Read Dimasa Dangyasarao 2 Bible Online

Dangyasarao 2 - Dimasa bible

Dangyasarao 2

¹Pentikos ni basain sophaiba jang, bonsi khrip bo, hathan masi ha bojom jathar ba.

²Boha ning nokhasao ni phrang baryungma sip ba lai khurang sophai kha. Boha ning bonsi khamyaba noh ha gablai thar ri kha.

³Ode, slai buthu jar jang jar ron hi, wai lai bonsi ni basao ha nujao phai kha.

⁴Bonsi khrip bo Bese Gathar jang gablai thar ba, ode Bese jang grao jo riba lai ning grao gibin gibin jang bonsi grao joba.

⁵Ode, nokhasao bakhla ni khrip jadini bising ni subung, Madai khe baoyaba Judarao Jerusalem ha bonsi dongthao ba.

⁶Bo khurang khe bonsi khnaba jang, subung buthu phaihi bonsi bojom ja ba. Ode, khrip jadi bo bonsi ni grao khe khrip jarni grao lai bonsi khna bani, bonsi khah ha gmang lai ba.

⁷Bonsi khrip bo, khah waimu nang hi, bonsi hamsi ning gmang lai ba, Nai lah! Elei bo biyarao khrip la Galili raji ni subung niya na?

⁸Bedehe jing khrip jang jing hajaiphayaba grao lai jing jar jang jar tharmai lai ba?

⁹Jing de sereba Parthai jadi, Medai jadi, Elamitai jadi gaja se; Sereba Mesopotamia rajiha dongyaba, Judai rajiha dongyaba, Kappadokia rajiha dongyaba, Ponto rajiha dongyaba, Asia rajiha dongyaba,

¹⁰Phrugia rajiha dongyaba, Pamphulia rajiha dongyaba, Egypt rajiha dongyaba, Kurini rogong gabasi Libu raji ha se dong ba.

¹¹Sereba jakha de, Rom nogorni naorairao, Judarao, ode Juda jadiha phaiyarao se, sereba jakha de, Kret hahgojo ni subung, ode Arab raji ni subung jing jabu du. Thikhabo, Madai khusi dangba muima buthu, bonsi sainthiyaba khe, jing jar jarni grao lai tharmai du, thihi bonsi thi ba.

¹²Bonsi khrip bo hamsi ning gmang lai ba, ode khin hi, saosi jang saosi singlai ba, Ebo la snadi ja ba?

¹³Sereba sereba de mini hi, Bonsi de ju gadain ni baola jaba se, thihi bonsi thi ba.

¹⁴Thikhabo, Peter de bonsi jhiseh jang baosi songpha hi, bo khurang bol jang bonsi niha thi ba, Nisi Judai raji ni subung buthu, nisi Jerusalem ha khrip dongyarao, ebo khe tharmai lah, ode ani grao khe bo khna lah.

¹⁵Ebo buthu de nisi baoba lai bonsi baola jaya. Duha de phorong ni sain daokhusai ba bubli se ning jaba kho.

¹⁶Ebo de gorasali Joel ning thilangyaba grao se.

¹⁷Madai thidu, Basain jamthaoba buthu ha de ede ja ma, Khrip subung ni basao ha ani Bese khe ang lukhru nang, Nisini basathu ar bisikthu ani grao khe sainthi nang, Nisi ni nagarao nujaoyaba buthu khe nu nang, Nisi ni grarao saomi ha nu nang.

¹⁸Okhali ni basain ha de ani dangyarao, miyah ar masainjik ni basao ha bo, Bo basain ha ang jarni Bese khe lukhru nang, ode, bonsi ani grao khe sainthi ma se.

¹⁹Ode, basao gede ni nokhasao ha ar bakhla ni phirthi ha gmang thaosisiyaba khusi dang ma, Thijao, wai ode waikhudi ni gowal ang phunu nang!

²⁰Sain andar ja ma, Dain bo thijao lai gajao ja ma, Gabra ni basain dedao thaoyaba sophai mani sagang ha.

²¹Ode, sere Gabra ni bumu khe jirik du, bo sogojao ma se ode thihi bo thi ba.

²²O nisi Israel subung buthu, ebo grao khe khna lah! Nazareth Jisu de Madai ning nisi ni bising ha gmang thaosisiyaba khusi, ar jinis gmang thaosiyaba sin buthu khe dang ri hi, bo nisi khe ragaosisi phorman ri kha.

²³Nisi jar ning nisi tharmai la kha, bo Jisu khe Madai ni bisar ode, bo tharmai da ba lai ning, bonsi ne rem rihi, nisi ning subung hamyayarao ni yao jang kross ha dikpha hi sthai kha.

²⁴Thikhabo, bo subung khe Madai ning thiyaba khajaoyaba buthu khe khru rihi, bokhe sogo kha; bede thikhade bokhe thihyaba jang mathao phuma niya.

²⁵Bede thikhade, David boni balam ha thi du, Ani sagang ha nalai bo Gabra khe ang nu re, Jing maoya mane khlai hi, ani yaoda gede bo dong du;

²⁶Odebani, ani khah ha bo khaja du, Ani slai bo khusi ja du, Odebani ani saomang bo asa jang ning dong ma se.

²⁷Bede thikhade, ning ani bese khe githi ni nolei ha haiger nang niya, Ode, nini subung gathar saoba khe nu ri nang niya.

²⁸Ning ning hayuni lama buthu khe a ne tharmai ri ba, Ning ning nini mukhang ha khajama jang ang khe gablai ri ma se, thi du.

²⁹O daphlungrao, bumu galangyaba David ni balam khe khinya hi nisi khe ang thi du, bo de thih kha, phipba bo bonsi phip kha thi, boni mangkhlong bo duha sosi jini ha ning dong.

³⁰Bo de gorasali se bani, boni greng ni phrang asaba subung saosi khe boni khamthan basao ha kham ri mane Madai ning smai dang kha thihi bo tharmai kha.

³¹Odebani, bokhe sagang ha tharmai da hi ning dong bani, Krista thang hi baija phin mani grao khe bo thiba se, Githirao ni raji ha haiger langya, boni manggathibo sao nang niya thi du.

³²Bo Jisu khe ning Madai mathang phin kha, bokhe jing khripbo sakhi ja du.

³³Madai ni yaoda gede ha bakhan khlaijao hi dong ba, Bese Gathar hanggaiyaba khe Bupha ni phrang mai hi, bo nuyaba jang khnayaba khe bo lukhru ri kha.

³⁴David de sorgo ha gakhu langya, thikhabo bo ning thiba se, Gabra de ani Gabra niha, Ani yaoda ha kham lah,

³⁵Nini sotrurao khe nini yapha dengthan bakhla ha ang dengya si de, thiba.

³⁶Odebani, Jisu, nisi dikthaiyaba khe, Madai ning Gabra jang Krista jahi slam kha thihi Israel jadi khrip bo tharmai la thing!

³⁷Bo grao khe bonsi khna ba jang, bonsi ni khasu ha sainlai jalang la kha, Peter jang Apostol gibin buthu niha, Daphlungrao, jing bede khlai ma kho? thihi bonsi thi ba.

³⁸Peter bonsi niha thi ba, Nisi ni phap ni phrang khah phinhi, Jisu Krista ni bumu jang baptisma la thar lah; odese, nisi ni phap buthu khe map ja ma, ar Bese Gathar riyaba khe nisi mai ma.

³⁹Madai de nisine khlai hibo, nisini basathu ne khlai hibo, gajain ha dongyaba khrip ne khlai hibo, Gabra, jini Madai ning jarni ha bo longyarao ni khlai hi hangaiyaba gaja se dou, ode bo thi ba.

⁴⁰Peter, bonsi khe gabang grao gibin gibin lahi sakhi rihi thi ba, Duhani jugni subung hamyayarao ni phrang jar khe jar dimkhao lah, thihi bonsi khe sibring ba.

⁴¹Boni sainthiyaba grao khe subung gabang mani kha, ar maniyaba si de baptisma la kha, okhali ni basain ha subung rjingtham lai bangdao hi bonsi mai ba.

⁴²Bonsi Apostolrao jang dongpha lai hi, bonsi ni phrang slingrithai mai ba, hon khe bo sabai hi, khah jang muh jang bi dada bonsi dongsong ba.

⁴³Apostolrao de gabang gmangthaosi ode sin buthu khe dang ba, ode khrip subung buthu bo gmang lai hi khin hi dong ba.

⁴⁴Ode, lonyaba si de asaba khebo bonsi ni don buthu khe yaowai phalai hi dong ba.

⁴⁵Bonsi jarni jinis ar don buthu khe phain hi, nangyaba khe jagothai bonsi khrip jang ron re.

⁴⁶Nalai bo khah masi jahi Madai ni bikhoh ha ning khah jang muh jang bonsi dong re, bonsi ni noh gede bo hon sabai hi, khajama jang ode khah manima jang bonsi jilai re.

⁴⁷Bonsi Madai khe bakhan khlai hi, khrip subung ni khajama khe smai hi, bonsi dong re. Ode, golam maiyaba si jang Gabra ning nalaibo bonsi niha dongpha re.