Read Dimasa Dangyasarao 23 Bible Online

Dangyasarao 23 - Dimasa bible

Dangyasarao 23

¹Paul de bisardarrao khe naipha hi thi ba, Daphlungrao, ang de dini sosi bo Madai ni muh ha hamba ni gede ang tharmaiyaba si khe dang hi ning dong re.

²Jonthai dedao thaoyaba Anania, Paul ni gabasi songyarao khe boni mukhang ha bakhao lai ri mani sani ba.

³Paul boni ha thi ba, Hoi ning longthai ni badim ha suni huyaba, Madai ning khe su ma se; ning Dara ha lai subung ni bisar khlai mane khlai hi ning kham du, thikhala Dara khe baiglai hi sumjabani ang khe su ma sani ba?

⁴Boha, boni rogong ni subung buthu Paul khe thi ba, Madai ni Jonthai gedeba khe ning joba na?

⁵Paul thiphin ba, Hoi daphlungrao, Jonthai gedeba se thihi ang tharmaiya ba se, Nini greng buthu ni hoja ni basao ha hamya grao thithaoya, thihi bo reb du thi.

⁶Bonsi Saddukairao jang Pharisairao ni dol se thihi Paul tharmai hi, bisardarrao ni gejer ha bo jirik khao hi thi ba, Daphlungrao, ang Pharisai se, ang Pharisairao ni basabo ang ning. Asama jang subung githi thangphin bani balam ha ani bisar ja du.

⁷Ebo grao khe bo thiba jang, Saddukairao jang Pharisairao nam jalai hi bisardarrao degao thar kha.

⁸(Saddukairao de thi du, subung githi baija phinyaba musi giri, sorgo deglarao, bese buthu bo giri, bonsi thi re; thikhabo Pharisairao ebo khrip khe dong thihi bonsi mani du.)

⁹Bonsi hamsi ning jiu ja kha; Pharisai dol ni subung Dara slingriyaba gejesi song hi, bonsi niyalai ba, Ebo subung ni musibo hamya gajai jing maiya dou. Bese bo, degla bo bokhe thiba ni la snadi ja du? ode bonsi thi ba.

¹⁰Bonsi bak jadao hi niyalai bani, siphaiyarao ni hoja gedeba de Paul khe bonsi glithar ri ma se thihi khin ba. Odebani bonsi ni gejer ni phrang khaikho hi khorongma bising ha bokhe lang mane khlai hi siphaiyarao khe bo hukhum ri ba.

¹¹Bo bohor ha ning Gabra, Paul ni gabasi ha songphai hi thi ba, Khitha raohi dong lah; Jerusalem ha ani grao khe ning thiba lai ning, Rom nogorma habo ning thima nang ma.

¹²Phorong ha, Paul khe bonsi sthai mane sainlai khao hi Judarao phirik phirik bojom jahi bonsi sthaiya si de musi khebo jiya lingya mani khlai hi smai danglai ba.

¹³Olei sainlai khaoyaba de subung bisagin thane bangdao.

¹⁴Jonthai gedeba jang khraorao niha bonsi thanghi thi ba, Paul khe jing sthaiya si de musi khebo jiya lingya mani khlai hi jing smai dang kha.

¹⁵Odebani, duha ning melni gede jahi Rom ni hoja niha graojma hai ha, Paul khe nini ha hamsisi singso mane labu hi phai thing, boni balam ha ning hamsisi bisar khlai ma nang du; thikhabo, bo eraha sophai mani sagang ha ning jing bokhe sthai nang.

¹⁶Thikhabo, Paul ni bahandao ni basa, sthaima baohi bonsi phirik phirik jonyaba grao khe bo khna hi khorong bising ha bo hap hi, Paul khe bo thi ba.

¹⁷Boha, Paul siphaiyarao ni gedeba saosi khe longhi thi ba, Ebo naga de hoja dedao thaoyaba niha langpha, boniha smaba grao thi mani dong.

¹⁸Siphaiyarao ni hoja dedao thaoyaba niha bokhe langpha hi thi ba, Khajaoyaba Paul ang khe longha hi khainsu ba, ebo naga siphaiyarao ni hoja niha smaba grao thima nangjao du, bokhe boni ha langpha.

¹⁹Siphaiyarao ni hoja dedao thaoyaba boni yao khe remhi gibin lang dada bokhe sing ba, Aniha ning snadi grao thima nangjao ba?

²⁰Bo thi ba, Paul ni grao gibi mithi dao mane ning baoba lai, dakhna bisardarrao ni sagang ha labu mane khlai hi Judarao bisar nangjao du;

²¹thikhabo, bonsi ni grao khe da mani lah. Bede thikhade, bonsi ni bising ha subung bisagin thanebo bangdao hi bonsi jonhi ning dong, bo buthu thidu, bonsi bokhe sthaiya si de musi khebo jiya lingya mane khlai hi bonsi smai dang kha. Duha nini grao khe jonhi bonsi salai blai hi ning dong.

²²Siphaiyarao ni hoja dedao thaoyaba bo naga khe haiha hi, Ebo grao ning ani sainthiyaba khe saosi nihabo da thi, thi ba.

²³Hoja dedao thaoyaba, siphaiyarao ni hoja khe long hi thi ba, Hor ha thuba ni bubli ha, Kaisari sosi thang mane siphaiya rjagin ode gorai basao ha gayaba subung bisa tham jhi ode bla diyaba subung rjagin salai hi deng lah,

²⁴Paul ga manibo gorai salai hi deng lah, Latsap Felix niha nisi hamsisi ning digar tha, bo ode thi ba.

²⁵Hoja gedeba laijma bo reb hi edehe thi ba:

²⁶Klaudia Lusia, Latsap man gnang Felik khe khlim ha du.

²⁷Ebo subung khe Judarao remhi, bonsi sthaima jaba ha, siphaiyarao khe langpha hi, ang sogo ba. Bede thikhade bo Rom ni subung se.

²⁸Bonsi sthaima baoyaba balam khe ang mithima nangjao bani bisardarrao ni sagang ha ang lang ba.

²⁹Bonsi jarni smaba Dara ni balam ha gajai ridu thihi ang tharmai du. Thikhabo, thih mani sosi de phatho ha jebjao hi khajao mane de bo musi hamya khusi dang ba thihi ang nuya.

³⁰Judarao bokhe sthaima bao hi bonsi buddi jablai du thihi malai aniha thiba jang, nini ha ang srap haiha kha. Bokhe gajai riyarao khebo, boni basao ha grao hamya dongyaba si khe nini sagang ha thi mani khlai hi bo ang hukhum ri ba, thihi reb du.

³¹Siphaiyarao bo saniba lai ning hor horha ning Paul khe bonsi langpha hi, Antipatri thiyaba nogor ha bonsi phai kha.

³²Gibin basain ha, gorai basao ha gayarao se Paul khe langpha ba, thikhabo gibin siphaiyarao bonsi ni khorongma gede bonsi phaiphin la kha.

³³Kaisari ha bonsi sohiba jang Latsap ne laijma khe yaopha hi, Paul khe boni ha labu kha.

³⁴Latsap bo laijma khe phuri blai hi braha ni phrang phaiba thihi bokhe sing ba. Kiliki raji ni subung se thihi tharmai ba ha,

³⁵bo thi ba, Ning khe gajai riyarao sophai kha ning, nini grao khe ang bisar khlai nang. Ode Praitorian ha deng hi naiso mane bo hukhum ri ba.