphu daoyaba, Diana ni Madaikhoh ni saokhuli khe guphu jang daoba, bo jang boni dangyasarao bo gabang lab mai re.

²⁵Bo bonsi khrip khe longthim hi thi ba, Hoi subungrao, ebo khusi khe dang hi jing besi don mai du thihi nisi mithi du,

²⁶duha, Ephesi ha se ning niya hi, Asia raji ni khrip ha ebo Paul khusi dangyaba khe nisi khna du ar nu du. Yao jang slamyaba buthu de madai niya thihi bo thi ba, ode gabang subung khe bujai re thihi nisi jar ning nu la kha, khna la kha.

²⁷Jing khusi dangyaba de nang, olei se ning niya hi, madaijik dedao thaoyaba Diana ni bikhoh bo raoya ja ma se. Asia raji ni khrip subung ar habsao ni khrip subung maniyaba muima bo raoya ja ma se thihibo khin mani dong, bo ode thi ba.

²⁸Ebo grao khe bonsi khna ba jang bonsi gabang thamsi baigo hi, Ephesi ni Diana thiyaba dedaothao thihi bonsi jirik khao ba.

²⁹Nogor ha hoho jahi Gaia jang Aristarka, Makedonia raji ni subung buthu, Paul ni yaohon rikphayarao khe bonsi rem hi, graosi ja dada baiyaba noh ha bonsi lang ba.

³⁰Boha Paul subung buthu ni bising ha hap ma baoba, thikhabo rikphayarao bokhe hap riya ja ba.

³¹Asia raji ni sereba bisardar Paul ni lugurao dong, bonsi boni ha subung haiha hi, baiyaba noh ha thangya mani khlai hi khainsu ba.

³²Boha, jomsi jahi dongyaraobo ho jalai ba, gejesi masi grao ni khlai hi jirik khao ba, ode gejesi gibin grao ni khlai hi bonsi jirik khao ba. Bede thikhala, subung bangdaohi dongyaba bojom jayaba ni balam khe mithi laya.

³³Judarao Aleksandar khe subung buthu ni sagang gede langsmai ba khe nuhi, bo se dangjenyaba thihi bao ba. Aleksandar jarni yao jang bai ri hi khrip subung ni sagang ha jar go mani balam khe thima bao ba.

³⁴Thikhabo, bokhe bonsi Judaa se thihi tharmaiba jang gonthagin lai khurang baosi jahi, Ephesi ni Diana dedaothao! thihi bonsi jirik khao ba.

³⁵Nogor ni laisi rebyasa subung buthu khe johi magain ri dada thi ba, Ephesi ni subung buthu, Diana dedaothao ni bikhoh ode sorgo ni phrang saokhuli galaiphaiyaba Ephesi ni subung buthu khe raokhiyaba ning se thihi bokhe sere mithiyayaba giri.

³⁶Saosi bo ebo grao khe niyaba giri. Odebani, nisi phirik phirik dongma nang ma, ode grao singya hi musi khusi khebo nisi dangma niya.

³⁷Bede thikhade, ebo subung buthu khe nisi labuyaba buthu de, bikhoh ni makhaorao niya, jini madaijik khebo bonsi sijiyaba niya.

³⁸Demetria jang boni lugurao khusi dangba ringyarao bo asaba ni basao ha grao gajai dong kha de, grao gajai thiyaba ni bisarkhoh khuru hi ning dong thi, bonsi ni bisardarrao bo dong, bonsi saosi jang saosi bisar khlai thing.

³⁹Thikhabo, nisi niha asaba balam ha gajai dong kha de, dara jang bonsi bisar khlai ma se.

⁴⁰Bede thikhade dini ha japhaiyaba grao ni khlai hi, musibo niya hi jini basao ha gajai ja mane jing khin mani dong, odebani ebo bojom jayaba ni balam ha jing musi thiphu nang niya, thihi bo thi ba.

⁴¹Odehe, ebo grao khe thi blai hi, bojom jayarao dra ri kha.