Read Dimasa Dangyasarao 26 Bible Online

Dangyasarao 26 - Dimasa bible

Dangyasarao 26

¹Agrippa Paul niha thi ba, Ning jarni gibi ni balam ha thila phu du. Paul jarni yao sugu hi, jarni grao gibi ni balam ha bo thi ba.

²Raja Agrippa, bislei Judarao ani basao ha gajai ri du, dini nini sagang ha boni grao thi mani ani khlai hi khajama se ang bao du;

³Judarao ni bising ha dara jang grao banglaiyaba khrip ni balam ha ning ar mithi daoyaba se. Odebani, khah laohi ani grao khe khna mane nisi khe ang khainsu du.

⁴Ani dongthai khe ang ansa ni phrang ani jadi ni bising ha ode Jerusalem ha bede dong ba, bokhe Judarao khrip tharmai du.

⁵Jenba ni phrang ani kharmu khe bonsi tharmai du, olei jini dormo ni dara dudao thaoyaba Pharisai ni dara ha ang dong ba; bonsi nangjao kha de, ang jang baosi thipha phu du.

⁶Madai ning jini greng buthu niha bo grao hanggaiyaba khe asa ni balam ni grao ha duha eraha bisar khlaijao mane ang song du;

⁷bo grao hanggaiyaba khe, jing jadi jhigin, bo sain jang hor jang Madai ni khusi khe khah jang muh jang dang hi, bonsi mai mane asa deng re. O gabra, ebo asa ni balam ha Judarao ani basao ha gajai ri ba.

⁸Madai ning githirao khe mathang ba thiyaba khe snadi jabani lonja re thihi nisi baoya ba?

⁹Ang bo Nazareth Jisu ni bumu khe bodnam khlai hi gabang jinis dang kha la ham nang thihi ang bao ba.

¹⁰Olei ning Jerusalem ha ang dangba bo dang re, ode Jonthai hojarao ni phrang ang grao mai hi, subung gatharrao ni bising ha gabang subung khe phatho habo ang jeb re. Ode, bonsi sthaiba ha angbo bonsi jang gaba re.

¹¹Ode sunagog khrip ha ang saja ri re, Madai khe siji ri ma bo bao re; bonsi ni basao ha ang hamsi ning hamya hi raji gibin ni nogor sosibo ang dukhu ri re.

¹²Olei dang mani khlai hi, Jonthai gedebarao ni phrang hukhum maiba jang ode, bonsi haihayaba ni laisi khe lang hi, Damaska ha ang thang ba;

¹³Boha O Raja, sain daokhusaiba bubli ha, nokhasao ni phrang jnama, sain thane bo jnadao hi, ang jang ani lugu thang phayarao ni sersi giding jnaphai ba khe ang nu ba.

¹⁴Jing khrip bo hah ha galai hi, Hebrai grao jang, Saul, Saul, snadi jabani ning ang khe dukhu ri ba? Iyaba goda jang ning khe jikphin kha de nini khlai hi gabang sa ma se dou! thiyaba khurang khe ang khna ba.

¹⁵Boha ang thi ba, O Gabra, ning sere? Gabra thiphin ba, Ang de ning dukhu riyaba Jisu se.

¹⁶Thikhabo, baija hi song lah; ning jinis nuyaba buthu ode nini ha ang nujaoyaba jinis khe khusi dangba ha ning khe sakhi slam mane, nini ha ang nujao ba se.

¹⁷Khrip Israel subung buthu ar Jentailrao ni yao ni phrang ang ning khe dimkhao hi haiha nang.

¹⁸Bonsi ni muthai nu mane khlai hi ning khe bonsi niha ang haiha du, odese andar de jnama gede nai nang. Soithan ni hukhum ni phrang Madai ni gede naiphin la nang. Phap map jayaba hathan ne khlai hi ode bonsi ang khe lon bani gathar jayarao niha don ni phantha japhu mane khlai hi, bo ode thi ba.

¹⁹Odebani, O Raja Agrippa, sorgo subung nujaoyaba khe ang niyaya.

²⁰Jenba ha Damaska ni subung buthu ni ha, boni yaohon ha de Jerusalem ni subung buthu niha, Juda raji ni khrip subung buthu niha, Jentailrao nihabo bujai ba, ode khah phin hi Madai ni gede sagang phin mane khlai hi se ang thi ba

²¹Bo bubli ha de, Judarao Madaikhoh ha ang khe remhi, ang khe bonsi sthaima bao ba.

²²Thikhabo, Madai ni phrang ang juruma mai bani se dini sosi subung gedebarao jang khasibarao niha grao ni sakhi rihi ang dong ba, gorasalirao jang Moses bo jinis sophai ma thihi bonsi thiyaba buthu khe garhi de gibin musi grao khe bo ang thiya.

²³Krista de dukhu jama, ode bo ning khrip tha sagangthao githi ni phrang baijaphin hi jini subung buthu niha ode, Jentailrao nihabo jnama ni grao khe sainthi ma se, thiyaba grao khe garhi de musi khebo ang thiya.

²⁴Olei Paul grao khe thiba ha Festa, khurang bol jang bokhe thi ba, Paul, ning gibir ja kha. Bede thikhade gabang slingba bang bani bidda jang gibir khlai jao kha.

²⁵Thikhabo, Paul thi ba, O Festa man gnang, ang gibir jaya, gibi jang buddi ni grao buthu khe se ang thi ba.

²⁶Raja Agrippa, ning bo ebo jinis buthu khe tharmai du thihi ang tharmai hi, musi khinya hi ang grao thi du, ebo khrip khe nogrong ha ang thiya.

²⁷Raja Agrippa, gorasalirao ni grao khe ning lon du? Ning lon du thihi ang tharmai du, bo ode thi ba.

²⁸Boha Agrippa Paul khe thi ba, Khaisa bubli ha ang khe phuslai hi ning Kristian slam ma bao ba?

²⁹Paul thiphin ba, Budu lao khabo, laoya khabo, ning khe se ning ang thiya, dini ha ani grao khe khnayarao khripbo ang lai dong mani khlai hi Madai niha ang sain du, thikhabo sikhol jang khajaoya hi.

³⁰Boha Raja jang Latsap ode Berniki ode bonsi jang baosi khamphayarao songkhu thar ba;

³¹ode, bonsi gibin thang hi, jar jang jar sainlai ba, Ebo subung de thih mane sosi ode sikhol jang khah jaoma sosi ne de, musi khebo bo dangya, thihi bonsi thilai ba.

³²Ode Agrippa Festa niha thi ba, Ebo subung ning Kaisar niha so ri mane thiya kha de duhabo go kha mu, bo ode thi ba.